1 Be ya a Tasalonika 2
2
Mochi a Bulu è bwe a Tasalonika ángá
1Nye yi, be nwenjwa, jan ebwam mo je a zǝn nye, è bwe nye esese. 2Abu nyè yi ángá, jè ngǝ ekan ngge bè bwe je mo fǝ àywá a Filibi, tea adia Ehwya è bwejwa je anga, jè ben echakpo ti jan nye Fwa Esese bi adia jè tson chu ngge ese echakpokpo a bè twa ngge je ángá. 3Adi mò a je jan nye anga, fwa ye ḿ mo mò ebweshwam eno e ra tashwa esera ekam ra, efki ra, je e ngga e de nye. 4Tea je jan fwa anga abu be ndedon a Ehwya è cha ara dwa ngge be nè no ara be mochi mo edgon edum a chu Fwa Esese hon e bwa e no be nobǝ. Mò a je dgyan anga, fwa ye je e bwe mò a nobǝ fo etkwa mo nó ángá ra, tea mò a Ehwya hon nwene e mbwadi tsuruku mo je anga a fo etkwa mo nó a ge. 5Nye yise m̀ mo nye jan atan a jè bwa a zǝn ángá, jè bwa je ngge fwa etkwatkwa a kpevǝ mo je ra. Jè ngǝ̀ton je shwa ekam akan jan je e ben mò akan a zǝn nye ra. Ehwya a eyifwa mo je. 6Jè nda je anga jan be nobǝ be e tàn je ra, a nye, eno e ra, nobǝ efki.
Bi adia, abu be etsonchi mo Kristi, jè no ngge echakpo a jà a bgó ara nye, nye e no je mò a je nda anga, 7tea jè ngǝchu mo je a sen a tswa engga mo nye, abu ayi mbǝgya e no mbǝgya mme n dgon be anga. 8Ena, a abu je dgyan nye anga, jè dgyan kpwà je jan je e jan nye Fwa Esese a chu Ehwya tete ra, jè dgyan anga je e no nya mo je a chu nye gaten, adia nye nga ara be ya a je dgyan àywá ángá. 9Be nwenjwa m, me ka e ben nye. Nye yi abu jè bwe mochi àywá ángá. Jè bwe mochi ènò ngge etsǝ evǝa je e ben mò a ja de afwa ja fa ende akan mo nye abu jè jan nye Fwa Esese a chu Ehwya anga.
10Nya be eyifwa, Ehwya a eyifwa gaten a chu abu jè no zǝno mo je a engga mo nye be ya ekǝ̀n-etsǝ́m. Jè no zǝno echanwenwen, ebitete ngge jè fwa je ngge efya a ba tso je ra. 11Nye yi jan jè bwe egwa egwa mo nye mò abu àtà bwe bwi mbǝgya mbwe anga, 12jè tú nye mò e no esese, jè janbon nye ekǝ̀n gaten, ngge jè no jan bwi nye anga jan, nye e no yishwa zǝno nwone a Ehwya nwene è fǝ́ nye dwa nye shi a tswa zǝnotì ngge egǝ̀n mbwe, a fo etkwa mo nó ángá.
13A chu fwa ena, je no chwano bwi Ehwya anga, nyè kpo didi nye nya ra, adia atan a nyè cha ara fwa mo Ehwya a zǝn je ángá, nyè cha nye nó abu fwa mo nobǝ kpwà ara ra, tea gè no tén abu ge no ángá, fwa mo Ehwya, nwone e bwe mochi anga a tsuruku mo nye, a nye be ya e tsǝ́ ara ekǝ̀n ángá. 14Adi ḿ mo nye, be nwenjwa, nye nga ara be nobǝ ya e ba fukèn mo be nobǝ mo Ehwya, ya e tsǝ́ekǝ̀n no a chu Kristi Yeso a tswa sǝnsen mo Yahudiya ángá. Nyè ngǝ ekan a bu mo be nobǝ mo sǝnsen mo nye, enò gaten be ya aduwa hon è ngǝ ekan a bu mo be ya a Yahuda, 15ya è gu Yeso Etsodwe ngge be efojan, nè nyo je vǝ́ a je a tswa binbin mo be zǝn a jè ken evǝa je e du edgon ángá. Be bwe mò a Ehwya fo didi ye etkwa mo nó anga ra ngge be ze nobǝ binbin. 16Be tkyan be e fu e ndnya je, je e jan je be ya e fwa be ya a Yahuda ra fwa, afwa ba ben ega. Adi ebwem enò, be no nggwa mbo mombwamo a chu be anga nogwa nogwa ngge mò esera mo be, bwa no edefǝfǝ. Asuswana engo mo Ehwya bwa ara a chu be.
Bulu dgyan anga ge e ken a Tasalonika efwe
17Tea be nwenjwa, atan a bè fa je, je e kwaju ngge nye mo ekpengga nwofyan adi ekǝnjuju fwa ye adi engǝ́ ra ángá, jè tkyan tén etkyanm je e twabǝ e bwa a zǝn nye. 18Jè dgyan àywá je e ken a zǝn nye. A me Bulu, m̀ tkyan tén etkyanm, fwa ye kè akan ra, fwa ye kè fà ra, tea Shetan è fu ndnya je. 19A be ara, a je nyishwa mo je no a chu be? A be ara, a je fo etkwa anga a chu be? A be ara, ya e no engà mo mitere nwone a ja séfǝ́ a chu be atan a Yeso Etsodwe mo je twabǝ a bwa ángá? Fwa ye a nye ra? 20Adi ebi, nya be mò e bwe je, je séfǝ́ ngge etkwa a tsuruku mo je anga.
© 2024 Luke Initiative for Scripture Translation