Rōm 7
7
Inneina le han Ankhīna
1 #
Kui 1:16; 1Ko 1:10; Gal 3:15 Ūnāi ngāi, hiva hi dān āriat ngāi ranga chong kei ril. Mī angkhat pei chunga a damsūng chu dānin a chunga rui ei ril thei kēng tī hi riat u mak che mo? 2#1Ko 7:39Asik chu tangsā ādōn nupang a tangsā a damsūng chu dān sika a tangsā kōma ānkhit a ni. Tenchu a ruothar athī suo ten, a tangsā ruia dān ātā āzōk kēng a ni zei. 3#Lk 16:18Havan tin dēn han a tangsā a lā dama, tangsā atei a lāk ten ama chu mī'n uirē thō ei ti rang a ni. Tenchu a tangsā athī suo ten dān ātā āzōk a ni. Hatuka tangsā atei a va lākā'm ni sela mī'n uirē ti lāi nō ni.
4 #
Gal 2:19; Kol 1:22 Hasikhan ka ūnāi ngāi, thīna nātā a hong ānthuirēt Khristā a taksā zāra dān lampanga chu āthī suo nā ni u zei a. Hasikhan mi tā kēng nā ni u zei tī anga om u ro. Hantin han Pathian ranga marā dōn u ro. 5#Gal 5:24Taksa ningneina thuoia nā om lāi han koini ngāi na taksā angkhakhata hin āsia ningōlna tin rēng ei hong rāt a ni, thīna tenpei marā ānsuok ranga. Dān ei rātna taka āsia ningōlnā'm ei hong suok a ni. 6#2Ko 3:6Atun chu dān ātā āzōk suo kēng nā ni zei, anā khit ātā āthī suo kēng nā ni zei. Havan tin han machin lāia horop maruona ānziak ang ni lāi mak, tenchu Rathā Ānthianga athara Pathian dorbō a dom u rei.
Āsia lē Dān
7Hanle imo nei ti rang? Dān hi āsia mo? Ni pial mak. Dān om nō sela chu koiin āsia riat nō ning. Asik chu dānin, “Mī tā ningōl nō ro,” (Ant 20:17; Dān 5:21) ti nō sela chu, ningōlna hi riat nō ning. 8Tenchu āsia thōna hān hava chongpēk taka han mun a man a, āsia ningōlna tin rēng ka malunga ei hong lūt a ni. Asik chu dān a bui ten āsia thō rui um āthī a ni. 9Mānlāi han chu dān abuia ādam kā nī na, tenchu chongpēk a hong āsuok ātā chu āsia thōna chu ei hong dam rēt a ni. Tenchu koi chu āthī suo kēng kā ni zei. 10#Lev 18:5; Lk 10:26-28; Gal 3:12Damna apēk thei chongpēk ngēt ha koi ka ranga chu thīna kēng ei chang ti anlang phat a. 11#Aph 3:13Asik chu hintin hin a nī na, āsia thōnā'n chongpēk amanga mun a man a, ei na hong huong, hava le han ei hong that a ni. 12#Gal 3:21; 1Ti 1:8Hava sika han dān chu ānthiang, chongpēk um anthianga, hanūk chu hava ha ādik le āsa a ni.
13Hanōkten asa neinun ha ka ranga thīna mo ei chang a ni zei? Ni pial mak. Tenchu āsia thō chu āsia thō dēn kēng ei manlang theina ranga hava asa amanga han ka ranga thīna ei hong suok viak a ni. Hantin han āsia thō chu chongpēk amanga āsia thōna lama ei manlang riam a ni. 14#1Rē 21:20, 25; 2Rē 17:17; 1Ko 3:1Asik chu dān hi rathalam kēng ei rakōk ti nei riat a ni, tenchu koi chu taksa lama mi kā ni. Āsia thōna suoka ānzuor suo kēng kā ni zei. 15#Gal 5:17Asik chu kei thō hi kei riat chachak nōk a ni. Hanūk chu āthō rang kei zōt ha kei thō chachak nōk. Tenchu kei matīr ha kēng kei thō viak chachak. 16Tenchu kei zōt nōk ha ka thō chachak le dān chu asa kēng a tī na kei pom a ni. 17#Gal 5:24Atun hin koi ni lāi mak ung āthō, tenchu koia āom āsia ha kēng āthō a ni. 18Asik chu koi ka taksāna hin āsa neinun ītē om mak tī ka riat a. Asik chu koiin sin āsa thō rang ka zōtā'm ni sela sin āsa thōtheina lampui mu mak ung a. 19Sin āsa thō ranga kei zōt ha kei thō thei chachak nōk, tenchu sin āsia thō rang kei zōt nōk ha kei thō chachak. 20Atuna kei zōt nōk zāt kei thō chachak a hin koi ni lāi mak ung āthō chachak tenchu koia āom āsia ha kēng āthō chachak a ni zei.
21Hava sika han atun chu sin āsa āthō rang kā zōt tikle pei āsia chu ka kōma a hong āom len chachak ka riat a. 22#Sām 1:2; Efe 3:16Asik chu koi ka sūngrīl tataka Pathian dān chu kei phām a ni. 23#Gal 5:17; Zak 4:1; 1Pe 2:11Tenchu ka taksa ngāi angkhakhata hin omdān atei ka hong man rēt a. Hava ha koi ka malunga dān le hin āndui chian a ni. Hatuka ka taksā angkhakhata āsia a om dānin ei na khita ei na maruoi a ni. 24O, miring riangvāi kei ni hi! Hiva thīna taksā nātā tū mo a nā'n zōk thei rang? 25#2Ko 2:4Tenchu koini na Puma Isuo Khristā zāra Pathian kōma rāisānchong ka mantung thei a. Hasikhan koi chu ka sūngrīla Pathian dān kēng dorbō kei dom, tenchu ka taksāna chu āsia thōna dān kēng dorbō kei dom.
Bible in Ranglong, © Bibles International, the Bible society of Baptist Mid-Missions, 2024.