Zakaliya 1
1
Mlungu kankuwashema wantu wakuyi wamuwuyiri
1Mumwezi gwa nani gwa shinja sha pili sha ukolamlima wa mfalumi Dariu gwa Perisiya, Mtuwa Mlungu kayoweriti na Zekaliya mwana gwa Berekiya na mzukulu gwa Ido. 2Mtuwa Mlungu kalonga, “Nkalaziwa nentu na wazewi wenu. 3Su guwagambiri kuwera neni Mtuwa Mlungu gwa mashonta ntakula hangu, mumbuyiri neni na neni haniwawuyiri mwenga. 4Namuwera gambira wazewi wenu, weni wambuyi wawagambiriti walekani na makontola na matendu gawu madoda, kumbiti womberi wampikanira ndiri na wanjimira ndiri neni Mtuwa Mlungu. 5Wazewi wenu na wambuyi wenu hapeni walikali mashaka matali. 6Wazewi wenu wapatiti makomangu toziya ya kulema malagaliru gangu na lagiru zaniwapananiti kwa njira ya wantumintumi waneni wambuyi? Shaka ashi womberi woyiti vidoda na kutakula kuwera neni Mtuwa Mlungu gwa mashonta nfiriti kuwatenda kulawirana na matendu gawu, nakaka ayi ndo ntambu yanfiriti kuwatenda.”
Malola ga kwanja ga mkwena farasi
7Mulishaka lya ishirini na msheshi na mwezi gwa lirongu na limu, gweni mwezi yagushemwa Shebati na mu shinja sha pili sha ukolamlima wakuyi mfalumi Dariu, Mtuwa Mlungu kamgambiriti Zekariya mwana gwa Berekiya, mzukulu gwa Idu. 8Shaka sha pashiru nimwoniti ntumintumi gwa kumpindi gwa Mlungu kakwena farasi msheri. Ntumintumi ayu kaweriti kagoloka kusika pakatikati pa mitera ya mihadasi. Kumberi kwakuyi kuweriti na farasi wamonga washeri na washilivulivu na wafufu. 9Shakapanu nimkosiya, “Mtuwa, kuwera farasi awa wanamana gaa?”
Kanankula, “Hanikugambili mana ya farasi awa. 10Farasi awa ndo yawalagaliritwi na Mtuwa Mlungu kupakagula pasipanu.”
11Shakapanu farasi awa wamgambiriti ntumintumi ayu gwa Mtuwa Mlungu yakaweriti kagoloka pakatikati pa mitera ya mihadasi, “Tupalolalola pasipanu poseri na tupawona pana ponga.”
12Su ntumintumi gwa kumpindi ayu gwa Mtuwa Mlungu katakula, “Gwee Mtuwa Mlungu gwa mashonta, kwa shaka gaa hagwendeleyi kuwera na maya kwa mji gwa Yerusalemu na miji ya isi ya Yuda? Yeni guyikalalira kwa vinja sabini”
13Mtuwa Mlungu kampanana ntumintumi gwa kumpindi ayu lyankulu liherepa na lyana litumbiru. 14Shakapanu ntumintumi uli yakaweriti kankuyowera na neni pakalonga, “Gubweri shisoweru ashi. Sheni Mtuwa Mlungu yakana makakala goseri katakula. Wera na weya nentu kwajili ya mji gwa Yerusalemu na Sayuni. 15Kumbiti ngakalaziwa nentu maisi yagaliwona gana ponga. Weriti niwakalalira Waisraeli shididini, kumbiti maisi aga gawawongeleriti ntambiku. 16Su Mtuwa Mlungu katakula kuwera wantu wa mji gwa Yerusalemu kulanguziya lusungu na amu hanyawi numba yangu na unyawa wa syayi wa mji hawanji.”
17Ntumintumi gwa kumpindi ayu kang'ambira mbweri ulagilagi umonga, Mtuwa Mlungu gwa mashonta katakula hangu. Miji yaneni hayimemi kayi mpatiru. Neni Mtuwa Mlungu hanigukoli mawoku kayi mji gwa Sayuni, hanigusyaguli mji gwa Yerusalemu kuwera gwangu.
Malola ga magoli
18Shakapanu nola kumpindi na palongolu pangu palii mona magoli gamsheshi. 19Nimkosiyiti ntumintumi gwa kumpindi ulii yakayoweriti na neni, “Ashi ndo shishi?”
Yomberi kanankula, “Magoli aga gana mana kuwera ndo maisi galii yagana makakala yagawapalasiyi wantu waneni Yuda na Israeli na Yerusalemu.”
20Shakapanu Mtuwa Mlungu kanangaziya wapondashuma wamsheshi. 21Nkosiyiti, “Wantu awa wizakutenda shishi?”
Yomberi kanankula kuwera, “Wantu awa wiza kuwatiliziya na kugagamiziya maisi galii yagana makakala geni gayikomangiti isi ya Yuda na kuwapalasiya wantu wakuyi.”
The Bible version in the Pogoro Language. @The Word for The World International and Pogoro Language translation. All rights reserved.