Be ya a Afisa 2
2
Enom angǝ a tswa mo Kristi
1Adi ḿ mo nye, ekpe ekpe nyè no di ara abu be engǝfǝ adia nyè no be ya edan ngge be ya ebgen ebwem tea asuswana Ehwya no ara nye nya. 2Nyè no anga a tswa ebgen atan a nyè bwe be mò a be nobǝ mo zǝnchaje e bwe anga. Nyè ba be efǝ mo tì mo zǝnotì a tswa fyo a zǝkpe. A ge ga engǝ́ hon e dwatì no a chu be ya e tse be Ehwya ra ángá. 3Binbin mo je, jè no di ara a tswa be mò ebgen hon, jè no fí mo be mò ebgen a ekǝnjuju mo je è dgyan anga, ngge jè ba moedgyan mo nó ngge fwa ekam mo nó. A tswa zǝno mo je, jè bwebgen ara Ehwya nya, jè defǝ ara a Ehwya àa kǝn je ten, abu be nobǝ ya e dan ángá.
4Tea adia Ehwya è mbo ngge fǝedwam a chu je, nè dgyan je àywá, 5bi adia jè fǝ ara adi zǝno ebgen mo je, gè bwe je, je no angǝ abu gè bwe Kristi ángá. A a chu esese mo Ehwya kpwà ara a bè tivǝ́ ara nye ángá. 6Adi chaebi mo je a chu Kristi, Ehwya è kpu je nyi etkyen ngge Kristi, vǝ́ chu ngge Yeso Kristi a kpe, 7evǝa adi be ekǝn e nyabwa ángá, adi efka mo mò a Yeso Kristi è bwe ángá, ga tú je edgwa mo mò esese mbwe ngge ebwejwam mbwe a be mbwadi a ti be nó ngge mò akan ra ángá. 8Adia a chu esese mo Ehwya a bè tivǝ́ nye, adi efka mo chaebi mo nye a chu Yeso, fwa ye a chu mò akan a nye bwe ara ra, a edwe mo Ehwya, 9fwa ye a chu mochi a nye bwe ara ra, enona, nobǝ akan a sé ye fǝ́ ra. 10A je ja mochi mo bu mo Ehwya, gè mmò je a ge a tswa mo Yeso Kristi evǝa je e bwe mochi esese a Ehwya è bwenyi ara ekpe ekpe jan ja bwe ángá.
Be ya a Yahuda ngge be ya e fwa be ya a Yahuda ra, a mò akan a tswa Kristi
11Enona, nye e ka e ben abu nyè no ekpe ekpe ángá, adi embwam, nya be ya e fwa be ya a Yahuda ra, nyè fwa nye be nobǝ mo Ehwya ra. Be ya a Yahuda, ya è fǝ́ chu be jan, “Ja be ya bè tsen ara je tkyà” ángá, nè fǝ́ nye, be ya e fwa be ya a Yahuda ra, “ya a be chà tsen be be tkyà ra”. (Tkyà etsenm a mò a nobǝ akan bwe anga a ju nobǝ efki ngge bu ángá.) 12Nye e ka e ben jan atan enò mò akan è fǝn ye nye ngge Kristi ra. Nyè no be ya echan a Esǝrela, nyè fwa nye a engga mo be nobǝ a Ehwya è swa ara ángá ra, nyè fwa nye ngge mò a nya ben a tswa vǝ-esenm mo Ehwya a gè sen ngge be nobǝ mbwe ángá ra. Nyè no zǝno anga a tswa zǝnchaje ena kpwà ara, nyè fwa nye ngge shwa enyim a chu mò akan ra ngge nyè fwa nye ngge Ehwya ra. 13Tea asuswana adi shwa enyim mo nye a chu Yeso Kristi, a nye ya è no di ara adabonbon a zǝn mo Ehwya ángá, be kpu nye bwa ara tenten a zǝn ye adi efka mo fǝ mo Kristi.
14Adia Yeso Kristi e chu ye a ende è vǝ adgye bwa a engga mo je ya a Yahuda ngge be ya e fwa be ya a Yahuda ra. Gè bwe be ya a Yahuda ngge be ya e fwa be ya a Yahuda ra nga ara mò akan n bwedì ara mò è vǝ eze bwa a engga mo je ángá. 15Adi fǝ mbwe, Yeso Kristi è bwe dì ara binbin mo be edon mo be ya a Yahuda ngge binbin mo be mò a edon hon dgyan be e bwe ángá. Engà mo mò a ge bwe ángá, a enggwafǝnm mo be nobǝ fà hon, be e nga nobǝ efwe akan efka mo chaebi mo be a chu Yeso Kristi, evǝa be e no zǝno a tswa adgye e so. 16Adi efka mo fǝ mo Yeso Kristi a chu eswafǝ, gè kpentswa fwa mo be ngge Ehwya, be nga ekǝnjuju akan. Be efi fà ena, Yeso bwe be nga ara nobǝ akan. 17Kristi è bwa du nye edgon a chu Fwa Esese nwone è bwe be nobǝ be e no zǝno adgye e so, ya è no adabonbon a zǝn Ehwya ngge a zǝn be ya è no tenten ángá gaten. 18Adia adi efka mo Kristi, a je binbin je bwa a ti a zǝn Àtà hon a tswa Engǝ́ akan hon ena.
19Enona, a nye be ya e fwa nye be ya a Yahuda ra, nye fwa nye ya echan ngge be efi efki efwe ra. Sǝnsen hon no ḿ mo nye gaten, nye nga ara mò akan ngge be nobǝ mo Ehwya. Ate nye no akan. 20Nye no abu àtá hon a bè mbwe, be etsonchi ngge be efojan a fù mo àtá hon, Yeso Kristi e chu ye, a ten chìchì hon e fudnya àtá hon no ángá. 21Àtá hon binbin hwyafu no akan a chu Yeso, n cha vǝ́ etkyen vǝ́ nga ara àtá echanwenwen mo Etsodwe. 22Efwe a chu ye, a nye gaten be mbwe fǝn nye anga evǝa nye e nga zǝn nwone a Ehwya a no a tswa mo nó adi Engǝ́ mbwe ángá.
© 2024 Luke Initiative for Scripture Translation