Ciibalusyo 13
13
1“Kuti naa kwaba musinsimi nikuba uupandulula ziloto akati kanu waambilizya zyacitondezyo naa cigambya ciyoocitika, 2kwamana citondezyo naa cigambya eeco ncaakaamba cacitika ncobeni, kwamana wamulailila kuti mukombe baleza bambi, baleza mbomutazi mubabelekele, 3tamweelede kuswiilila musinsimi naa uupandulula ziloto ooyo pe. Mwabona boobo, muzibe kuti Mwami wanu nguumusunka kuti azibe naa mulamuyanda amyoyo yanu yoonse alimwi amyuuya yanu yoonse. 4Mwami Leza wanu alikke ngomweelede kutobela, alimwi ngomweelede kulemeka akukomba. Amubambe milawo yakwe, mumuswiilile. Walo alikke ngomweelede kubelekela akukakatila. 5Musinsimi naa uupandulula ziloto ooyo weelede kujaigwa, nkaambo waamba makani aakuzangila Mwami Leza wanu, wakamugwisya mu Ijipiti akumuvuna kuzwa munyika yabuzike. Ooyu wali kuyanda kumusowa kuzwa munzila Mwami Leza wanu njaakamulailila kuti mutobele. Mbombuboobu mbomweelede kugwisya bubi akati kanu.
6“Kuti naa mwanookwanu, naba mwanaako mulombe naa musimbi, naa mukaintu wako uuyandika, naa mweenzinyoko ngosyoma, wakoongelezya kuti mukakombe baleza bambi anguwe, baleza aabo nibaba basikale bako mbobatazi, 7baleza bamisyobo eeyo iimuzingulukide yaafwiifwi naa yakule, nikuba kuti nkuli nkobabede, 8utamuzuminini nikuba kumuswiilila pe. Utamweeteleli alimwi utamuleki nikuba kumuvuninina. 9Ajaigwe. Yebo nduwe weelede kusaanguna kumuuma bbwe, wamana yebo bantu boonse nobatimuume abalo. 10Mumujaye amabwe, nkaambo wali kuyanda kumusowa kuzwa munzila ya Mwami Leza wanu wakamugwisya munyika ya Ijipiti, mubuzike. 11Eelyo Baisilayeli boonse bamvwa, balayoowa, nkaako taakwe naba omwe uyoocita cintu cibi cili boobu alimwi pe.
12“Naa mwamvwa mamvwambukila muli umwi waminzi eeyo Mwami Leza wanu njayoomupa aakuti 13kuli bamwi banu boongelezya basimunzinyina kuti, ‘Bakakombe baleza bambi, baleza mbomutazi, 14muleelede kuvuntauzya akubuzya-buzya kabotu-kabotu mamvwambukila aayo.’ Lino kuti naa kwajanika kuti ngakasimpe, akuti cintu cili boobo caacitika ncobeni, muleelede kujaya bantu boonse bamumunzi ooyo apanga. 15Muleelede kunyonyoonena limwi bantu antoomwe azivubwa zyabo zyoonse. 16Lubono lwamumunzi ooyu loonse lulundikwe akati kalubuwa, mukatente munzi oonse antoomwe alubono lwawo loonse, cibe mbuli cipaizyo catentelwa Mwami Leza wanu. Munzi ooyo uyooba tongo kwalyoonse alyoonse, tuukayakululwi pe. 17Kutabi cintu niciba comwe cazeezyo zisinganyizidwe ncomweelede kubweza, mukuti Mwami Leza atakamunyemeni. Aawo Leza uyoomweengelela akumufwida luzyalo, alimwi uyoomuvuzya mbubonya mbuli mbwaakakonkezya kuli basikale banu, 18nkaambo kakuti mwaswiilila Mwami Leza wanu. Amubambe milawo yakwe eeyi njendimupa sunu, kamucita eezyo zimubotelezya lyoonse.
Attualmente Selezionati:
Ciibalusyo 13: Tonga96
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tonga Bible © United Bible Societies, 1994.