Luke 17
17
1စီးမှါခ့်ခါ ကိုယ်တော်ကား ဟိန်တပယ့်တာတ်တေ "သမီဆတာတ်တေ အပြစ်တေအွန်စိန်းဘင်းအရာတေ ကလောင်းတုံန်းငှါမှာ။ အာနိမ်စာန်းငှေါဒီ သမီဆာတာတ်တေ အပြစ်အွန်စိန်းဒင် ငှေါဘင်းဆိတ်တာတ်ကား မာန်းဂလာအဘိုကြီးရား။ 2သမီတေ အပြစ်အွန်ဒင်ငှေါကူဘင်းအစား ကိုယ်ကတုတ်ယောက်ကိုယ် ရာတ်ဟာတ် စွပ်သော၊ လုံးကရှီတေ ဆိုင်းဟွတ်ပန်းနာ သမုဒ္ဒရာနောင်းဘေဝါးအက်နာန်ဘင်းကား ပိုသောမဲမှာ။ 3အမှာတွာတ် ဟနိမ်အွန်ဘင်းနာတေဒေ ဆတီးပဲပန်းအွန်။ ဟနိမ်အမူးနရှီတေ အပြစ်စားနူအွန်ပတ်ပန်းကာ ဟိန်တေ ဆုံးမသော။ ဟိန်နောင်တလူဘန်းကာ ဟိန်တေ ခွာမ်းလွှတ်သအီကြီး။ 4အန်ဘင်းဆိတ်ကား ရအာဘေ စစ်ပန်းထုတ်ကွန်း နာန်တေ အပြစ်အွန်စီးဘန်းနာ တောင်းပန်သဘန်းကာ ဟိန်တေ ခွာမ်းလွှတ်သအီသင့်သမှာ" ညယ်မိန့်သမှာ။ 5အန်တာတ်ကား တပယ့်တာတ်ကား "အလေဘင်း ယုံကြည်သဘင်းတေ ပိုသော တုံန်းစိန်းယုတ်" ညယ်လျှောက်တာန်သမှာ။ 6ကိုယ်တော်ရီးဒါး "ကန်စူတူနိမ်သတူစစ်ဆာနိမ် ယုံကြည်သဘင်းဆဲ အဘင်းပိုးစာကလွုန်တေ သကလာပ်ခက် ဟုတ်ပန်းနာ သမုဒ္ဒရာနောင်းဘေ တူစိန်းညယ် အမိန့်အီရာန်ဘန်းကား အန်ဘင်းကလွုန်ကား ဟနိမ်ငှေါဘင်းနာတေ နာခံသကူ 7နာန်အစေခံကား လပါးထွန်၊ သိုးပူဘင်းဟက် ဒီဟာန်းမှါခ့်ခါ နာန်ကား ဟိန်တေ 'ကြိုဆိုသမှာ၊ ကျေမ်းနောင်းပါဆာန်ဘန်း ယုတ်အီ' ညယ်ငှေါကလဲ ။ 8နာန်အန်နိမ် ငှေါကူဘင်းအစား 'ငါယုတ်တင် စားနူပြာန်သဘန်း ယုတ်စီးကွန်း ငါပိုက်ပေ ဒဲနင်း။ စီးမှားဆာ နာန်ယုတ်' ညယ်ငှေါကလား အချီနော်။ 9အစေခံတေကား ဟိန်အွန်ထိုက်သဘင်းနာတေ အွန်ဘင်းနာတေ ကျေးဇူးတာန်ထိုက်သောလဲ။ အထိုက်အတန်ထိုက်သဝါး။ 10ဟနိမ်ရီဒါး အာနိမ် ဟနိမ်တေ အွန်စိန်းယုတ်ပဲဘင်းနာတေဒေ အွန်စီးမှါခ့်ခါ 'အလေကား သာမန်အစေအပါးတေထှာဘန်း အွန်သင့်သဘင်းနာတေဒေ အွန်နီမှာ' ညယ်ငှေါကြီး" ညယ်မိန့်သမှာ။ 11စီးမှါခ့်ခါ ကိုယ်တော်ကား ဂျေရုဆလင်မြို့ဘင်းလမ်းဘေငှါဘင်း ဂါလိလဲယောက် ရှမာရိ နယ်စပ်တေ ဖြတ်သဘန်း လာန်ဘဲမှာ။ 12ထိန်ထိန်ငှါပါထုတ်မှါခ့်ခါ ကမာတုံန်းရောဂါ ငါနင်းဘင်း သမီဆာရှစ်နူကား ကိုယ်တော် မလှမ်းမကမ်းဘေ စပ်နင်းကြီးဘန်း