Sefaniya 1
1
1Ashi ndo shisoweru sha Mtuwa Mlungu shashimwiziliti Sefaniya mwana gwa Kushi na Kushi kaweriti mwana gwa Gedaliya na Gedaliya kaweriti mwana gwa Amariya na Amariya kaweriti mwana gwa Hezekiya, shaka sha mfalumi Yosiya mwana gwa Amoni, mfalumi gwa Yuda.
Lishaka lya toza ya Mtuwa Mlungu
2Mtuwa Mlungu kalonga hagu, “Haniviyagamiziyi vintu vyoseri pasipanu.
3Wantu woseri na wankanyama na wampongu wa kuliyera na wasomba wa kubahali, vyoseri avi hanivyagamiziyi. Wakontola haniwagamiziyi nakamu, wantu haniwagamizi pasipanu.”
4Haniwakomangi wantu wa Yuda, Ntambu iraa na wenikaya woseri wa mji gwa Yerusalemu. Hanagamiziyi masigala goseri ga Baali kulawa isi ayi na kwahera yakalihola kayi litawu lya watambika wawu. 5Haniwagamiziyi woseri yawakwena kushitwiku na kuguwira lishonta lya kumpindi. Haniwagamiziya walii yawanguwira na kulilapa kwa litawu lya neni viraa na kwa litawu lya mlungu Milikomu. 6Haniwagamiziyi woseri yawandekiti neni Mtuwa Mlungu, woseri yawalekiti kunsakula na kunkosiya shakutenda.
7Mnyamaliri kulongolu kwakuyi Mtuwa Mlungu, toziya lishaka lya Mtuwa Mlungu lya pakwegera. Mana Mtuwa Mlungu katanda kala tambiku, kawatakasiya wahenga wakuyi. 8Shaka shilii Mlungu pakawatenda wankontu wakuwi wawalagi wantu wakuyi, Haniwakomangi walonguziya wa wantu awa pamuhera na wana wa mfalumi na woseri yawatenda gambira wantu yawamnanandiri Mlungu. 9Mlishaka ali haniwakomangi woseri. Yawaguwira gambira wantu yawamwamini ndiri Mlungu, yawamemiziya numba ya mtuwa gwawu vintu vya kwiwa na kupoka. 10“Neni Mtuwa Mlungu ntakula hangu, lishaka ali hakupikiniliki kulira kulawa Ligomi lya Somba na wadaya kulawa mtaa gwa pili na mliru mkulu kulawa kulugongu.” 11Mdayi mwenga yamlikala kusoku! Washuwuzi woseri wagamira, woseri yawashuwuza mpiya walaguwa.
12Mulishaka ali hantoli shimulimuli na kugulolalola mji gwa Yerusalemu, shakapanu haniwakomanga walii yawakala pota lyoga, yawalonga mumiyoyu mwawu. Mtuwa Mlungu hapeni katendi shintu shoseri shiherepa ama shidoda. 13Ulunda wawu hawutolwi na numba zawu hazibomolwi Hawalinyawiri numba ila hapeni walikali amu. Hawayali mizabibu ila hapeni walandi divayi yakuyi.
14Lishaka lilii likulu lya Mtuwa Mlungu lyapakwegera, lyapakwegera na lyakwiza kalongola. Liziwu lya lishaka lya Mtuwa Mlungu haliweri kutama, mgangamala hakaliri viraa kwa kubotanga. 15Lishaka alii aliweri lishaka lya maya, lishaka lya uhushu na utama, lishaka lya uhalibisiya na mahagamiziya, lishaka lya luwundi na luwindu totolu. 16Lishaka ali alipikaniki lizuwi lya lipenka lya nkondu, kwa miji yana liboma na shibambaza shitali.
17Na neni haniwajegeri uhushu mkulu na womberi hawatyangityangi gambira wanalwisi. “Kaniti mwazi gwawu gambira mashi na nshimba zawu haziwoleri pasipanu.
18Feza yawu ama zahabu yawu hapeni iwalopori, mulishaka ali lya ngalaliru ya Mtuwa Mlungu. Hakasulusiyi motu na kupalunguziya pasipanu poseri. Mana hakajegi upeleru wa woseri yawalikala.”
The Bible version in the Pogoro Language. @The Word for The World International and Pogoro Language translation. All rights reserved.