Mátyo 6
6
Lilɛ́fu tɛ́ŋgɛnɛ li wúnján bâʼ
1“Nyí nǔŋ púndá! Nyí si bwə ɛbulú ɛ́ Dyǔ nána baʼ bá mín nyə́. Njí nyí bwə́lí nâni, ní nyí sî kwisíyá nsáwu á Sáŋ n nyə awə̌ á dí ámǐn.
2Áfánikə̌, njí ɛ bəkí yǔm a mɔʼ ɛ́yə́ ǎ saní, ɛ si kfǔm nkíŋgí ngə baʼ ábə́ bá səŋ bɔ́mə̌n. Bá kfǔm nkíŋgí á mandáʼ má mákáni na á nkí átin áfə́ baʼ bá díní, ngə bá mín ní bɔ́. Á mbálɛ nǎn pɔŋ nyə́ nána bá mə́ ɛ kwisí nsáwu m bɔ nsə́sə̌n. 3Ndé njí ɛ bəkí mɔʼ yə̌ ɛ́yə́ ɛ́sakí á mɔ́, ɛ si bwə nána ká nsún n wə a nlə́m a bî. 4Ɛ́yî ɛ́ bwə mɔ ká nfɔ́ a si bí yə̌ ɛ́yə́ ɛ bə́kíní mɔ́. Dyǔ Sáŋ n wə awə̌ ǎ mín yə̌ ɛ́yə́ ɛ̌ bwəní á kfun, mɔ́ á sáwú wə̂.
Yésuwə a lɛ́fú tɛ́ŋgɛnɛ makáni
5Njí nyí káni, nyí sí bá ngə baʼ bá ɛlaŋgá, ábə́ njí bá káni bá nə́ŋí ɛ tyə́ á mǐn á mandáʼ má mákáni na á míbum álí bwə nána baʼ bá mín bɔ́. Á mbálɛ nǎn pɔŋ nyə́ nána bá mə́ ɛ kwisí nsáwu m bɔ nsə́sə̌n. 6Ndé njí mɔʼ ǎ káni, a kwíli á tfǔŋ ɛ́ mɔ, a kɔ́l ɛ́kuʼ, ti a kání á Sáŋ m mɔ Dyǔ, awə̌ mɔʼ a sɛní ɛ mín. Ti Sáŋ m mɔ awə̌ ǎ mín yə̌ ɛ́yə́ ǎ bwəní á kfun, á sáwú mɔ́. 7Njí nyí káni nyí sí bwəlán bíyala ábə́ bí wɔ́ŋiyá mándá ɛtîtɛ́, ngə baʼ ábə́ bá shiyǎ baʼ bá Júda bá bwəní. Bá kani nána Dyǔ lí wú makáni má bɔ á ɛ́tútú nána bá bwəlán bíyala jǐta. 8Nyí si bá ngə bɔ́. Dyǔ, Sáŋ n nyə, lí bí yə̌ ɛ́yə́ ɛ́ sakí nyə́, nyí lâ mɔ́ ɛ kɔndɛ. 9Áfánikə̌, ɛbú ɛ́ mákáni ɛ́yín yɔ́ nyí lɔ́líní ɛ káni,
Dyǔ, Sáŋ n sə, awə̌ á dí ámǐn,
ɛdúbɛ́ ɛ́ bə́kání dǐn lí wə.
10Janiya lí wə lí pâʼ lí nûŋ wudya.
Baʼ bá nkínshíyə bá bwə̂ mísam ámə́ ɛ̌ saní ngə mí bwəlání ámín.
11Bə sə́ wúyə́ lidyá lí sə lí bwín.
12Laksɛ́ sə́ wubî wú sə, ngə sə́ pə́ sí laksɛ́ní baʼ ábə́ bá bwə́lí sə́ wubî.
