Romanos 9
9
Israel mayinkunapaq Pablo lakikushqan
1Pasaypa lakikushqätapis kanan wilashayki. Lakikushqätaqa Jesucristupis y Espíritu Santupis musyanmi. 2Israel mayïkunapaq pasaypami lakikü. Paykunapaq lakikuptïmi shonqu nanaypis tsariman. 3Israel mayïkuna Jesucristuman yärakur salvakunantami munä. Salvakunanpaq kaptinqa alimi kanman paykunapa trukan infiernuman qaykamaptinpis.
4Israel runakunataqa Tayta Dios akrarqan wamrankuna kananpaqmi.#Éxo. 4.22. Munayniyuq kashqantapis paykunatami musyatsirqan. Paykunawan pactuta rurarmi leyninkunatapis entregarqan. Imano adorananpaqpis yachatsirqanmi. Promitishqankunapis paykunapaqmi kaykan. 5Paykunaqa Abrahampita, Isaacpita y Jacobpita miraqkunami karkaykan. Jesucristupis Israel aylupitami yurirqan. ¡Payqa lapanpaq munayniyuq Diosmi kaykan! ¡Imayyaqpis alabashqa kaykulätsun! Amén.
Akrashqan kaqkunalata Tayta Dios salvashqan
6Jesucristuta Israel runakuna mana chaskikuptinpis ama yarpäshuntsu Tayta Dios promitirkur mana cumpliykashqanta. Manami lapan Israel runakunatsu Tayta Dios promitishqankunata chaskipäkunqa. 7Tsaynöpis manami lapantsu Abrahampita miraqkuna wamrankuna karkaykan. Abrahamtami Tayta Dios kayno nirqan: <<Qamta promitishqäqa tsuriki Isaacpaq y paypita miraqkunapaqmi kaykan>>.#Gén. 21.12.
8Tsayno niptin manami lapantsu Abrahampita miraqkuna Tayta Diospa wamrankuna kaykan, sinöqa promitishqanta chaskikunanpaq Tayta Dios akrashqan kaqkunalami.
9Abrahamta promitirmi Tayta Dios kayno nirqan: <<Watan kutimuptï olqu wawayuqnami Sara kaykanqa>>.#Gén. 18.10, 14.
10Tayta Dios nishqanno yuriq wamraqa unay ayluntsi Isaacmi karqan. Isaacwan Rebeca taptinmi wawan milïshu yurirqan. 11-12Manaraq yuriptinmi Rebecata Tayta Dios kayno nirqan: <<Punta yuriq kaqmi qepa yuriq kaqpa munaynincho kanqa>>.#Gén. 25.23.
Payta tsayno nirqan tsay milïshukuna alita y mana alita manaraq ruraptinmi. Manami alita rurashqanpitatsu Tayta Dios pitapis akran, sinöqa kikin munashqan kaqtami. 13Tayta Diospa palabranchöpis kaynömi qelqaraykan: <<Jacobtami kuyarqä y Esaútanami chikirqä>>.#Mal. 1.2-3.
14Tsayno karqa Tayta Dios ¿lutantatsuraq rurarqan? ¡Manami! 15Moiséstapis Tayta Dios kayno nirmi tantiyatsirqan: <<Kuyapashqä kaqta kuyapämi. Perdonayta munashqä kaqtaqa perdonämi>>.#Éxo. 33.19.
16Tsayno kaptinqa manami kikin runa munashqanpitatsu o imatapis alita rurashqanpitatsu Tayta Dios akran, sinöqa kuyapashqan kaqtami pitapis akran.
17Egiptupa mandaqnin Faraónpaqpis Tayta Diospa palabran kaynömi niykan: <<Maytsaychöpis taq runakuna munayniyuq kashqäta musyananpaqmi mandaq kanaykipaq qamta churashqä>>.#Éxo. 9.16.
18Tsaynömi Tayta Dios wakin runakunata kuyapan y wakintanami shonqunta chukruyätsin.
19Tsayno niptï capazchari kayno nipäkamankiman: <<Runakunapa shonqunta kikin chukruyaykätsirqa ¿imanirtaq jutsayuq kashqanta Tayta Dios niykan? Kikin tsayno ruraptinqa ¿piraq michanman?>>
20Tsayno nirqa qam ¿pitaq kanki Tayta Dios imata rurashqantapis manakaqman churanaykipaq? Mitu mankapis ruraqninta manami kayno nintsu: <<¿Imanirtaq tsaynöqa ruramarqayki?>>#Isa. 29.16; 45.9.
21Manka ruraqqa munashqannömi mitupita ruran. Tsay mitulapitami juk wichita ruran fiestacho manijananpaq y juk wichitana waran waran manijananpaq.#Jer. 18.4-6.
22Tsaynölami Tayta Diospis wakin runakunata destinarqan castigananpaq. Jutsata rurashqanpita rabyakur castigananpaq karpis manami juklatsu castigan, sinöqa pacienciakurmi shuyaran. 23Wakin runakunatanami destinarqan gloriaman pushananpaq. Tsayno destinarqan kuyapäkuq kashqanta musyatsimänantsipaqmi. 24Tsay kuyapashqan runakunaqa noqantsimi kaykantsi. Paymi akramashqantsi Israel runa kaptintsipis y mana Israel runa kaptintsipis.
25Profëta Oseas qelqashqanchöpis kaynömi niykan: <<Jäpa marka runakuna kaptikipis wamräkuna kashqaykitami nishayki. Mana kuyashqä runakuna kaptikipis kananqa kuyapäshaykimi>>.#Ose. 2.23.
26Kaynöpis qelqaraykanmi: << <Qamkunaqa manami noqapatsu> nishushqayki partichöpis runakuna kaynömi nipäkunqa: <Paykunaqa imayyaqpis kawaq Tayta Diospa wamrankunami karkaykan> >>.#Ose. 1.10.
27Wakin Israel runakunala salvashqa kananpaq kashqantami Isaías kayno qelqarqan: <<Lamar kuchuncho aquyshanöraq Israel runakuna tsaytsika kaptinpis walkaqlatami Tayta Dios salvanqa. 28Ichiklanami pishiykan Tayta Dios lapan runakunata juzgananpaq>>.#Isa. 10.22-23. 29Isaías mastapis kaynömi qelqarqan: <<Lapanta mandaq Tayta Dios juk ishkaylatapis kawaykaqta mana kachamaptintsiqa Sodomano y Gomorranömi ushakashwan karqan>>.#Isa. 1.9.
Jesucristuta Israel runakuna mana chaskikushqan
30Tantiyakushun. Mana Israel runakunaqa Diospa leyninkunata cumplinanpaq mana yarpachakuykarpis Jesucristuman yärakurmi salvakurkaykan. 31Israel runakunami itsanqa <<Tayta Diospa leyninkunata cumplirmi salvakushun>> nirpis mana salvakärintsu. 32¿Imanirmi tsayno mana salvakärintsu? Jesucristuman mana yärakurmi. Payman yärakunanpa trukanqa tsay leykunata cumplishqanmanmi yärakärin. Tsaynöpami tunitsikuq rumiman takakar ishkipäkun. 33Tayta Diospa palabranchöpis kaynömi qelqaraykan:
<<Siónmanmi takakätsikuq y tunitsikuq rumita churä.
Tsayman takakarmi atska runakuna ishkinqa.
Pipis payman yärakuq kaqqa manami manakaqlapaqtsu yärakunqa>>.#Isa. 28.16.
Attualmente Selezionati:
Romanos 9: qvmB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.
