Mátyo 10

Yésuwə a pwɛsí bawútú dyǔm na bábɛ̂

1Á mbís ɛ púndá Yésuwə a bəŋí bawútú bá mɔ fǔm bufɔ́. A pwɛsí dyǔm na bábɛ̂, ti a bəkí bɔ́ wunja álí fúl midî mí bî átinə́ a baʼ na álí pwisí baʼ bá mikfulu, na nyai ɛ́ banyambɛ̂ básə́sə̌n. 2Mǐn má bawútú bâ dyǔm na bábɛ̂ mɔ́ mán: A Sáymɔnə awə̌ bá bə́kíní dǐn lí Píta, na mǎ nyǎ m mɔ Ándruwə, Jémsə na mǎ nyǎ m mɔ Jɔnə́, bǎn bá Zɛ́bɛdíyə, 3Fílipə na Batolómyo, Tɔ́masə na Mátyo, nkuwá-a-táks, Jémsə mwǎn mú Álféyusə na Tadíyusə, 4Sáymɔnə awə̌ a bílí á ɛ́pipá ɛ́ baʼ ábə́ bâ n wɔ́ŋ nyɔ́ŋgí ɛ ɛkumbu, na Júdasə Ískáriyɔtə awə̌ a timbí ɛ́ súm Yésuwə.

Yésuwə a pɔŋí bawútú ábə́ a lúmíní ngə bá bwəní ndutu ɛ́ mɔ

5Ti Yésuwə a lúmí baʼ á bâ dyǔm na bábɛ̂, á pɔŋá bɔ́ nána, “Nyí si kə á mikí ámə́ mí shiyǎ mikí mí ɛ́kumbu ɛ́ Ísrɛl, tɔ á nkí ká pɔ́ á ɛ́kumbu ɛ́ Samáriya. 6Ndé nyí kə̂ á baʼ bá Ísrɛl. Bá dí ngə mílɔŋgi ámə́ mí gbɛ́. 7Ngə nyí kəní nyí fə́ŋi nána ‘Wudya wú minyə́ wú mə́ ɛ wútan.’ 8Nyí pwísi baʼ ábə́ bá kfulu, nyí wúmisi baʼ ábə́ bá mə́ ɛ́ wá, nyí pwísi baʼ ábə́ bá wɔ́ŋí akúnyə ngə bá sáŋní, nyí fúl midî míbî á nyǔ ɛ baʼ átin. M bəkí nyə́ ngínya álí bwə misam mínán mísə́sə̌n ndé ŋ kɔ́ndɛ̌ nyə́ ká yǔm. Áfánikə̌, nyə́ nyí kə̂ nyí bwə̂ mulimlim nyí si kɔndɛ́ nsáwu. 9Nyí núŋá gôl, sílva, ká ngáʼ ɛ kɔ́pa. 10Nyí núŋá ɛkpa, tɔ̌ nku mpə́pə̂, tɔ̌ bitámbí, tɔ̌ ntfúm á ɛ́tútú nána, mbwəlâ a ndutu a lɔlí ɛ kwisí lidyá lí mɔ á mɔʼ awə̌ ǎ bwəliní. 11Njí nyí kwílí á nkí ká n fə́, n nə̂n tɔ̌ n ntə́kə̂n, nyí kwíli nyí sâʼ mɔʼ awə̌ a bunsání álí kasí nyə́, nyí dyɛ̂ na mɔ́ kə́ŋkə́ŋ ti á púndá ɛyə̌ nyí falúní á nkí m mû. 12Ká njá ndáʼ ɛyə̌ nyí kwílíní á wə́, nyí sámban baʼ ábə́ bá dí á ndáʼ átin nána, ‘Musaŋgu m bá na nyə́.’ 13Njí baʼ bá ndáʼ ɛni bá kásí nyə́, nyí máku masambán má nyə má musaŋgu má búkɛ na bɔ́, ndé njí bá kásiyǎ nyə́, masambán má nyə má kə̂ na nyə́. 14Njí nyí pílí á ndáʼ ká fə́ tɔ̌ á nkí ká fə́ ka bá kásiyǎ nyə́, tɔ̌ bá wúkaniyǎ nyə́, nyí pápú mpupu n ndɔʼ á fǔm bû á mákwi má nyə ngə nyí falúní áwə́, álí lúfú nána Dyǔ lí kásiyǎ bɔ́. 15M pɔŋ nyə́ mbálɛ nána, á Bǔn bú Líkáyisi lí baʼ, Dyǔ lí lúfú líkini lí nlə́m á baʼ bá Sódom na Gomóra litúm baʼ bá nkí mû.

