मती 14

बतिसमा एमेयीग होड़ एहुनाराः गुजुः

(मरकूस 6:14-29; लूका 9:7-9)

1हनमेला गलील छतररीग हातपात होड़ हरदोस ईसू बदीरेय अयूमतेरा, 2अरू हाँय अनँयगरिकुःआ सेवकियाकू एचेरेय कतातेरा, “हाँय गोएगतो होड़कू अतेय जियाव रेमकिया हाँयग बतिसमा एमेयीग होड़ एहुना हवे। हनालगा हाँय बयाव जुवाः इयाःआ बुताकूने एचे उदुः अवेता।”

3मड़ंगरे हरदोस अनँयग वगात पिलिपूसरीग अइमी हेरोदियास अनँयग अइमीय बड़ाँवगोतेडीग। 4दो एहुना हरदोस एचेरेय कता ञवना, “अनम वगमरीग अइमी अअसूल नपाय कोवानेःआ।”#लेवी 18:16; लेवी 20:21 हनालगा हरदोस एहुना एचे साबवाडीगखन जेहेलरेय एचे सींगगोतेडीग। 5हरदोस एहुना ञेड गोएगगेय लगाय ओंगलेःआ। मनदो होड़कू, एहुना भगवानराः बड़रा कतायीग होड़ माःआनकू मनेवाया अते होड़कू बोरोवाडखन एहुना तोनोंग इया मेरेय एचेगडीग।

6दो हरदोस अनँयगराः जनम दिन मनाः लगा मुरुक होड़कूय राःतेरा। हनमेला हेरोदियासरीग बिटी जमा होड़कू मड़ंगरेय सूना अरू हरदोसे सून बहालगोतेडीग। 7दो हाँय बिटीते जबानवातिरिया, “आम ईंग एचेरे तोनोंगाःमे असेय दो हनानाः एनेमेवामतिंग।” 8हाँयग एंगात एराहोने ललकावतिरिया, हनालगा हाँयग एराहोन हरदोस एचेरेय कतातेरा, “ईंग लगा बतिसमा एमेयीग होड़ एहुनाराः बोः मीटोंग छिपीरे नननंडाम एचे अगूगोडवायिंग।” 9दो हना बड़रा अयूमतेडखन राजाराः जीव मुरुक हुडिंगयान। मनदो हाँय जुमावतो गुतियाकू मड़ंगरेय जबानतेरा हना जबान टड़ावगे लगा मेरेय चहाःआ अरूय हुकुमगोतेड, 10“हाँयग एहुनाराः बोः छिपीरे अगुगोडवायपे।” हनते सइना होड़कू जेहेलरेकू सेनेडा अरू एहुनाराः होटोःकू गेडगोतेड। 11एहुनाराः बोः छिपीरेकू अगूतेडखन हाँयग एराहोनकू एमेवातेरा अरू हाँय एंगात एचेरेय गोःयाड। 12तयोमरे एहुनारिकुःआ चेलाकू सेनेडखन हाँयराः मुरदा गोःतेडखनकू तीलगोतेड अरू सेनेकियानखन ईसूकू कता उदुःवातेरा।

ईसू पाँच हजार होड़कू जोम लगाय एमेतना

(मरकूस 6:30-44; लूका 9:10-17; एहुना 6:1-14)

13हना कता अयूमतेडखन ईसू डोंगारे देगनेनखन एकलाय दोहोन लगा हना ततेर अते एटाः रिंग-रोंग ततेर अगी तोराय। मनदो होड़कू नाःआ अयूमतेडखन सनाहर सहर हाँय तयोम तयोमकू ओतोंगयान। 14ईसू डोंगा अतेय उतरावनेन दो आँयग अगी मुरुक बगरा होड़कू वेगतोय ञेलतेडकूखने सोगावातेडकुःआ अरू बेमारीतेकू दोहोना हँकुःआ होड़कूय नपायतेरा।

15दो हना दिन सिंगाड़ मेला ईसूरिकुःआ बारहो चेलाकूतेन ईसू एचेरे सेनेकियानखनकू कताया, “अबू दो रिंग-रोंग ततेररे इदानबुःआ। नुँहू अंदरानतना। हनालगा नँकुःआ होड़कू नाःआ अते डीहकूनरे वारगोडकू, जेमहा नँकू अँननकू जोजोम लगाकू किजाय।”

16मनदो ईसू चेलाकूतेने कतावाड, “हँकू सेन लगा कोवान। अपे अँननपे नँकू जोम लगापे एमेवाकू।”

17दो हँकू कता कुदातेरा, “मनदो अले एचेरे पाँचगोटोंग रुटी अरू बारटोंग हकूकिन एकला इदा।”