13Ɛ si pushú nána sí kfún á mákiksɛ, ndé fúl sə́ á makɛ́ má Sátan.#6:13 Dungu lí kâti ɛ́ wusúwə ɛ́ bándí nána Janya lísə́sə̌n, ngínya ɛsə́sə̌n na wulɔ wúsə́sə̌n wú dí wú wə kə́ŋ ti á bwindeya.
14Njí nyí láksɛ́ baʼ ábə́ bá bwə́lí nyə́ wubî, ní Dyǔ, Sáŋ n nyə awə̌ a dí ámǐn, mɔ́ pə́ á laksɛ́ nyə́. 15Ndé njí nyí láksɛ̌ baʼ bápə́pə̂ wubî wú bɔ, ní Dyǔ, Sáŋ n nyə mɔ́ pə́ a sî laksɛ́ nyə́ wubî wú nyə.
Yésuwə a lɛ́fú tɛ́ŋgɛnɛ njɛ-á-mákáni átin
16Ndé ká njá púndá ɛ́yə́ nyí dyɛní njɛ-á-mákáni átin, nyí si dí mású ngə baʼ bá ɛlaŋgá bá díní. Bá dí mású má bɔ likini likini ngə baʼ básə́sə̌n bá mín ní nána bá dyɛ́ njɛ-á-mákáni átin. Á mbálɛ nǎn pɔŋ nyə́ nána, bá mə́ ɛ kwisí nsáwu m bɔ nsə́sə̌n. 17Ndé wə̌ti nyí dyɛ́ njɛ-á-mákáni átin, nyí wû masú má nyə, nyí sɛ́su nyuŋ ɛ́ nyə. 18Nyí bwə̂ nâ, ngə mɔʼ ká nfɔ́ a sî púlání ɛ bî nána nyí dyɛ njɛ-á-mákáni átin, ɛ́sitúm Dyǔ, Sáŋ n nyə, awə̌ mɔʼ ká nfɔ́ a səní ɛ mín, lí mísam ámə́ mí dí á kfun, mɔ́ á sáwú nyə́.
Yésuwə a lɛ́fú tɛ́ŋgɛnɛ wudi
19Nyí si kɔŋgɔ́ wudi wú nyə áfánán á nkínshíyə, áfə́ mfu na mángéretə bá fɛnjní byə̌m, na áfə́ bajíb bá gbíní mandáʼ álí jíb byə̌m. 20Ndé nyí kɔ́ŋgɔn wudi wú nyə ámǐn, áfə́ mfu na mángéretə bá tíŋganiyaní ɛ fɛ̌nj byə̌m, na áfə́ bajíb bá sɛní ɛ gbí mandáʼ álí jíb byə̌m. 21Nyí lɔ́lí ɛ bí nána áfə́ wudi wú mɔ̂ʼ wú díní, á wə́ pə́ nlə́m m mɔ nán bání.
22Mǐ má dí ngə ɛtrúkán á nyǔ ɛ mɔʼ. Áfánikə̌, wə̌ti mǐ má kálú wə á nlú, ní nyǔ ɛ́ wə pə́ ɛsə́sə̌n ɛ́ kálú átin. 23Ndé njí dǐ lí wə lí sáŋiyǎ átin, ní nyǔ ɛ́ wə pə́ ɛ́sə́sə̌n ɛ̌ lwínj na ɛfínjan. Áfánikə̌, njí yǔm ɛ́yə́ ɛ lɔ́lí nyə́ ɛ lúfú mwɛ́nɛ ɛ́ tímbí ɛ bá yǔm ɛ́yə́ ɛ́ bwə nyə́ nyí bá á ɛfínjan átin, ní ɛfínjan ɛ́yî ɛ́ bá ngínya jǐta.
