Be ya a Filibi 2
2
No zǝno chu engǝm a sen yishwa mo Kristi
1Asuswana abu nye nyi ara shwa a chu Kristi na, shwa e enyim hon bwebon nye ekǝ̀n, nye e ti e dgyan sojunye? Edgyan hon a ge dgyan anga, du nye nye ben tsuruku enggwam a sen? Ge du nye, nye no zǝno adgye ngge Engǝ́ mo Ehwya? Ge du nye, nye chadwa e sojunye evǝa nye e bwe mò esese e so? Ge du nye nye dwafǝ so? 2M bgó nye anga, nye e chadwa e so ngge tsuruku akan, nye e dgyan sojunye, nye e bwe so mochi ngge tsuruku akan, nye e no zǝno adgye e sojunye. Ano nye bwe enò, vǝtsen mam a mbo. 3Nye e bwe nye mò akan a tswa chu edgyanfim ngge fǝ́ esem ra. Nye e ngǝchu mo nye a sen, nye e ti be nobǝ efki abu be twafǝ̀ nye. 4Egwa egwa mo nye e nyi e kpwà ye tsuruku mbwe a chu mò a tsuruku mbwe dgyan anga ra, tea ge e ka shwa a chu mò a nwenjin ye efki dgyan anga.
5Zǝno enom mo nye e so ge e no abu ḿ mo Yeso Kristi,
6nwene bi adia ge no tén Ehwya ángá,
è ti ye ekanm esoso mbwe ngge
Ehwya abu mò a ga fu ti bwe
a jwa chu ye ángá ra.
7Tea ge twagwa chu ye
no abu mokukwa,
nè ti chu ye nga fí,
nè chadwa bè mbwa ye abu
be mbwa nobǝ anga.
8Atan a gè fi tú ara chu ye adi ekǝnjuju ángá,
gè ngǝchu a sen,
nè chadwa ge e fǝ,
èé ge e fǝ fǝ mo ekenfum
a chu eswafǝ.
9Enona, Ehwya è ti ye nyi etkyen
vǝ́ twafǝ̀ zǝn e cha ti ara ángá,
nè no ye ti hon nwone
e twafǝ̀ egwa egwa mo be ti,
10evǝa adi efom mo ti mo Yeso,
kenm, ekpanvǝ egwa egwa a hò a sen
a tswa be zǝn chá kpe ngge a sǝnsen
ngge a ta sǝnsen.
11Kǝnggwa nobǝ egwa egwa a jan
a vǝ mbwe a tswa efom mo be
nobǝ jan Yeso Kristi a Etsodwe,
na no Ehwya nwene e no
Ate je ángá edgwa.
Nye e no abu petila e nggazǝ anga
12No enona, be shushwa edgyan mam ya, abu nyè tse bwi fwa mam atan a m̀ no ngge nye ángá, ngge asuswana a m fwa m ngge nye ra, ge no ti ara chìchì nye e tse m. Nye e no e bwe be mò nwone a tú jan ega a Ehwya no ara nye na, no embombo. Nye e bwe enò a tswa etsentsen ngge emme ebum. 13Adia Ehwya a ende e bwe mochi anga a tsuruku mo nye, n du nye nye e dgyan be mò a ge dgyan be e bwe ángá. A ge ga ende nwene e no nye echakpo nye e ti e bwe be anga.
14Nye e bwe nye mò akan a tswa dwawi etom eno e ra efyan etwam e sojunye ra, 15evǝa ende akan a jan ye jan nye bwe ara mò esera ra, ngge nye e fwa nye ngge edan ra. Nya nga mbǝgya mo Ehwya ya e fwa be ngge edan ra, abu nye no anga a tswa mo be nobǝ mo zǝnchaje ena ya e bweshwa bwi mò n bwe ebgen anga. Ge no kenm nye e no engga mo be abu be ngǝkpe e nggazǝ anga. 16Nye e fu e seshi Fwa Esese ena e no be nobǝ nya e no a fwa efwam ángá, evǝa nò a Kristi a bwa ángá ma no ngge vǝtsen àywá jan mochi mam a m̀ bwe a engga mo nye ángá, è fwa ye kukwa ra. 17Tea be e jan be ti ngǝ mam nggwavǝ́ abu etinom mo mò engǝm a nye ti no Ehwya, e gwa anga a je a tswa shwa enyim mo nye a chu Ehwya tú anga efenm mo Ehwya a tswa tsuruku, ma fo etkwa ngge ma no a tswa vǝtsen tangge nye binbin. 18Enona, a nye gaten, nye e fo etkwa ngge nye e no a tswa vǝtsen ngge me.
Bulu è tson Timoti ngge Abaforiditu chí ken a zǝn be ya a Filibi
19M no ngge shwa enyim a chu Yeso jan adi esese mo Ehwya, a dgyen ye fon ra ma tson Timoti chí a bwa a zǝn nye, evǝa me e ben ekǝ̀n-ebonm atan a m fo etkyen mo nye anga. 20A Timoti kpwà ara, a shwa ekam mbwe ngge mam té mò akan a chu nye, ga ende e dgyan nye anga àywá. 21Adia egwa egwa ka kpwà mò e bwe a jwa ye ángá, fwa ye mò a Yeso Kristi dgyan anga ra. 22Tea nye yi jan Timoti è tú ara chu ye jan ge no ngge chaebi, adia a me ngge ge, jè du ara edgon a chu Fwa Esese hon abibi abu nwen ngge ate ye. 23Enona, atan a m ma yi ara mò a bwe ngge me ángá, ma tson ye a ken a zǝn nye kè akan. 24M yi a tsuruku mam jan a chu shwa enyim mam a chu Etsodwe, a dgyen ye fon ra, ma ken a zǝn nye gaten.
25Tea m nyi ara a tsuruku jan ge no kenm ma tson nwenjin m Abaforiditu, ya emmeken mam ngge ende a je ngǝ ekan abibi, ge e twabǝ ken a zǝn nye. Ga etsonchi mo nye nwene a nyè tson ye, ge e bwa e bwe m mò a m̀ dgyan anga efwe-echi mo nye ángá. 26M nda anga me e tson ye e twabǝ e bwa a zǝn nye adia ge dgyan ge e di binbin mo nye, ngge gè bgen tsuruku anga àywá adia nyè fo jan gè fo ye etkwa ra ángá. 27Eshwen, gè dwa modwa àywá nè no abu ga fǝ. Tea Ehwya è di ashi mbwe, fwa ye a ge tete ra, tea ngge me gaten. Ehwya è dgyan ye jan me e ben nya ebgen nwone e tu a bi a chu nwone a m̀ no ngge ge na ra. 28Enona, m maju anga me e tson ye e twabǝ e ken a zǝn nye, evǝa atan a nye di ye efwe, nya fo etkwa ngge me gaten ma no m a tswa tsuruku etsenm a chu nye àywá ra. 29Atan a ge bwangga ara, nye e di jan nye cha ye a tswa edgwa ngge vǝtsen abu nwenjin nye ya ekǝ̀n-etsǝ́m a chu Etsodwe. Be nobǝ yishwa ena, ge se be e no be edgwa e kǝn ara ángá, 30adia è dan shi nwofyan gá a fǝ ara a chu mochi mo Kristi. Gè ti chu ye no evǝa ge e bwe m mò a nyè bwe ti nye ra adia nyè dgyen ara zǝn ngge me ángá.
© 2024 Luke Initiative for Scripture Translation