Malaki 1
1
1Mtuwa Mlungu kampananiti ulagilagi Malaki su kawagambiri wantu wa Israeli.
Mtuwa Mlungu kankuwafira Waisraeli
2“Mtuwa Mlungu kalonga, niwafira mwenga.
Kumbiti mwenga wantu wa Israeli mkosiya, gwenga gutufira hashi?
Na Mtuwa Mlungu kankula, hashi, Esawu kawera ndiri mlongu gwakuyi Yakobu? Kumbiti neni nimfira Yakobu, 3nimkalalira Esawu na neni niyitenda migongu yakuyi kuwera mahami na uhala wakuyi niwapanana maminyi wa kushiwala.
4Wiwuka wa Edomu ulonga, tembera miji yawu ihalibisiwa, hatunyawi kayi mahami. Kumbiti hali ndo lya Mtuwa Mlungu Yakana Makakala Goseri lyakalongiti, waweza kunyawa, kumbiti hambomoli. Hawashemwi, isi kontola, wantu weni Mtuwa Mlungu kawakalalira mashaka goseri.
5Shakapanu mwenga pamuwona aga, hamvimani na kulonga, ukulu wa Mtuwa Mlungu usoka ata kunja kumbaka ya isi ya Israeli!
Mtuwa Mlungu kawakalipira watambika
6Mtuwa Mlungu yakana makakala goseri kankuwagambira hangu mwenga watambika yambeziya litawu lyakuyi, mwana kampanana ligoya tati gwakuyi na ntumintumi kampanana ligoya mtuwa gwakuyi. Payiwera neni ndo Tati gwenu, hashi mmpanana ndiri ligoya na mwenga mkosiya, twenga tukubeziya hashi? 7Mwankulaviya tambiku ya shiboga yashilemitwi pampindi pa shitalawanda sha mabuhi. Kumbiti mwenga mkosiya, tukulekera humba kwa ntambu gaa? Kwakutakula kuwera shitalawanda sha mabuhi sha Mtuwa Mlungu ndo sha kubeziwa. 8Pamundavalira tambiku ya nkanyama yakawona ndiri ama yakana shilema ama mlweri, hashi, awu ndo ukontola ndiri? Mkolamlima hakafiliziwi ama kukutendera gaherepa pagumpanana lifupu lya shigongolu handa ayu?
9Vinu mumluwi Mlungu kaweri na manemu kwatwenga. Kwa tambiku gambira azi kulawa mumawoku mwenu, hakanki? Kalonga Mtuwa Mlungu Yakana Makakala Goseri. 10Mtuwa Mlungu gwa Mashonta kalonga, mekaweri muntu yumu muwamu mwenu mweni mekatati migomi ya Numba Ya Mtuwa Mlungu su namwakiziya motu yagujimilika ndiri pashitalawanda sha mabuhi shaneni! Nfiliziwa ndiri na mwenga na hapeni njimili tambiku yoseri yamndavilira. 11Litawu lyaneni haliweri likulu muwamu mwa maisi, kwanjira kwagulawa mshenji ata kuzyeta kwakuyi. Kila pahala ubani na tambiku iherepa hayijegwi kwa litawu lyaneni, toziya litawu lyaneni haliweri likulu muwamu mwa maisi, kalonga Mtuwa Mlungu Yakana Makakala Goseri. 12Kumbiti mwankubeziya litawu lyangu kwa kulonga kuusu shitalawanda sha mabuhi sha Mtuwa Mlungu, shitulwa humba pamuhera na shiboga shakuyi. 13Mwenga mlonga tutoka kulaviya tambiku, mwenga mwankuyibeziya kwa mtiti, kalonga Mtuwa Mlungu Yakana Makakala Goseri. Shakapanu muwajega wankanyama yamuwapokiti na wankanyama yawawera vibyeketu ama walweri na kuwalaviya handa tambiku, hashi njimili tambiku azi kulawa kwa mwenga? Mtuwa Mlungu kalonga. 14Kapangirwa yakanzyanga kwa kulaviya nkanyama gwa shipalu yakajimilika ndiri mushipinga shakuyi na kumlaviya kwajili ya kumtendera Mlungu. Toziya neni ndo Mfalumi Mkulu na litawu lyaneni lifiluwa kutilwa muwamu mwa maisi, Kalonga Mtuwa Mlungu Yakana Makakala Goseri.”
The Bible version in the Pogoro Language. @The Word for The World International and Pogoro Language translation. All rights reserved.