Génesis 35
35
Nukën ꞌIbu Diosan Jacob Betelnuxun upíokin sinánxuan bana
1Nukën ꞌIbu Diosan ka Jacob kakëxa:
“Ënuax kuantankëx kamina Betel kakë me anu tsóti kuanti ꞌain. Anuxun kamina min xukë́n Esaúmi rakuë́ti abákëbëa mimi mërá Dios a achúshi maxá maburukin anuxun ñuina xaroti ꞌaxuni kuanti ꞌain.”
2Ësakian kakëxun ka Jacobnën aín aintsikama kanan an ñu mëëxunkë unikama ꞌimainun an ñu ꞌaxunkë xanukamaribi kakëxa:
—Kamina mitsun bëtsi dioskama ami rabikëkama a ꞌë bëxunkanti ꞌain, bëanan kamina nashitankëxun mitsun chupa upíbu pañuti ꞌain. 3Ësokin katankëxun ka kakëxa bëríbi kananuna Betel menu kuanti ꞌain, kuantankëxun kananuna achúshi maxá maburukin ꞌatankëxun anuxun Nukën ꞌIbu Dios rabiti ꞌati ꞌain, an ka ꞌë ꞌatimakin sinaniabi ꞌakiankëxa, ꞌimainun ka ꞌë ꞌakinia uinu karana kuani anuabi. 4Ësokin kakëxun ka Jacob atun diosmabia ꞌarakakë akama ꞌimainun aín pabinu nankë ñu akama këñunbi bëtsi ñukamaribi ꞌinánkëxa, ꞌinánkëxun ka Jacobnën i chaiira encina kakë a tëmú maíankëxa, ax ka Siquem kakë ëma ꞌurama ꞌiakëxa.
5Uínsaran kara atux chikitia anun ka Diosan atu ꞌurama ꞌikë ëmakama ꞌitsaira rakuënun ꞌimiakëxa, usokëx rakuë́kin ka Jacob ꞌimainun aín bëchikëkama nuiama ꞌikën. 6Usai ka Jacob ꞌimainun abëa kuankë unikamax achúshi ëma Luz kakë ꞌikëbi Betel kakinribi anëkë anu bëbakëxa, ax ka Canaán kakë me anu ꞌiakëxa. 7Anu bëbatankëxun ka maxá bukurukin, ꞌatankëxun a me El-Betel kakin anëakëxa (Betel kikë ax ka Diosan xubu ki kikë ꞌikën) ax ka anuaxa aín xukënan ꞌakatsikiax ami sinánkëbë abákëbëa anuax Jacobmi Nukën ꞌIbu Dios mërá a me ꞌiakëxa. 8Anu atux bëbakë ꞌaínbi ka an Rebeca bërúankë xanu Débora kakë ax ñuakëxa; ñukë ka encina kakë i ꞌani tanain maíankëxa ax ka Betel ꞌurama ꞌiakëxa, usai anuax ꞌikë ka Jacobnën a me ¡anuax inkë kakin anëakëxa!
9Usai anuax Débora ñukë ꞌain ka Jacob amiribishi Padán-aram anuax utëkëankëxa, utëkënkëbë ka amiribishi ami mëratëkënkin Diosan upíokin sinánxuntëkëankëxa, 10sinánxunkin ka ësokin kakëxa:
“Mix kamina Jacob kakë bërí ꞌain,
ꞌaínbi kamina bërí usokin anëkë ꞌitima ꞌain;
usa ꞌain ka bërí min anë Israel kakë ꞌiti ꞌikën.” Usokin ka Diosan aín anë itsi nankin anëakëxa,
11anëkin ka ësokin kakëxa:
ꞌËx kana Dios kamabi kushiñuira a ꞌain;
usa ꞌain kamina bëchipati mebi tsitsirui ꞌuakamë ꞌëoi bukuti ꞌain,
min rëbúnkikamaribi ka bëtsi bëtsi ëma ꞌai aín ꞌapuñu ꞌapuñu bukuti ꞌikën.
12ꞌËn kana kamabi me ënë min xuta Abraham ꞌimainun min papa Isaac ꞌinánkën,
usa ꞌain kana mi ꞌinántankëxun
min rëbúnki kamaribi ꞌinánti ꞌain.
