ɛMacu 1
1
ɛWee ne iRɛɛk ne iCwaang ɛYɛso
1iRɛɛk ninaa ne icwaang ɛYɛso ɛKiriti yɛdee bɛ; ɛYɛso ɛKiriti gha kaa so ɛNgɔn ɛDoda, ɛDoda gha ne so ɛNgɔn ɛBaraying.
2ɛBaraying nga ne so ɛkyɛɛ ɛShaaku.
ɛShaaku gha ne so ɛkyɛɛ ɛYakub.
ɛYakub pa ne so ɛkyɛɛ ɛYahoda gbik nɛ nigwaa ɛbhɛ.
3ɛYahoda gha ne so ɛkyɛɛ ɛPɛrɛs gbik ne ɛZɛra ne kaa i bok ɛgyinɛ nibhɛ ɛTaama.
ɛPɛrɛs sa ne so ɛkyɛɛ ɛHɛziron.
ɛHɛziron na ne so ɛkyɛɛ ɛRam.
4ɛRam ma ne so ɛkyɛɛ ɛMinadap.
ɛMinadap pa ne so ɛkyɛɛ ɛNashon.
ɛNashon na ne so ɛkyɛɛ ɛSalamon.
5ɛSalamon na ne so ɛkyɛɛ ɛBowas. Kaa ne i bok ɛgyinɛ ɛBowas sa ɛRahaba.
ɛBowas gha ne so ɛkyɛɛ ɛBadi. Kaa ne i bok ɛgyinɛ ɛBadi gha ɛRuut.
ɛBadi gha ne so ɛkyɛɛ ɛYɛsɛ.
6ɛYɛsɛ gha ne so ɛkyɛɛ ɛgɔm ɛDoda.
ɛDoda gha ne so ɛkyɛɛ ɛSɔlɔmɔn. ɛGyinɛ ɛSɔlɔmɔn na ka tsa ɛ soye ɛkuk ɛYuriya.
7ɛSɔlɔmɔn na ne so ɛkyɛɛ ɛRɛhobuwam.
ɛRɛhobuwam ma ne so ɛkyɛɛ ɛBija.
ɛBija gha ne so ɛkyɛɛ ɛSaf.
8ɛSaf gha ne so ɛkyɛɛ ɛYɛhoshɛfat.
ɛYɛhoshɛfat ta ne so ɛkyɛɛ ɛYɛhoram.
ɛYɛhoram ma ne so ɛkyɛɛ ɛWuziya.
9ɛWuziya gha ne so ɛkyɛɛ ɛYotam.
ɛYotam ma ne so ɛkyɛɛ ɛHas.
ɛHas sa ne so ɛkyɛɛ ɛHɛzɛkiya.
10ɛHɛzɛkiya gha ne so ɛkyɛɛ ɛManasɛ.
ɛManasɛ gha ne so ɛkyɛɛ ɛMon.
ɛMon na ne so ɛkyɛɛ ɛYosiya.
11ɛYosiya gha ne kaa ne yɛk ɛYɛkɔniya ye ne kaa ta i bok ɛbhɛ ɛYɛhoyakim gbik nɛ nigwaa ɛbhɛ, nten de ne kaa kpuusi niYahodawa na nɛ nibhɛ bhɛ tes se ne ikpuru ne ivel ne iBabila.
12Kaa sɛ ɛtsim mɛ ne kɛ kpuusi nibhɛ i phɛ nɛ ne ivel ne iBabila da,
ɛYɛkɔniya gha ne yɛk ɛShɛtiyɛl le,
ɛShɛtiyɛl la ne yɛk ɛZɛrubabɛl le.
13ɛZɛrubabɛl la ne yɛk ɛBiyut te,
ɛBiyut ta yɛk ne yɛk ɛLiyakyim me,
ɛLiyakyim ma ne yɛk ɛZot te.
14ɛZot ta ne yɛk ɛZadɔk ghe,
ɛZadɔk ka ne yɛk ɛKyim me,
ɛKyim ma ne yɛk ɛLiyut te.