ကြိုဆိုသကြီးဘန်းနာ 13ဆကလားဝါပ်ဆလာပ်တုံန်းယောက် "ကိုယ်တော်ယေရှု၊ အလေတေ စံယုတ်" ညယ်တောင်းပန်သကြီးမှာ။ 14ကိုယ်တော်ကား အန်တာတ်တေ ကတုံန်ဘန်း "ပုရောဟိတ်တာတ်ပေနာန်လာန်တေ လာန်ဘန်းကာရာန်" ညယ်မိန့်သမှာ။ အန်တာတ်လာန်နင်းမှါခ့်ခါ ရောဂါတေကား ကယာကြီးဆွန်နာန်မှာ။ 15အန်တာတ်နောင်းဟက် ဟော်ဝါကား ကမာတေ ကယာဆွန်နာန်ဘင်းနာတေ မိန်းရှာတ်ခါရာန်မှါခ့်ခါ ဘုရားဂုဏ်တော်တေ ဝါတ်ဆလာပ်တုံန်း ချီးမွမ်းသဘန်း ကိုယ်တော်ပါဒီဟာန်းမှာ။ 16စီးမှါခ့်ခါ အန်ဘင်းဆိတ်ကား ကိုယ်တော်တာပိုင်းဘေ ငွတ်ပန်း ဘုရားဂုဏ်တော်တေဒေ ချီးမွမ်းသမှာ။ အန်ဘင်းဆိတ်ကား ရှမာရိပြေဆား ထှာမှာ။ 17စီးမှါခ့်ခါ ကိုယ်တော်ကား "ကမာရောဂါကယာဘင်း သမီဆာရှစ်နူ အချီနော်။ ကျန်သဘင်းသမီဆာကောင်နူကား ဟာပေကား။ 18ဘုရားရှာန်ဘင်း ဘုန်းတော်တေ ချီးမွန်းသကူညယ် ဒီဟာန်းဘင်းဆိတ်ကား အန်ဘင်း သမီတိုင်းပြေဘင်း သမီဆာဟက်လွဲသဘန်း တခြားဟာဘင်းဆိတ်စဲ အဘိုဝါးရဲ" ညယ်စိန်ယူစီးဘန်း 19အန်ဘင်းရှမာရိပြေဆားတေ "နာန် ရဲပန်းလာန်စိတ်။ နာန်ငါတေယုံကြည်သဘင်းအတွာတ် နာန်တေ မဲစိန်းမှာ" ညယ်မိန့်သမှာ။ 20ဖာရိရှဲစယ်ယာတာတ်ရီးဒါး ကိုယ်တော်ယေရှုတေ "ရွှေမြို့တော်သာသနာတော်ကား ဟာ၌မှါခ့်ခါပေါ်ထွန်းသည်ကူးတေ" ညယ်စိန်ယူကြီးဘင်းအတွာတ် ကိုယ်တော်ကား "ဘုရားရှာန်သာသနာတော်ကား ဟနိမ်မိတ်ယောက်ကတုံန်ရန်ဘင်း အရာအချီရား။ 21အဘင်းအရပ်ပေယူ၊ အန်းဘင်းအရပ်ပေယူညယ် အငှေါရန်နား။ ဟမာန်တွာတ်ငှေါဘန်းတာတ်ငှေါ ဘုရားရှာန်ဘင်း သာသနာတော်ကား ဟနိမ်အဆေင်နောင်းဘေ ငှါနင်းဘင်းအတွာတ်ထှာမှာ" ညယ်မိန့်သမှာ။ 22ပန်းနူ ကိုယ်တော်ကား တပယ့်တာတ်တေ "ဟနိမ်ကား သမီဆာဆားတော်ငှါဘင်း မာန်းရာတ်တေနောင်းဟက် မာန်းရာတ်ရအာတေဆဲ ကတုံန်ကာတ်သည်ဒါး ကတုံန်လူကလားအချီရား။ 23သမီဆတေကား ဟနိမ်တေ "အန်ဘင်းအရပ်ပေယူ၊ အဘင်းအရပ်ပေယူ' ညယ် ငှေါဘန်းရီး အအွန်ကြီးဆာ။ 24သမီဆာဆားတော် ထုတ်ရီမှားမာန်းရာတ်ကား လျှပ်စီးလျက်သောဘန်း ဟမုခ်ဟူအာလုံးယားနိမ် အနားပယ်အာထုတ်ကွန်း ယားဘန်းနင်းကူ။ 25အန်နိမ်စါန်းငှေါဒီ အန်ဘင်းအချိန်အထုတ်ကျီ ဟိန်ကား