Mutaka ámə́ bawútú bá wɔ́ŋní

16Yésuwə a kǐ pə́ á wúsú álí byá nána, Nyí lám matwî! Nǎn lúm nyə́ ngə mílɔŋgi áwútitîn wú ngvɛʼ. Nyí bá wukínjú ngə nyɔ̌, ndé nyí bá ndəmbu ngə mídfulû. 17Nyí lɔ́lí ɛ nuŋ púndá á ɛ́tútú nána baʼ bá bá, ábə́ bá kú nyə́ bá kánán nyə́ á kúti, bá shwɛ́njí nyə́ á mandáʼ má mákáni má bɔ. 18Bá tyə́sí nyə́ á wusú wú bakə̂ŋ na bajaniya ɛ́tútú ɛ́ dǐn lí myə. Bá bwə nyə́ nyí pɔ̌ŋ bɔ́ ndúm ɛ mbâ, na nyí pɔ̌ŋ pə́ baʼ ábə́ bá shiyǎ baʼ bá Júda. 19Njí bá tyə́sí nyə́ álí káyísí nyə́, nyí lɔ́liyǎ ɛ́ taʼ á milə́m á yǔm ɛ́yə́ nyí byání, tɔ ngə nyí byání yɔ́, wə̌ti púndá ɛni ɛ pilí yǔm ɛ́ bá ɛ́yə́ nyí byání. 20Biyala ábə́ nyí byání bí sî bá bí nyə, bí fí á mudî n Sáŋ n nyə awə̌ á byábí nyə́. 21Baʼ bá bə̌ bǎn bá nyǎ á makɛ́ má baʼ bápə́pə̂ nána bá búlu bɔ́, basáŋ bá bwə̌ mulimlim á bǎn bá bɔ. Bǎn bá tɛ́ŋgɛ́n basáŋ na banyǎ bá bɔ na bá búlú bɔ́. 22Mɔʼ ansə́sə̌n á kfwɛ nyə́ á ɛ́tútú ɛ́ myə. Ndé ká njá awə̌ a tfúlí nlə́m kə́ŋ ta álí shú á kwisí lishuŋgɛ. 23Njí bá tákí nyə́ á nkí nfɔ́, nyí kánan mifílí á nkí mpə́pə̂. Á mbálɛ nǎn pɔŋ nyə́ nána, nyí sî malá ndutu ɛ́ nyə á mikí mísə́sə̌n á ɛ́kumbu ɛ́ Ísrɛl ɛ́yə́ Mwǎn a Mɔ̌nyuŋ a píliyaní. 24Mwǎn awə̌ ǎ wúku a sə̌ ɛ́ túm mɔʼ awə̌ á lɛ́fú mɔ́. Mbwəlâ a sə̌ ɛ́ túm sísə́ m mɔ. 25Áfánikə̌, mwǎn awə̌ ǎ wúku a lɔ́liyǎ ɛ́ sa ɛ́dúbɛ́ ɛ́yə́ ɛ́ túmbí ɛ́ mɔʼ awə̌ ǎ lɛ́fú mɔ́. Mbwəlâ pə́ a lɔ́liyǎ ɛ́ sa ɛ́dúbɛ́ ɛ́yə́ ɛ́ túmbí ɛ́ sísə́ m mɔ. Njí bá bə̌ŋ nlú n túmbá bá Bɛ́lsɛbulə, ní bá bə̌ŋ baʼ ábə́ bá dí á ndáʼ ɛ́ mɔ mǐn má bî ámə́ má túmbí má mɔ.