15ɛLiyut ta ne yɛk ɛLiyaza ye,
ɛLiyaza gha ne yɛk ɛMatan ne,
ɛMatan na ne yɛk ɛYakub bhe.
16ɛYakub pa ne yɛk ɛYisifu ye,
ɛYisifu gha ne ɛ so ɛ̀ras ɛMɛri gha ne ɛbhɛ so ɛgyinɛ ɛYɛso gha ne i bok ɛbhɛ ɛKiriti gha.
17Kɛ lenɛ ne nten ɛBaraying ngge bhɛ hɔn nten ɛDoda de, izam-izam be ne so ɛnduwubɔ ne ihywɛ nywaas. Ne ta lenɛ ne nten ɛDoda de bhɛ hɔn nten de ne kaa kpuusi niYahodawa na nibhɛ bhɛ tes nikpuru ne ivel ne iBabila de, izam-izam be so ɛnduwubɔ ne ihywɛ nywaas. Ne ji lenɛ nten de ne kaa kpuusi niYahodawa na nibhɛ bhɛ tes en nikpuru na ne ivel ne iBabila de bhɛ hɔn nten ne yɛk ne ɛKiriti yede, izam-izam ne be so ɛnduwubɔ ne ihywɛ nywaas.
iYɛk ɛYɛso ɛKiriti
(ɛLuk 2.1-7)
18iBol ne iyɛk ɛYɛso ɛKiriti de kaa so ɛlɛ: ɛGyinɛ ɛbhɛ ɛMɛri gha kaa soye ɛyɛl ɛYisifu, ɛMɛri gha kaa ne tɔ tang hyili ne ɛ say isik lenɛ iKabyik ɛTaanggbey. 19ɛTɛm ɛbhɛ ɛYisifu gha kaa ne so ɛnyi ɛyɛnɛng, sɔng ne ɛ sim ɛli ne aa bak ɛbhɛ incwa ɛnu ɛyisɛ ninyi nang. Ne ɛ yaa tas ɛli ne aa tek ɛbhɛ gying.
20Kɛ ne sɛ ɛ so ndɔ ne icwas sɛda nggyɛ wo, ɛmalɛka ɛTaanggbey ne bhɛ wuru ɛbhɛ ndɔ nibok, ɛ yaak ɛbhɛ, “ɛYisifu ɛNgɔn ɛDoda, sɔng ɛ phok ɛnik ne bo ɛyɛl mo ɛMɛri yegha ɛ teye ɛkuk mo gha nang, daa ɛli ne isik ɛbhɛ de so idee ne iKabyik ɛTaanggbey. 21Aa ne yɛk ɛngɔn ɛras, ɛ sɛ ne yaak ɛngɔn nɛ ɛYɛso, daa ɛli ne ɛbhɛ sɛ phɔt ninyi ɛbhɛ na ndɔ ne ɛfɔt nibhɛ wo.” 22Gbik nikɔn nɛ naa wo ka tes so te sɛ shwaak ibol de ne ɛDaray ya kaa boote ɛnu ɛnɛbi gha ɛ yɔngɔ,
23“ɛNgɔn ɛlyilyap ɛjejep
sɛ say isik ɛ yɛk ɛngɔn ɛras,
sɛ ne yaak ɛbhɛ ɛYima,
kaabi i bo ɛTaanggbey sonɛ njwɛɛn.”
24Ne sɛ ɛYisifu gha kɛ seme, ne ɛ roos ibol de ne ɛmalɛka ɛDaray ya kɛ yɛk ɛbhɛ nɛ no, ne ɛbhɛ bo ɛMɛri yegha ɛ yɛɛsey yɛ, ɛ teye ɛkuk ɛbhɛ. 25Sɔng ne ɛ ra ne ɛMɛri gha nang, nibhɛ ku shɛɛ ɛlɛ wo ɛMɛri gha phyii yɛk ɛngɔn ɛras ɛbhɛ gha. Kɛ ne sɛ ɛ kɛ yɛk ko, ɛYisifu gha ne ji nang ɛbhɛ irywɛɛk ko ɛ yaak ɛbhɛ ɛYɛso.
Attualmente Selezionati:
ɛMacu 1: etxNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project