24Mɔʼ ká nfɔ́ a tíŋganiyǎ ɛ bá mɔʼ a ndutu á basísə́ bábɛ̂. Á lúfú sísə́ nfɔ́ ɛniŋgán litúm aníní, tɔ̌ á bá na nfɔ́ ti a báŋ aníní á nyǔ. Ɛ tíŋganiyǎ ɛ́ bá mɔʼ a ndutu á basísə́ bábɛ̂ á mulimlim m púndá. Ɛ tíŋganiyǎ ɛ́ bá mɔʼ a ndutu a Dyǔ na mɔʼ a ndutu a ngáʼ.
25Áfánikə̌, nǎn pɔŋ nyə́ nána, nyí si takí nlə́m á luŋgɛ́, álí byá nána yə̌ nyí dyání, tɔ yə̌ nyí mwání, tɔ yə̌ nyí fání á nyǔ. Nga ɛ́ dí mbálɛ nána luŋgɛ́ lí túmbí lidyá ə̌? Nga nkfu-n-nyǔ pə́ n dí yǔm ɛ́ mbímbí litúm mabaʼ ə̌? 26Nyí táti manɔn, má sə̌ ɛ́ wún byə̌m, má sə̌ ɛ́ pá, na bá wɔ́ŋiyǎ fǔm ábə́ bá kɔŋgɔ́ní madyá. Kánâwə̌, Dyǔ, Sáŋ n nyə awə̌ a dí ámǐn ǎ dísí bɔ́. Nyí bíyǎ nána nyí túmbí manɔn mâ jǐta? 27Njá á wútitîn wú nyə a tiŋgání ɛ taʼ átin kə́ŋ kə́ŋ a bán bǔn bu nfɔ́ á luŋgɛ́ lí mɔ? 28Yə̌ nyí takíní nyǔ tɛ́ŋgɛnɛ mabaʼ ámə́ nyí fání á nyǔ? Nyí táti mbunji ɛ́yə́ ɛ́ dí á ndfukú ngə ɛ́ kɔní. Ɛ́ sə̌ ɛ́ bwə ndutu, ɛ́ sə̌ ɛ́ jǔm mabaʼ. 29Nǎn pɔŋ nyə́ nána, ká Kə̂ŋ Sólómonə na wudi wú mɔ wúsə́sə̌n, a bíliyǎ ɛ́ fá mabaʼ ámə́ má lɔ́lí litúm ɛ́yî. 30Njí Dyǔ lí tíŋgání ɛ fá bíshum bí ndfukú mabaʼ ábə́ bí bá wúyə́ bǔn búyánə́ bá fá byɔ́ á mwǐ, lí sî fá nyə́ mabaʼ á nyǔ litúm nâ? Yán dúbɛ lí nyə lí kɔ́ŋíní nâ? 31Áfánikə̌, nyí takí mílə́m mí nyə álí byá nána, ‘Yə̌ sí dyání? Yə̌ sí mwání? Tɔ yə̌ sí fání?’ 32Á ɛ́tútú nána, baʼ ábə́ bá shiyǎ baʼ bá Júda, bɔ́ bá ji álí wɔ́ŋ nyai ɛ byə̌m bínán. Ndé Sáŋ ŋ nyə awə̌ a dí ámǐn a bí nána misam mínán mísə́sə̌n mí saki á nyə́. 33Ndé nyí kɔ́sɛ ɛ sa mísam mí janiya lí Dyǔ na li tyə́ lí sîm lí mɔ, yɔ́ Dyǔ lí bəní nyə́ byə̌m bíní bísə́sə̌n. Njí nyí bwə́lí nâni, Dyǔ lí bə nyə́ misam mínání mísə́sə̌n. 34Áfánikə̌, nyí si takí nyǔ tɛ́ŋgɛnɛ bǔn búyánə́, bǔn búyánə́ bú wɔ́ŋí mutakaʼ m mɔ ámə́ n kúkí mɔ́. Bǔn tɛ́ bú wɔ́ŋí mutakaʼ m mɔ.”
Attualmente Selezionati:
Mátyo 6: bwt
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
