Aromayi 16
16
Əmihniɓwugyi aza gnaɓyi
1Mi tnu n əyi mapwii Fyibyi n əfye aba, dikin ikilisiya nya dna ń Kankiriya. 2Mi gna fye ge fye gwo wo dna ń Dagayi, n zokwo ń kwo kwnuce lo n əwo azai, jesnu fya ga wo bmazhni dna n zokwo dəhodəhoi n wo ɓa ye n əfya aba, ntuge wo zhni aza bəgyé bmazhnii nu, ɓədo n əmihnii ɓe.
3Fye ga Pirisila əmi gnaɓyi n Akwuilai, əmi atnutnu kwnuzhniyi dna n Kirisiti Yeisu. 4Ɓa ɓə kwu əɓahni wyewyeyi mafyi ntu əmi ɓo. To ɓwasnu n əmi gbmanyi ɓo nu m, ama Abyedo aikilisiya vnyanya, ɓa dagbma lo ntu əɓa ɓo.
5Fye kwu ikilisiya ɓyigna ga mi ce, ń kwo yezhi ń əɓa pwuwa nyi.
Fye kwu əmi nugwnudo yeyei Efyinatus ɓyigna ga mi, əwo nu ɓə kpmi Kirisiti abwiye-gwo dna n Asiya əknyi.
6Fye kwu Mariyamwu ɓyigna ce, ń əwo nu ɓə zhni tnutnu n agwuiga ntu əfye ɓo nyi.
7Fye kwu Andronikwus ɓyigna ga mi n Juninyai, əmi Ayahudiyi aje n ɓa ɓə kwu kwnufyi n mii n zhalu nyi. Ɓa kwnuwu lo fyi ń atnutnuloyi aje atasni, jesnu ɓa ɓə kwu vyi Kirisiti n əmi abye.
8Fye kwu Ampyilayatus ɓyigna ga mi, əmi nugwnudo yeyei dna ń Dagayi.
9Kwu Ubanus ɓyigna, əyi tnutnu kwnuzhniyi dna n Kirisiti, ɓədo n əmi nugwnudo yeyeyii Sitaci.
10Fye ɓyi Apyeles əgna, əza n əwo gbenu n Kirisiti aba too shnado m.
Fye kwu aza yi ɓyigna n ɓa fyi n Arisitobwulus pwuwa nyi.
11Fye kwu Hirodiyon ɓyigna, əmi Yahudiyi ədo.
Fye kwu aza yi ɓyigna n ɓa fyi n Nasikwus pwuwa n ɓa fyilo ń Dagayi nyi.
12Fye kwu Tirafyena ɓyigna n Tirafosai, anyikwoza yi n ɓa ɓə zhni tnutnu n agwuiga dna n Dagayi.
Fye kwu əmi nugwnudo yeyei ɓyigna ga mi, Pasis, nyikwoza ye ɓə kwu tnutnu zhni n agwuiga dna ń Dagayi.
13Fye ɓyi Rufusi əgna, əza knyiknyiyi dna n Dagayi, ɓədo n əwo əyai, n wo la zhni əmi əya ce nyi.
14Fye ɓyi Asinkiritus əgna, Fyilegon, Hamis, Patorobas, Hamas, n əyi azajei azanugbai n anyikwozai n ɓa kwnusnu lo n ɓai nyi.
15Fye kwu Fyilologwos ɓyigna ga mi, ɓədo n Juliyai, Narewus n əwo mapwii, n Olimpasii n Dagayi azai vnyanya n ɓa kwnusnu lo n ɓai.
16Fye ɓyi aje gna n ɓwadodna gyigyiyii.
Ikilisiya vnyanya Kirisiti nya ɓa tnu lo n əɓa gnaɓyii.
17Mi gyi fye əwye, əmi azaje n amapwuyii, nge fye kwu aza yi kawye n ɓa ɓe n ajegnai jesnu ɓai zhi aɓo n fye ɓa cebwonyi n əfya azokwo; n ɓa shnado shnashnai lo n nyawui n fye kwu kwo tumwi nyi. Fye la taya n ɓai. 18Ntuge aza yi pya ta zhni əyi Dagayi Kirisiti tnutnu nu m, ama əɓahni ashakpe nya. N əɓa ɓəda dadayii n cici gyifyi nyai, ɓa dna aza kwoce n əɓa abwugba to fyiakala m. 19Zahozahoyi ń kwu əfye ɓəgbetuvyi ɓo wo, ntulonu mi nya agbmada lo ntu əfye ɓo; ama mi ncei pmalo fyaa ce ntu əɓo ɓo n kwo bmya, jesnu fya kwu zhni atnaɓətuyi ń ɓənukwoi ɓo.
20Əsa taa mwa m, Shekwoyi bwugbafu nya ɓa vyì Shetam ya zhi n əfye apita snuta.
Shebmyashi Dagayi Yeisu nya kwo kwnusnu n fyei.
21Timwoti, əmi tnutnu kwnuzhniyi, wo tnu fye lo n əwo gnaɓyii, n ɓwasnu she Lushos, Jason n Sosipatai ɓyi fye əgna lo nyi, əmi Ayahudiyi aje.
22Əmi, Tashos, n əmi nu naa ka paka ye nyi, mi ɓyi fye əgna lo dna ń Dagayi.
23Gayus, əza ń əmi n ikilisiyai vnyanya wo əwo azhiɓeyi gwogwo agbmada lo nyi, wo tnu fye gnaɓyi lo.
Irasitus, ń əwo nu zhni əzhiyaakwo aza bəgyé tnutnu ɓəfyednayi nyi, n əyi zadoi Kwatosu, ɓa tnu fye gnaɓyi lo.
[24Shebmyashi Yeisu Kirisiti nya kwo sase kwnusnu n fyei, əfye vnyanya. Aamyi.]
25Nsaiye, mi fyi fye n əza akwnu, n wo ɓa myi wa myi fye zhi, ngye she mi kwu da dna ń əmi nabagyi manai nyi, waazi n mi zhni ntu Yeisu Kirisiti ɓo, kwoi vyi ɓəwyegye asigyi nya, ń kwo ɓə ɓwushi aye bəgyé ń ɓa la duya nyi. 26Ama nsaiye a la kwo kpeyawu jesnu a kwu kwo wu Abyedo vnyanya dna ń sheɓəgwognada əpakashi; shi Shekwoyi nyalonyalo nya ɓə ga ɓa ɓəgbetu nyi, nabai abye vnyanya ɓa vyi əwo ɓəgbetu kwnunu, n ɓa fyilo n gaiciyaganunui nyi. 27Latu n cicii zhni Shekwoyi gbmanyi wyemwada nya nu, nyalonyalo nya dna n Yeisu Kirisiti! Aamyi.
Attualmente Selezionati:
Aromayi 16: GNB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.