18दो ईसू कतातेड, “मना ईंग एचेरेपे अगूय।” 19हनते हाँय हँकुःआ होड़कू बीररे दुड़ुः लगाय कतावाडकू। अरू पाँचटोंग रुटी अरू बारटोंग हकूकिन साबतेड अरू सेरमो अगी संगीलतेडखन भगवान एचेरेय अरजीतेरा। हनते हाँय हना रुटी डुंडीगगे घड़ीन चेलाकूतेन एचेरे होड़कू हटिंगवाकू लगाय एमेगोतेड अरू चेलाकू होड़कूकू हटिंगवातेरा। 20हँकू जमाकू जोमतेडखन दोंगेतुकू पेरेगयान अरू बनसावतो जोम जिनिसकून बारहगोटोंग दउड़ारेकू हलंग रेमतेरा। 21अरू हना दिन जोजोमकुःआ अइमीकू अरू लइंकू अड़ाःकेडखन मनारद मरदकू एकला अंदांज पाँच हजारकू दोहोना।

ईसू दनाः दाः चोटरेय सेना

(मरकूस 6:45-52; एहुना 6:15-21)

22ईसू हंडाकू दोहोना हँकुःआ होड़कू पइड़घावकू मेला चेलाकूतेन ओहेन डोंगारे देग लगाय कतावातेडकुःआ, जेमहा हँकू हाँयते मड़ंग हुडिंग समुंदर मार परोमकू पार जुवाः। 23हाँय होड़कू पइड़घावतेडखन अरजी लगा एकला पहाड़ चोटरेय देगयान। अयूब अंदरायान दो, हाँय हंडा एनेकलाय दोहोना।

24हनमेला चेलाकूतेन मुरुक सिकिसतारेकू परावयान। होय मुरुक सलाःआ अरू डोंगा हुडिंग समुंदरराः तनालारे दोहोना अरू लहरा तुकड़ाःआ। 25हुडिंग भिनसाररे ईसू हुडिंग समुंदर दनाः दाः सेरमोरे चेलाकूतेन एचेरेय सेने सोदोरयान। 26दो चेलाकूतेन ईसू दनाः दाः सेरमो अँकू अगी वेगतोकू ञेलतिरिया दो मुरुककू बोरोयान अरूकू कताया, अहाँ, नाँय दो भूत हवे, माःआन अरू बोतोरतेकू खिररीगोडा। 27मनदो ईसू ओहेन हँकू सुदाय बड़रानेन अरूय कतातेड, “डीड़गुःपे! ईंग हवे। अहापे बोर।”

28दो पतरस साल घड़ीन ईसू एचेरेय कतातेरा, “परबू, आम हवे दो ईंग आम एचेरे दाः सेरमो सेने सोदोर जुवाः लगाम कताय।”

29दो ईसू कतातेड, “दबूमे।”

दो पतरस डोंगा अते उतरावनेनखन ईसू अगी सुदरुः लगा दाःरेय सेना। 30मनदो हाँय होय मुरुक सलाःआ हना ञेलतेडखने बोरोयान अरू दाःरेय बुडाःआ। हनमेला हाँय खिररीःआ, ने परबू, ईंग बनसवगिंगमे, माःआन।

31दो ईसू ओहेन अनँयग तिःई लंबावतेडखन पतरसे साब टेकावतिरिया अरू हाँये कतावाड, “ने गुनमिन बिसवास होड़, चिला माःआनमे ओंगोलगोतेरा?”

32डोंगारेकिन देगयान हना तयोमरे होय रोंकावयान। 33नाःआ अते डोंगारेकू दोहोना हँकुःआ चेलाकू उकुड़ोमनेनखन ईसू एचेरेकू कताया, “सनातायरे अनम हवे भगवानरीग बेटा।”

ईसू गेनेसेरेत छतररे बेमरियाकूय नपायतेरा

(मरकूस 6:53-56)

34ईसू अरू चेलाकूतेन हुडिंग समुंदर अते मार परोमरे उतरावनेनखन गेनेसेरेत छतररेकू सोदोरनेना। 35दो हंडाकुःआ होड़कू ईसू सिनहागोतेडीगकू अरू हँकू हना देसरिकुःआ जमा होड़कू एचेरेकू कता अटूड, ईसू अबूराः छतररेय वेगकिया, माःआन। अरू हँकुःआ होड़कू अँकूरिकुःआ जमा बेमरियाकू ईसू एचेरेकू अगू सोदोरतेडकुःआ। 36हँकुःआ होड़कू ईसू एचेरेकू गोड़न-पइयना, बेमरियाकू आमराः सोनहे असरा टोँवावगे लगाम एमेगोडवाकेकिकुःआ, माःआन। अरू हाँयराः सोनहे असरारेकू टोँवावतेरा हँकू जमाकू नपायबाःयान।

Attualmente Selezionati:

मती 14: kfp

Evidenzia

Confronta

Copia