मत्ति 20

अंगुरता बगिचातिगा रोजि केवालोरा पिटो

1स्वरगराज्यता बारेते लोकुरकुन समजेमायान साटि येसु इदाम असा उन्दि पिटो वेहतुर, “स्वरग राज्य आपुना अंगुरता बगिचातिगा बुतो कियाला बुतो केवालोरकुन केयान साटि हतोर लोन मालकान लेहका मन्ता। 2ओर बुतो केवालोरकुन उन्दि दियाता रोजि ठहरे किस आपुना अंगुरता बगिचातिगा ओर बुतो कियान साटि लोहतुर। 3नोव नेकाना हेरे लोनमालकाल असा लोताल पसियतुर अनि हुचुलोर लोकुरक हाटुमतिगा बोदे बुतो हिलेर आस बेकारे नितितोर इन्जोर ओर हुळतुर। 4असके ओरकुन ‘निमाट वने अंगुरता बगिचातिगा हन्ट, मिकुन उन्दि दियाता योग्य मन्ता रोजि नना मिकुन हियाका’ इन्जोर इतुर; आकरिते ओरक वने बगिचातिगा बुतो कियाला हतुर। 5पजा ओर दुपाडा बारा अनि मून्ड नेकाना हेरे पसियस अदामे कितुर। 6सयुंग नेकाना हेरे ओर असा पसियस हाटुमतिगा दुसरो लोकुरकुन नितितोर हुळतुर अनि ओरकुन, ‘निमाट इगा दियामेन्ड बेकारते बाक्या नितितोरिट?’ इन्जोर पुच्चेमातुर। 7ओरक ओन ‘माकुन बोरे रोजिते केयोर’ इन्जोर ओर उत्तर हितुर। असके मालकाल ओरकुन ‘निमाट वने अंगुरता बगिचातिगा हन्ट’ इन्जोर इतुर।”

8“नुलपेहबेरा अंगुरता बगिचातोर मालकाल आपुनोर हिसाब इरवालिन इतुर, ‘बुतो केवाल लोकुरकुन केयस परकेडाल वातोर अनि पहले वातोरवनाह ओरकुन रोजि हिसिम’ इन्जोर इतुर#लेव्य १९:१३; व्यव २४:१५। 9अदामे सयुंग नेकतपा अंगुरता बगिचातिगा हतोरक बुतो केवालोरकुन उन्दि दियाता योग्य रोजि पुटतु। 10मुने वातुर ओरक माकुन वले डबुंग पुटानुंग इदाम विचार कितुरक मति ओरकुन वने केवल उन्दि दियाता योग्य रोजि पुटतु। 11ओद डबुंग येचुन ओरक मालकाना विरुद बळबळेमासोर इन्दिला लागतुरक, 12‘येर परकेडाल वातोर केवल उन्दिय घंटा बुतो कितुर ते वने निमा ओरकुन पोळदमेन्ड कासता अदिते तकलिप आस बुतो कितोम मावा बराबर उन्दि दियाता रोजि हिति’ इन्जोर इतुर। 13मालकाल ओरागडाल वरोन इतुर, ‘हे गोतियाल, नना निया पोरो बाराय अन्याय केवोन। बाताल निमाय नावाकेडाल उन्दि दियाता योग्य रोजिते बुतो कियाना ठहरे केवि आस मन्दि? 14निया रोजि बचोन मन्ता अदेन येता अनि हन; निकुन बचोन हियाका अचोने येर परकेडाल वातोर ओरकुन वने हियाका इदाम नावा इच्चा मन्ता। 15आपुना चिजतुन नावा इच्चा लेहका नना कियाका इन्जोर बाताल इद उचित हिले? नना बाताले हियान साटि हजोर मन मन्ता इन्जोर बाताल निमा नावा हेवा किन्तोन बहे?’ 16इदामे परकेडोर ओर मुने आयनुर अनि मुने मन्तोर ओर परके आयनुर#मत्ति १९:३०; मर १०:३१; लूका १३:३० ।”

येसु हासुन असा जिवेमास तेदानाता बारेते असा इन्तोर

(मर १०:३२-३४; लूका १८:३१-३४)

