Johani 14

Yesu, aye dikuñwa dyo ku thza kwa Tata

1Yesu ngou a wa amberire ci: “Mwa cithzekera mu micima thzenu. Mu tawe kwa Nyambi no ku tawa noku ku kwange kengeyo. 2Mu nthzio thza Tata mo tu di tupingwethzi totungi. Nga kadi kengeyo ne, ine nga ni na mi amberera ci naa thza ni ka mi roithsere ndau? 3Ou na ku thza no ku ka mi roithsera ndau, kenge na ku ka huka ku na mi shimba ci mu kekare nange oku ni di. 4Mu na dimuka dikuñwa edi di thza oku ni thza.”

5Tomasi wa mu tawire ci: “Fumu, ka tu dimuka oku thza, ngepi honi nga tu dimuka dikuñwa dyo ku thzako?”

6Yesu wa mu amberire ci: “Yame no dikuñwa, oshemwa no mwoyo. Kwithsa o ku keya kwa Tata shime ku pitera pa pange. 7Ngeci mu na ni dimuka shemwa, kenge mwa ku dimuka no Tata. Ku tunda thsino thsikati mu na mu dimuka no ku mu mona.”

8Filipu wa mu amberire ci: “Fumu, o tu monithse Tata, apo honi kenge tu rakwa.”

9Yesu wa tawire ci: “Na nikara nenu thsikati thsothsire, epo no pano tu di o shime ku ni dimuka, Filipu? Yomuhe oyu naa ni mono, naa mono Tata. Ngepi edi nga o amba ci: ‘O tu monithse Tata’? 10Ene ko tawire ci ame mwa Tata ni di no Tata mu mwange a di? Maywi aa ni mi ambera ka ni a ambire kokoro wange nothsinda, unone Tata oyu di mu mwange yodiyo oyu kwama ekwama yenthzi. 11Mu tawe ci ame mwa Tata ni di no Tata mu mwange a di. Ngeci kadi kengeyo, mu tawe mukaci keyi ekwama mu mona o ku ni kwama.

12“Naa mi tongwera yoshemwa ci yomuhe o ku tawa ku kwange naye kenge a ku kwama ekwama eyi ni kwama, mane kenge a ku kwama yoikuru kupita eyi, inene naa thza kwa Tata. 13Karo kenge na ku tenda yoihe eyi mwa ku romba mu dithzina dyange, ci Tata a piwe kutethzima mwa Mwana. 14Thsinu thsothsihe ethsi mwa ku romba mu dithzina dyange kenge na ku thsi tenda.

Thsikumbwethzo thso Mupepo Oukenu

15“Ngeci mwakwa ku ni shima, kenge mwa ku hengeka eraerera yange. 16Kenge na ku romba Tata ci a mi pe Mukwakukwathsa yumweya oyu mbo wikara nenu diyere, 17aye Mupepo o shemwa. Anu o kaye tumba a twethsa ku mu tambura, inene ka mu monine nji ku mu dimuka. Uno honi amwe mu na mu dimuka pakuninga ci ku kwenu a di karo kenge a kwikarerera ku kwenu. 18Ka na ku mi thsia eci athsiana, kenge na ku keya ku kwenu. 19Ku na thsiara thsikati thsothsipu pohuma anu o kaye ka ku ni mona karo. Unone amwe kenge mwa ku ni mona. Pakuninga ci naa yoya, namwe kengeyo kenge mwa ku yoya. 20Mwedyo diyuwa kenge mwa ku dimuka ci ame mwa Tata ni di, namwe mu mwange mu di, karo name mu mwenu ni di. 21Yomuhe o ku tambura eraerera yange no ku i hengeka, yodiyo wa ni shima. Karo o ku ni shima, Tata kenge a ku mu shima, karo name kenge na ku mu shima, karo kenge na ku cihokora ku kwenthzi.”

22Judasi (kadi Judasi Isikariota) wa mu amberire ci: “Fumu, ine eyi wa ku cihokwera ku kwetu pohuma kadi ku kaye kokahe?”

23Yesu wa mu tawire ci: “O ku ni shima yomuhe kenge a ku hengeka diywi dyange. Tata kenge a ku mu shima, karo Tata name kenge twa ku keya ku kwenthzi no ku na yoya nenthzi. 24O kukana ku ni shima ka a hengekire maywi ange. Aa maywi mu yuva ka a tundire ku kwange, unone aa tunda kwa Tata oyu naa ni tumu.

25“Eyi enu ni na i mi tongwera uno ni di nenu. 26Uno honi Mukwakukwathsa, aye Mupepo Oukenu, oyu a ku mi tumithsera Tata mu dithzina dyange, kenge a ku na mi rongithsa enu yoihe no ku na mi vurukithsa yoihe eyi na ni mi tongwera.

27“Naa mi thsiera thsiyaro, naa mi pa thsiyaro thsange. Ka ni mi pire eci edi a na panga anu o kaye. Mwekara no thsorokoto ku micima nji ku yapa. 28Na mu ni yuvu uya na ni mi ambera ci: ‘Naa thza, karo kenge na ku ka huka ku kwenu.’ Nga mwakwa ku ni shima yoshemwa, kenge nga mu nyanyuka ku yuva ci naa thza kwa Tata, inene aye po mukuru ku ni pita. 29Na ni i mi tongwera o ku i shime ku tendahara, ci ou ya ku tendahara mwa ku tawe.

30“Ka ni amba nenu thsikati thsothsire, inene muendithsi o kano kaye aa keya. Unone ka a di nokoro pa pange. 31Uno honi naa roera ku tenda eyi naa ni raerera Tata, ci kaye ka dimuke ci no mukwa ku shima Tata. Mu katuke, tu thze, tu tunde pano.”

Attualmente Selezionati:

Johani 14: mho

Evidenzia

Confronta

Copia