युहनाल 18

येसुन पयसियाना

(मत्ति २६:४७-५६; मर १४:४३-५०; लूका २२:४७-५३)

1येसु प्रार्थना किसुन आपुना चेलालोरासंग किद्रोन डोडाता होद पकाड हतुर। अगा उन्दि जेयतुन मराता बगिचा मता। ओर अनि ओनोर चेलालोर अगा हतुरक। 2ओन पयसिवाल यहुदा वने ओद जागातुन पुन्दुर बाक्याकि येसु आपुनोर चेलालोरासंग बसकेय बसकेय अगा हन्दुर। 3अदाम यहुदा सयनिक लोकुरा उन्दि दलता संग अगा वातुर। मुक्याल याजक लोकुरक अनि परीसि लोकुरकनिकेडाल लोहतोर मन्दिरतुन केपवालोरक सिपायि लोकुरक वने ओनासंग मतोरक। चिवनि अनि मशाल अनि तलवार ओरा कयदे मता। 4असके येसु आपुनिगा बाताल आयवाल मन्ता इद सबोय पुन्जुन पसियतुर अनि ओरकुन पुच्चेमातुर, “निमाट बोन पळकान्तोरिट?” 5ओरक ओन उत्तर हितुर, “नसरतोर येसुन।” येसु ओरकुन इतुर, “ननाय आन्दान।” ओन पयसिवाल यहुदा वने ओरासंग मतोर। 6ओर “ननाय आन्दान”#निर ३:१६ इदाम इतपा ओरक परके गुच जागातिगा अरतुरक। 7असके ओर असा ओरकुन पुच्चेमातुर, “निमाट बोन पळकिला आतोरिट?” अनि ओरक “नासरितोर येसुन” इन्जोर असा इतुरक। 8येसु उत्तर हितुर, “ओर ननाय आन्दान इन्जोर नना ते मिकुन इतोना, नाकुन पळकिन्तोरिट ते येरकुन हन्दिला हिम्ट।” 9“बोर लोकुरकुन निमा नाकुन हिति अगडाल वरोन वने नना हरचिवोन” इन्जोर ओर इन्ज मतोर ओद पोल्लो पुरा आयान साटि इदाम आत। 10असके शमोन पतरस ओना तलवार डन्डतुर, अनि महा याजकना वरोर दासना कवितुन कदिस वाटतुर। ओर दासना पोरोय मलकुस मता। 11असके येसु पतरसिन इतुर, “तलवार अदेना काठिनिगा इरा। नना सहेमायिला पहाजे इन्जोर नावोर बाबो विचार किता ओद पकाय तकलिप नना सहेमायिला पहाजे#मत्ति २६:३९; मर १४:३६; लूका २२:४२ ।”

महायाजक हन्नाना मुने येसु

(मत्ति २६:५७-५८; मर १४:५३-५४; लूका २२:५४)

12असके सयनिक लोकुरक अनि ओनोर पोरोडोर अदिकारि अनि यहुदियातोर सिपायि लोकुरक येसुन पयस ओना कयकुन दोहतुरक। 13अनि पहले ओन महायाजक हन्नाना मुने ओतुरक बाक्याकि ओर ओद वरसातोर महायाजक कायिफानोर मामाल मतोर। 14मावोर लोकुरक साटि वरोर मानेयना हायाना सोबाय मन्ता इन्जोर यहुदि अदिकारिलोकुरकुन सल्ला हिस मतोर येर कायिफा मतोर#युह ११:४९,५० ।

शमोन पतरस येसुन पुनोन इन्तोर

(मत्ति २६:६९-७०; मर १४:६६-६८; लूका २२:५५-५७)

15येसुन ओयिला आस मतोरक असके शमोन पतरस अनि येसुनोर वरोर दुसरो चेलाल वने येसुना परके हतुरक येर चेलान महायाजक पुन्दुर इन्जोर ओर येसुनासंग महायाजकना डुवारवनाह हन्दा परतुर। 16मति पतरस बाहरोय रोमतुर असके महायाजक पुन्दुर ओर चेलाल बाहरो पसियतुर अनि टाडरा केपे दासिन वेहचुन पतरसिन लोपा ओतुर। 17असके ओद टाडरा केपे दासि पतरासिन, “निमा वने येर मानेयना चेलालोरा पयकि ते हिलवि?” इन्जोर इतु अनि ओर इतुर, “नना आयोन।” 18असके दास अनि मन्दिरतुन केपवालोरक वने पिनिता कारणते किस आरिला आस मतोरक अनि पतरस वने ओरासंग निच किस आरिन्दुर।

महायाजक येसुन पुच्चेमान्तोर

(मत्ति २६:६९-७०; मर १४:५५-६४; लूका २२:६६-७१)

19असके महायाजक#१८:१९ महायाजक हन्नाल मतोर येसुन ओना चेलालोकुरा अनि ओना करहानाता बारेते पुच्चेमान्तोर। 20येसु ओन इदाम उत्तर हितुर, “नना दुनियाता लोकुरकुन मकिहच पोल्लोंग वेहोन। अनि सबोय येहुदि लोकुरक जमा आन्तोरक ओद समाज मन्डिलितिगा, अनि येरुसलेम मन्दिरतिगा नना दरोज ओरकुन करिहतान। अनि बाताले नना मकिहच इनोन। 21निमा नाकुन बाक्या पुच्चेमान्तोन? नना ओरकुन बाताल वेहतान इन्जोर केन्जवालोरकुन पुच्चेमाम, हुळा नना बाताल बाताल इतान इन्जोर ओरक पुन्तोरक।” 22येसु इदाम इतुर असके, मन्दिरतुन केपवाल दासनिगडाल वरोर येसुना हेरे नितस मतोर, ओर येसुना कोरवितिगा पिटिहच “बाताल निमा महायाजकुन इदाम उत्तर हिन्तोन?” इन्जोर इतुर। 23येसु ओन इतुर, “नना बाताले गलति इतान ते इद गलतिता सबुत हिम मति बेस वेहतान ते नाकुन बाक्या पिटिहति?” 24असके हन्नाल ओन दोहच महायाजक कयपानिके लोहतुर।