Awə̌ bá lɔ́líní ɛ báŋ

26Yésuwə a bándí pə́ nána, Áfánikə̌, nyí si báŋ mɔnyuŋ. Á ɛ́tútú nána ká yúm ɛ́ shiyǎ ɛ́yə́ ɛ́ dí kfun ɛ́yə́ ɛ́ sî nyítá á mpúman. Yǔm ká ɛfɔ́ ɛ́ shiyǎ ɛ́yə́ ɛ́ sɔ́mɔ́ní ɛ́yə́ bá sî bíyání. 27Misam mísə́sə̌n ámə́ nǎn pɔŋní nyə́ á ɛ́fínjan, nyí byá mɔ́ lisín lí bwín. Yə̌ ka pə́ nyí wúkíní á kfun átin, nyí lɔ́lí yɔ́ ɛ byá á tandándâ. 28Nyí si báŋ baʼ ábə́ bá búlú nkfu-n-nyǔ ndé bá si púlá ɛ́ búlú mudî. Ndé nyí báŋ Dyǔ álə́ lí tíŋgání ɛ́ fɛnj nkfu-n-nyǔ, ká na mudî á mwǐ. 29Nga ɛ́ dí mbálɛ nána bá súm bambumə́ bábɛ̂ á kápan pɔ́, ndé kánâwə̌ ká mbumə́ a sə̌ ɛ́ kfún áshí ɛ́yə́ Sáŋ n nyə a bíyaní. 30Ndé ká á nyə́, Dyǔ lí bí ká nsɔŋgí n nyuŋ ámə́ n dí nyə́ á nlú. 31Áfánikə̌, nyí si báŋ, nyí túmbí bambumə́, ká ngə bá bwíní átin.

Álí tyə́ Yésuwə mbúŋ tɔ álí báŋ mɔ́

32Ká njá mɔ́lə́ awə̌ a tyə́bí mi mbúŋ á wusú wú baʼ, mi pə́ n tyə́ mɔ́ mbúŋ á wusú wú Sáŋ m myə awə̌ a dí á nkímínyə́. 33Ndé ká njá mɔ́lə́ awə̌ a báŋí mî á wusú wú baʼ, mi pə́ m báŋ álí tyə́ mɔ́ mbúŋ á wusú wú Sáŋ m myə awə̌ a dí ámǐn.

Yésuwə a byábí nána mɔ́ mún pánání makabánə́ áwútitîn wú bǎnyûŋ

34Nyí si kaní nána m pilí á nkínshíyə álí panán musaŋgu. Ǎ yě. M píliyǎ álí panán musaŋgu ndé m pilí álí panán mákabánə́. 35M pilí álí bwə nána bǎn bá bumân bá tɛ́ŋgɛ́n basáŋ bá bɔ, bǎn bá balân bá tɛ́ŋgɛ́n banyǎ bá bɔ, bǎn bá balân bá tɛ́ŋgɛ́n banyǎ bá bajúm bá bɔ. 36Baʼ bá túmbá lí mɔ̂ʼ bɔ́ bá bá baʼ bá ɛ́kfwɛyí bá mɔ.

37Ká njá mɔ́lə́ awə̌ a nəŋí sáŋ m mɔ tɔ nyǎ m mɔ litúm mî, a kúkiyǎ álí bá muwútú m myə. Ká njá a nəŋí mwǎn m mɔ litúm mî a kúkiyǎ álí bá muwútú m myə. 38Ká njá awə̌ a pə́mbiyǎ mbásá ɛ́ mɔ a pɔ́ŋ mî á mbís, a kúkiyǎ álí bá muwútú m myə. 39Ká njá awə̌ a wanání álí shungɛ́ luŋgɛ́ lí mɔ, á bɔ́lɔ́n lɔ́. Ndé ká njá awə̌ a bɔ́lɔ́ní luŋgɛ́ lí mɔ á ɛ́tútú ɛ́ myə, á kwisí luŋgɛ́ álə́ lí sə̌ ɛ́ mɛ.

Nsáwu n Dyǔ á baʼ ábə́ bá kásí bawútú bá mɔ

40Ká njá awə̌ a kasí nyə́, ní a kasí mi. Ká njá awə̌ a kasí mî, ní a mə́ ɛ́ kasí Sáŋ m myə awə̌ a lúmí mî. 41Ká njá a kasí nkə̌-a-ndúm a Dyǔ á ɛ́tútú nána a dí nkə̌-a-ndúm a Dyǔ á kwisí nsáwu mulimlim ngə nkə̌-a-ndúm a Dyǔ. Ká njá a kasí mɔʼ awə̌ a sáŋí á ɛ́tútú nána a dí mɔʼ awə̌ a sáŋí, á kwisí nsáwu mulimlim ngə mɔʼ awə̌ a sáŋí. 42Á mbálɛ nǎn pɔ̌ŋ nyə́ ká njá a bəkí madí má lí mwá á muwutu m myə nfɔ́ á ɛ́tútú nána a dí muwútú myə, ká ngə a shiyǎní mɔʼ a mbímbí, a lɔlí ɛ kwisí nsáwu n Dyǔ.”

Attualmente Selezionati:

Mátyo 10: bwt

Evidenzia

Copia

Confronta