အရာန် ဒုက္ခဝေဒနာတေဒေ ခံဒီထှာဘန်းနာ အဘင်းခေတ် သမီဆာတာတ်ဟက် ငြာမ်းပယ်သဘင်း ခံသထှာကူ။ 26နောဧလာတ်ထာတ်မှါခ့်ခါ ထှာရီနိမ် သမီဆာဆားတော် ကြွဒီမှါခ့်ခါရီး အာနိမ်ထှာရီကူ။ 27ဝဲလွောန်ဒီကဘန်းဟွန် နောဧကား ဆာန်းဖေါနောင်းဘေဆာန်ဘန်း နင်းဘင်းမာန်းရာတ်ထုတ်ကွန်း သမီဆာတာတ်ကား ယုတ်အန်၊ အူရာန်၊ မာန်းဂလာအွန်နာန် အွန်နေကျအတိုင်း နင်းနီဘင်းအတွာတ် ဝဲလွမ်းသဘင်းတေ ခံသထှာဘန်း အန်တာတ်ဆွန်ကွန်း ဖြတ်ဆီးသလားခံသထှာမှာ။ 28အန်ဘင်းအတိုင်း လောတလာတ်ထာတ်မှါခ့်ခါ သောဒုံမြို့ဘေနင်းဘင်းသမီဆာတာတ်ရီးဒါး ယုတ်ပန်းအူဘန်း၊ ဈေးတေမာ၊ ဈေးတေမီး၊ စုတ်ပန်း၊ စာဘင်းတေအွန်ဘန်းနင်းကြီးရီဘင်းအတွာတ် 29လောတပူလာန်ဘဲမားဟက် ဝါမ်တုံန်းတေကား ဟမုခ့်ဟက်အက်ပန်း မြို့နောင်းဘင်း သမီဆာတေဒေ ရှီးစိန်းရီမှာ။ 30သမီဆာဆားတော် ပေါ်သည်မှါခ့်ခါရီးဒါး အန်နိမ်ထှာကူ။ 31အန်ဘင်းမာန်းရာတ်ပေ ကျေမ်းဆနူးစောက်ပေငှါဘင်းဆိတ်ကား စားနူလာဒင် ကျေမ်းနောင်းပါ အဆပ်ကြီးဆာ။ လပါးကွာမ်းနောင်းဘေ ငှါနင်းဘင်းဆိတ်ရီး စားနူစားနာလာကူညယ် ကျေမ်းပါ အလာန်ဟာန်းဆာ။ 32လောတဘင်းအိတ်ကား ဟာနိမ်ထှာရီမှာငှေါဘင်းတေ ဆတီးလူကြီး။ 33ကိုယ်အဆာတ်တေ ကယ်တာန်သကူညယ် အွန်ဘင်းဆိတ်တာတ်ကား အဆာတ်တေဆုံးရှုံးသကြီးကူ။ ကိုယ်အဆာတ်တေ ဆုံးရှုံးခံသရန်ဘင်းဆိတ်တာတ်ကား အဆာတ်စားဘန်း ကျန်သကူ။ 34ဟနိမ်တေငါငှေါကူ။ အန်ဘင်းနာတ်ကျယ်ဘေ အေပ့်ဆေစ့်နောင်းဘေ အေ့နင်းဘင်း သမီဆာကလိန်းဟူးတေ ဟော်ဝါတေ ကော်ဘန်း တခြားဟော်ဝါတေ ချန်သပဘဲကူ။ 35အန်ထူနင်းဘင်းအီးရှီကလိန်းဟူးနောင်းဟက် ဟော်ဝါတေဆာ ကော်လားခံသထှာဘန်း ဟော်ဝါကား ကျန်သပဘဲကူ။ 36လပါးကွာမ်းဘေ သမီဆာကလိန်းဟူး ငှါဒီဒါး ဟော်ဝါကား ကော်လားခံသထှာဘန်း တခြားဟော်ဝါကား ကျန်သပဘဲကူ။ 37တပယ့်တော်တာတ်ကား "ကိုယ်တော်၊ ဟာဘင်းအရပ်ပေ အန်နိမ်ထှာကူတေ" ညယ်စိန်ယူမှာ။ ကိုယ်တော်ယေရှုကား "ကဘူးဘင်းနနူငှါလားဘေ လင်းတတာတ်ကား အမြဲငှါနင်းကြီးကူ" ညယ်မိန့်တော်မူသမှာ။
Attualmente Selezionati:
Luke 17: ktpv-rv
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