पतरस दुसरो बेरा येसुन पुनोन इन्तोर

(मत्ति २६:७१-७५; मर १४:६९-७२; लूका २२:५८-६२)

25शमोन पतरस नितस किस आरिन्दुरक असके अगा नितितोर लोकुरकनिकेडाल हुचुलोरक, “बाताल निमा वने ओनोर चेलानिगाडाल आन्दि बहे?” इदाम ओन इतुर। “नना आयोन” इन्जोर ओर इन्कार किस इतुर। 26असके महायाजकनोर दासनिगडाल वरोर दास अगा मतोर, बोना कवितुन पतरस कदियस मतोर ओर ओनोर सोयराल मतोर। ओर पतरसिन इतुर, “बाताल नना निकुन ओनासंग बगिचातिगा हुळोन बहे?” 27अनि पतरस असा इन्कार कितुर, अनि सान्डे कोर कुसतु।

पिलातुसना मुने येसु

(मत्ति २७:१-२,११-१४; मर १५:१-५; लूका २३:१-५)

28असके ओरक येसुन कयपाना हेरेटाल रोमि देशता राजपाल पिलातुसनिके ओतुरक। असके सकारता बेरा मता, मति ओरक अशुद्ध आयवायि पसहा हनुमता जेवन कियान साटि ओरक पिलातुसना किल्ला#१८:२८ राजपालना मन्ताना लोन लोपा हनोरक। 29असके पिलातुस ओरा हेरे बाहरो वासुन पुच्चेमातुर, “निमाट येर मानेयनिगा बोद पोल्लोता दोष लावे किन्तोरिट?” 30अनि ओरक ओन उत्तर हितुरक, “येर मानेयनिगा बोदे गुन्हा हिले आस मनवारते माक ओन निया कयदे सोपे केवो आस मनेरोम।” 31अनि पिलातुस ओरकुन इतुर, “निमाट येन ओसुन आपुना नियमता अनुसार ओना न्याय किम्ट।” यहुदि अदिकारि लोकुरक ओन इतुर, “बोनाय जिवा येताना माकुन अदिकार हिले#१८:३१ रोमि अदिकारि लोकुरक यहुदि अदिकारिलोकुरकुन बोनाय हायानता दन्ड हियानाता अदिकार हेवोर आसि।।” 32अनि नावा हामुर इदाम आयार इन्जोर येसु मुनेटाले वळकसोर वातुर ओद पोल्लो पुरा आयान साटि इदाम आतु#युह ३:१४; युह १२:३२। 33असके पिलातुस असा किल्लाता लोपा हतुर अनि येसुन केयसुन ओन पुच्चेमातुर, “बाताल निमा यहुदियानोर राजाल आन्दि बहे?” 34अनि येसु उत्तर हितुर, “बाताल इद पोल्लो आपुने इन्तोन या दुसरो मानेय नावा बारेते निकुन इतोर?” 35अनि पिलातुस उत्तर हितुर, “बाताल नना यहुदि आन्दान? निया देशतोर लोकुरक अनि मुक्याल याजक लोकुरक निकुन मावा कयदे सोपेहकितोरक। निमा बाताल कितोन?” इन्जोर पुच्चेमातुर। 36अनि येसु उत्तर हितुर, “नावा राज्य इद दुनियाता आयो। मति नावा राज्य इद दुनियाता मन्वारते नाकुन यहुदि अदिकारि लोकुरा कयदे सोपेहकेवोर आस नावोर सिपायि लोकुरक लळायि किस मनेर। मति नावा राज्य इद दुनियाता आयो।” 37अनि पिलातुस ओन इतुर, “निमा राजा आन्दि बहे?” अनि येसु उत्तर हितुर, “नना राजाल आन्दान इन्जोर निमाय इन्तोन। खरोयता बारेते गवाहि हियान साटि नना इद दुनियाते जनमा येतितान अनि अदेन साटि दुनियातिगा वातान। बोरायि खरोयता हरिते ताकान्तोर ओर नावा पोल्लोंग केन्जान्तोर।”

येसुन हायाना दन्डता आग्या

(मत्ति २७:१५-३१; मर १५:६-२०; लूका २३:१३-२५)

38असके पिलातुस ओन इतुर, “खरोय बाताल मन्ता?” इदाम इन्जुन ओर असा यहुदि लोकुरा हेरे हतुर अनि ओरकुन इतुर, “नाकुन ते ओनागा बारायि दोष दिसो। 39मति मिया रितिता अनुसार नना पसहा हनुमते मिया साटि वरोर मानेयतुन कयदिताल तासिसोर वातोना इदेक मिया इच्चा बाताल मन्ता बाताल नना मिया साटि ‘यहुदियानोर राजान’ सोळेकियाका?” 40असके ओर लोकुरक असा जोरदे इतुरक, “येन आयो मति मावा साटि बराब्बानतुन सोळेकिम।” ओर बराब्बान वरोर ओन्डकाल मतोर।

Attualmente Selezionati:

युहनाल 18: fmu

Evidenzia

Copia

Confronta