13Usai abë banatankëxun Jacob ëbiani ka Nukën ꞌIbu Dios anuax kuankëxa, 14kuankëbëtan ka achúshi maxá chaxkë́ bitankëxun nitsinkin ꞌunántiokin nankëxa, anuaxa Nukën ꞌIbu Diosbë banakë a menu; usakin ꞌatankëxun ka ënëx ka Dios ꞌaxunkë ꞌikë kixun xëni ꞌimainun uvas baka aribi ami anpënkakëxa, 15usakin ꞌatankëxun ka a me Betel kakin anëakëxa.
Raquel ñua ñuikë bana
16Usai anu ꞌitankëx ka Betelnuax kuankëxa; ꞌaínbi ka Efrata ꞌurapain ꞌaínbi Raquel tëmërai aín tuá bakë́ankëxa. 17Bakëni tëmëraia ka an bakëmikë xanun kakëxa: “Kamina rakuë́tima ꞌain bëbu tuá itsi kamina bakë́an usa ꞌain.” 18ꞌAínbi ka ñuti ꞌuramashi ꞌaish anuishi sënëni ashiti kushin uinkin aín tuá Ben-oní kakin anëakëxa, ꞌikëbi ka aín papan Benjamín kakin anëtëkëankëxa. 19Anuax kuaníbi ka Raquel ñuakëxa, ñukë ka anun Efratanu kuanti bai ꞌipítinu maíankëxa ax ka bërí Belén kakin anëkë ëma ꞌikën. 20Usakin anu mainxun ka Jacobnën achúshi maxá a iskin a sinánti anu ꞌunántiokin nankëxa, a maxá ka anua nan ꞌikë anua Raquel maían ꞌikë iskankëxa.
21Anuxun usakin ꞌabiani ka Israel amiribishi kuantëkëankëxa kuantankëx ka anuxun ñuina bërúantia ꞌakë achúshi torre Éder kakë a inubiani kuantankëx anu tsóti bërúakëxa. (Éder kikë ax ka anuxun ñuina bërúankë ki kikë bana ꞌikën.) 22Usai kuantankëx ka anu ꞌitsa baritia Israel tsóakëxa, usai anu tsókëbëbi ka achúshi nëtën Rubén anuax abë ꞌinuxun xanu bari kuankëxa kuanxunbi ka Bilhá mërax abë ꞌiakëxa, ax ka aín papa an ñu ꞌaxunkë xanu ꞌikëbi aín xanu ꞌiti raiokin bia ꞌiakëxa. Usai ꞌikë kuatankëx ka aín papa ꞌitsaira nishakëxa.
Jacobnën bakë bëchikëkama ꞌia bana
(1 Cr 2.1-2)
Jacobnën bëchikëkama ka ꞌiakëxa mapai rabë́ ꞌimainun rabë́. 23Jacobnën Líami bëchikëkama aín anë ka ꞌiakëxa Rubén ax ka apan ꞌiakëxa, Simeón, Leví, Judá, Isacar ꞌimainun Zabulón. 24ꞌImainun ka Raquelmia bëchikë ꞌiakëxa José ꞌimainun Benjamín. 25Usokin ꞌaxun ka aín xanu Raquel an ñu ꞌaxunkë xanu Bilhá amiribi bëchiakëxa aín anë ka ꞌiakëxa Dan ꞌimainun Neftalí. 26ꞌImainun ka an aín xanu Lía ñu ꞌaxunkë Zilpá amiribi bëchikë ax ka Gad ꞌimainun Aser kakë ꞌiakëxa; ënë kamax ka Jacobnën Padán-aram anuxun bëchikëx anuax bakë́an kama ꞌiakëxa.
Isaac ñua ñuikë bana
27Achúshi nëtën ka Jacob aín papa Isaac isi Mamré kakë ëma ꞌikëbia Arbá kakin anëanan Hebrón kakinribi anëkë anu kuankëxa. A menu ka Abraham ꞌimainun Isaac tsóakëxa. 28Usa ꞌain ka Isaac ciento ochenta baritia tsótankëx ñuakëxa. 29Usa ꞌaish ka Isaac uni ꞌikësabi kaniakëti xënira ꞌaish ñuakëxa, ñukiani ka aín chaitiokëkama ñua ꞌaísh anu bukukë abë ꞌi kuankëxa.
Attualmente Selezionati:
Génesis 35: cbrPB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 1978, 1995, 2008, 2022 Wycliffe Bible Translators, Inc. All rights reserved.