17येसु येरुसलेम हन्दानपा बारा चेलाह लोकुरकुन आपुनासंग ओतुर, ओनासंग चेला लोकुरकुन तासिस बोरे लोकुरक हिले आसि, अनि हरितिगा ओरकुन इन्दिला लागतुर, 18“हुळाट, माक येरुसलेम हन्दिला आतोरोम अनि अगा नना मानेयतोर मरि मुक्य याजक लोकुरक अनि मूसाना नियमतुन करिहवालोरा कयदे पयपिहयानुर, अनि ओरक ओन हायाना योग्य ठहरे कियानुरक, 19अनि ओरक ओन यहुदि आयोर लोकुरा कयदे सोपे कियानुर अनि ओरक ओना मजाक कियानुरक अनि पकाय हाहानुरक अनि कुरुस पोरो अन्जहिस हव्कानुरक। मति ओर तिसरो दिया असा जिवेमास तेदानुर।”

उन्दि अवहारिना विनन्ति

(मर १०:३५-४५)

20असके जबदिनोर मरकना अवहारि, आपुना मरकनासंग येसुना हेरे वास नमस्कार किस आपुना पेकोरक साटि बाताले कियाला तलकिला लागतु। 21येसु अदेन, “निया साटि बाताल पहाजे?” इन्जोर पुच्चेमातुर। ओद येसुन इतु, “निमा राजाल आस राज कियाना बेरा नावोर येर इवुर मरक निया राज्यतिगा वरोर निया तिन्दान कयबासा, अनि वरोर निया डावान कयबासा उदिर इन्जोर वाचा हिम” इन्जोर इतुरक। 22येसु अदेन, “निमाट बाताल तलकिन्तोरिट इन्जोर निमाट पुनविट। नना सहेन कियाका ओद पकाय तकलिपतुन निमाट सहेन किया परकिट बहे?” इन्जोर पुच्चेमातुर। ओरक येसुन, “इंगो! माक सहेन किया परान्तोरोम” इन्जोर इतुरक। 23येसु ओरकुन “खरोय निमाट नावा पकाय तकलिपतुन सहेन कियाकिट, मति आपुना तिन्दान कयबासा अनि डावान कयबासा बोने उपहाना नावा बुतो आयो, मति नावोर बाबो बोना साटि तयार कितोर ओरकुनेय ओद पुटार” इन्जोर इतुर।

24इद केन्जुन पिसतोर दहाय चेला लोकुरक ओर इवुर तमोलोरकुन होंग कितुरक। 25मति येसु ओरकुन हेरे केयस इदाम इतुर, “यहुदि आयोर लोकुरा राजालोर ओरागा राज किन्तोर, अनि ओरा अदिकारि लोकुरक ओरागा अदिकार किन्तोरक इन्जोर निमाट पुन्तोरिट#लूका २२:२५-२६ । 26मति मियागा इदाम आयो आयार, मति बोरायि मियागडाल हजोर आयाना इच्चा किन्तोर ओर मिवोर सेवक बनेमायिर#मत्ति २३:११; मर ९:३५; लूका २२:२६, 27अनि मियागडाल मुक्याल आयाना इच्चा किन्तोर ओर मिवोर दास बने मायिर। 28नना मानेयतोर मरि नावा सेवा किहाना साटि आयो मति नना दुसरोना सेवा कियान साटि अनि पापता बन्दनते मतोरक पकाय लोकुरकुन लेहचियान साटि आपुना जिवा अदेना किमत आस हेविर इन्जोर वातान।”

येसु इवुर अन्दराहकुन सुदरेह किन्तोर

(मर १०:४६-५२; लूका १८:३५-४३)

29येसु अनि येसुना चेलालोकुरक यरिहोताल हन्जोर मतोरक असके लोकुरा पकाय भीळ ओना परके वातुरक। 30अगा हरदा ओदा इवुर अन्दराह उदस मतोरक, येसु इगाडाल हन्दिला आतोर इन्जोर ओरक केन्जतुरक असके, “हे प्रबु, दावुदनोर मरि, माकुन दया किम” इन्जोर जोरदे इन्दिला लागतुरक। 31कमेक मनिर इन्जोर लोकुरक ओरकुन रांगतुरक, मति ओरक असा जोरदे, “हे प्रबु, दावुदनोर मरि, माकुन दया किम” इन्जोर इतुरक। 32असके येसु अगाय नितितुर, ओरकुन केयतुर, “नना मिया साटि बाताल कियाका इन्जोर मिया इच्चा मन्ता?” इन्जोर पुच्चेमातुर। 33ओरक येसुन, “हे प्रबु, माक हुळिला पहाजे” इन्जोर इतुरक। 34येसुन ओरा पोरो दया वातु अनि ओरा कोन्डानुंग इटतुर असके सान्डेय ओरक हुळिला लागतुरक अनि ओरक ओना परके हतुरक।

Attualmente Selezionati:

मत्ति 20: fmu

Evidenzia

Confronta

Copia