2 Be ya a Tasalonika 1
1
Bulu bi be ya aduwa a tswa eten efifi a Tasalonika, fwa
1A me Bulu, m bá afketa chí ena a me, ken a zǝn nye be ya aduwa a Tasalonika, be ya e no ḿ mo Ehwya, Ate je ngge Yeso Kristi Etsodwe ángá.
A me, Sila ngge Timoti, je bi nye fwa anga.
2Esese ngge adgye mo Ate je Ehwya ngge Yeso Kristi Etsodwe je, e no ngge nye.
Bulu chwano Ehwya
3Be nwenjwa, ge se je e no e chwa e no Ehwya anga a chu nye, ngge ge no esese ge e no enò, adia chaebi mo nye no tubi anga àywá àywá. Edgyan a nye no ngge nó mo so ángá, no tubi anga àywá gaten. 4Eni a mò e bwe, a je e chu je, je séfǝ́ anga a chu fǝechim mo nye ngge chaebi a tswa binbin mo be embwadi ngge be ekan, a nye no anga a tswa mo be ángá.
Ehwya a kpèn be nobǝ kǝ́n nò a Yeso twabǝ a bwa ángá
5Binbin mo be mò ena tú anga jan kǝ́n ekpènm mo Ehwya no edefǝfǝ. A chu mo nó, ga ká nye jan nye kǝn ara a nye e kwa a tswa zǝnotì mbwe, a nye ngǝ ekan anga a chu mo nó ángá. 6Ehwya no ya ebitete. Ga tswa be ya e tswa nye ekan anga, ekan, 7tea ga bwe nye a nye ya e ngǝ ekan anga asuswana nye e ben tsuruku enggwam a sen, ngge je gaten. Mò ena a bwe atan a Ehwya a fi Yeso Etsodwe ngge be maleka echakpokpo mbwe chá kpe ángá. Ga bwa a tswafǝ̀ e gan dgyén anga evǝa ge e bwe e kpwakpo. 8Ga kǝn be ya e yi be ye ra n tse be Fwa Esese a chu Yeso Etsodwe ra, ten. 9Ba kǝn be ten ngge etkò etkom e no a fwa efwam ángá, ba cha be be dwa be e ken a zǝn a Etsodwe no anga ra. Ba di be egǝ̀n mbwe ra. 10Nò a ga bwa ángá, be nobǝ echanwenwen mbwe a no ye egǝ̀n. Ngge a zǝn binbin mo be ya e tsǝ́ekǝ̀n no a chu ye ángá, ga no mò ezǝzǝju. Mò hon sǝn a bin nye adia nyè tsǝ́ ara ekǝ̀n a chu fwa a jè jan nye ángá.
11Ngge a chu shwa ekam ena a tsuruku mo je, je no bgó bwi ebgo anga a chu nye jan Ehwya è ká nye jan nye defǝ ara a chu dwa a gè fǝ́ nye ángá. Jan adi efka mo echakpo mbwe, nye e bwe e ti be binbin mo be mò esese a nye dgyan nye e bwe ángá ngge binbin mo be mò e bwe anga adi efka mo chaebi mo nye ángá. 12Je bgó ebgo hon anga yishwa enò, evǝa ti mo Yeso Kristi Etsodwe mo je e ben egǝ̀n a chu zǝno enom mo nye ngge nye e ben egǝ̀n a tswa mbwe, adi efka mò esese mo Ehwya mo je ngge Yeso Kristi Etsodwe je.
© 2024 Luke Initiative for Scripture Translation