Hoseya 7
7
1Kila pamfira kumponiziya Israeli, ukontola wa wantu wa Israeli ugubutulwa na matendu madoda ga Samaria galawira. Womberi waliyiwira weni gweka, wapanda numba na kwiwa na wawapoka wantu mumiji. 2Walihola ndiri ata padidini gambira neni ntambu yanigahola makontola gawu goseri. Vinu makontola gawu gawazyengeta. Toziya goseri gawatenditi gakulongolu kwaneni.
Ugalambuka muliboma
3Mtuwa Mlungu kalonga, wantu wankumpayira mfalumi na wapasi pakuyi kwa kutenda makontola. 4Matamata zawu ziwera gambira shiwiga sha shiyakiti motu, sheni mbanika kakwang'anira kwanjira pakukabanga ubumu mpaka libumunda palidumba. 5Mlishaka ali lya msambu gwa mfalumi, walonguziya awa waloweriti nentu. Mfalumi pamuhera na wantu wakuyi watenda mirandu ya shizigizigi. 6Maya gawu gaweriti handa motu gwa tanuri, gweni kulunguziya mpolimpoli pashiru poseri, kumbiti mandawira motu guwera handa mlipulipu.
7Woseri wawera na maya nentu ata wawalaga wakolamlima wawu. Wafalumi wawu woseri wahowa na kwahera yoseri yakanduwa utanga.
Israeli na maisi gamonga
8Israeli kawera gambira wantu wa maisi. Kawoneka kahera mana handa libumunda lyalipiya ndiri. 9Wahenga wakonga makakala gakuyi, kumbiti mweni kavimana ndiri, neziwu zimema kumtuwi gwakuyi, kumbiti mweni kavimana ndiri. 10Wantu wa Israeli wawera na mtiti nentu, na walema kumbuyira neni Mtuwa Mlungu, Mlungu gwawu, pota kunsakula kwa malawiru goseri aga. 11Israeli kawera handa ng'unda mzigizigi yakahera mahala, katepu ka Misri na katepu ka Ashuru kuluwa utanga. 12Pawagenda hanyaliki wavu wangu niwagomiziyi na haniwagusiyi pasi gambira mbongu gwa kulyera, haniwakomangi kwa ukontola wawu woseri yawatenditi.
13Hawashiwoni womberi toziya wandeka! Malaguwa hagawapati, mana wang'alambuka. Nfiliti kuwakombola, kumbiti wantakulira mpayu. 14Wandilira ndiri neni. Wankugalagata kwa mpayu pawadaya muvitanda vyawu, su mpikanili maluwa gawu ga viboga na divai, kumbiti wankali wankung'alambuka. 15Neni ndo niwafunditi na kuwagangamaziya, kumbiti vinu wankulihola makontola kwa neni. 16Wandekiti neni Mlungu na kuwaguwira wamlungu wa mpayu, vinu wawera wahera mana gambira upindi yawulegeyiti. Wakulu wawu hawahowi kwa ligumba lya wankondu wawu na wantu wa Misri hawawaseki.
The Bible version in the Pogoro Language. @The Word for The World International and Pogoro Language translation. All rights reserved.