Zakaliya 7
7
Mtuwa Mlungu kankupangira kwoya kuliya kwa mpayu
1Mushinja sha msheshi sha ukolamlima wa mfalumi Dariu, Mtuwa Mlungu kayoweriti na Zekariya mulishaka lya msheshi lya mwezi gwa tisa, yagushemwa na kwa shibrania Kisleu.
2Wantu wa mji gwa Beteri waweriti wawalagalira Sharesa na Regemu Meleki pamuhera na wantu wawu kumluwa Mtuwa Mlungu kawatekeleri, 3“Na kuwakosiya watambika wa Numba ya Mlungu gwa mashonta na wambuyi likosiwu ali, hashi twendeleyi kudaya na kwoya kuliya mumwezi gwa mhanu ntambu yatutenditi kwa vinja vivuwa vinu?”
4Mtuwa Mlungu gwa mashonta kayoweriti pakalonga, 5“Guwagambiri wantu woseri wa isi na watambika, kwa vinja sabini yavipititi, mwenga muweriti moya kuliya na kudaya mumwezi gwa mhanu na gwa saba, moyiti kuliya kwajili yaneni?” 6Na pamliyiti na kulanda, mlanditindiri kwajili yenu maweni?
7Avi ndo visoweru vya Mtuwa Mlungu vyakatakuliti kupitira wambuyi wakuyi yawalongoleriti, shaka mji gwa Yerusalemu pamuhera na miji payiweriti yahera nkondu, shaka Negebu na Shefara pazikalitwi na wantu.
Kujimirandiri kujega kugenda muuhamisiwu
8Mtuwa Mlungu kayoweriti na neni Zekaria na kulonga. 9“Neni Mtuwa Mlungu yakana makakala ntakula. Mtozi ntambu yayifiruwa, muweri waheri na lusungu maweni gweka. 10Namumwonera mkenja ama mshiwa ama mhenga ama mhushu. Namuliholera madoda mumiyoyu mwenu maweni gweka.”
11“Kumbiti wantu walemiti kumpikanira na wang'alambuka na kudiwa makutu gawu su nawampikanira. 12Wayitenda miyoyu yawu kuwera ikamala gambira libuwi, nawiza kupikinira lagiru lyangu neni Mtuwa Mlungu yakana makakala goseri yanilimbweriti kwa Rohu gwangu kupitira wambuyi yawalongoleriti. Shakapanu neni Mtuwa Mlungu gwa mashonta niwakalaliti nentu. 13Toziya wampikinira ndiri pantakuliti nawa na neni hapeni niwankuli pawanduwa.” 14Haniwapalasiyiti kwa lyenga mumaisi goseri gawamaniti ndiri. Shakapanu isi yawu iweriti mahami, paweriti ndiri na muntu yoseri yakalikaliti amu, muisi yayiherepiti iweriti shiwala.
The Bible version in the Pogoro Language. @The Word for The World International and Pogoro Language translation. All rights reserved.