Hechos 17

Tesalónicacho Pablupa y Silaspa contran sharkapäkushqan

1Tsaypita Anfípolis y Apolonia markakunapa pasarmi Pablo y Silas Tesalónica markaman chayarqan. Tsaycho sinagöga kaptinmi 2imaypis aywashqanno tsay sinagögamanpis Pablo aywarqan. Tsaychömi Tayta Diospa palabranta kimsa jamay junaq yachatsirqan. 3Tsayno yachatsirmi nirqan salvamaqnintsi Cristo wanushqanta y kawarimushqanta. Tsaynöpis kayno nirqan: <<Jesúsmi salvamaqnintsi Cristo kaykan>>.

4Tsayno niptinmi wakin Israel runakuna Jesucristuman yärakur Pabluwan y Silaswan juntakarqan. Tsaynölami Tayta Diosta cäsukuq mana Israel runakunapis y rïca warmikunapis Jesucristuman atskaq yärakärirqan. 5Jesúsman mana yärakuq Israel runakunami itsanqa Pabluta chikipäkushpan qela runakunata kayno nipäkurqan: <<Pablupa y Silaspa contran sharkapäkunanpaq runakunata shimita qopäkuy>>.

Yachatsishqanno shimita qoptinmi Pabluta y Silasta ashir atska runakuna Jasónpa wayinman rabyashqa yaykapäkurqan.

6Tsaycho mana tariykurnami Jasónta y wakin wawqikunatana autoridäkunaman apaykur kayno nipäkurqan: <<¡Kay runakunaqa lutankunata yachatsirmi maytsaypapis purirkaykan! ¡Kananqa kay markamannami chayapäkamushqa! 7¡Jasónmi paykunata patsatsishqa! ¡Jesús jutiyuq runa mas munayniyuq rey kashqanta nipäkushpanmi mandamaqnintsi rey Césarpa leyninkunata manakaqman churarkaykan!>>

8Tsayno niptinmi tsaycho kaq runakuna y autoridäkunapis fiyupa rabyakärirqan. 9Tsaymi Jasónta y wakin wawqikunata autoridäkuna multata pägarkatsir kacharqärirqan.

Pablo y Silas Berea markacho wilakärishqan

10Tsay tsakaymi Pabluta y Silasta wawqi panikuna Berea markaman kacharqan. Bereaman chayaykärirnami sinagögaman yachatsiq aywapäkurqan. 11Berea runakunaqa Tesalónica runakunapitapis mas tantiyakuq karmi Tayta Diospa wilakuyninta lapan shonqunwan chaskikärirqan. Pablo y Silas yachatsishqan rasunpa kashqanta musyananpaqmi Tayta Diospa palabranta waran waran yachakärirqan. 12Tsay markachöqa atska Israel runakuna, mana Israel runakuna y mana Israel rïca warmikunapis Jesúsmanmi criyipäkurqan.

13Tayta Diospa wilakuyninta Bereachöpis Pablo wilakuykashqanta mayaykurmi Tesalónicacho taq Israel runakuna tsayman aywapäkurqan. Chayaykurmi runakunata shimita qorqan Pablupa contran sharkapäkunanpaq. 14Tsawraqa wawqi panikuna jinan höra Pabluta qeshpitsirqan lamar kuchunman. Silas y Timoteumi itsanqa Bereacho quëdakärirqan. 15Pabluwan aywaqkunaqa Atenas markamanmi payta pusharqan. Kutikunanpaqna kaykaptinmi Pablo kayno nirqan: <<Bereaman chayaykur Silasta y Timoteuta jukla kachaykalämunki>>.

Atenas markacho Pablo wilakushqan

16Atenascho Silasta y Timoteuta shuyaraqno purirmi atska ïdulukunata rikar Pablo pasaypa rabyanarqan. 17Tsaymi sinagögaman aywaykur Israel runakunata y Diosta cäsukuq mana Israel runakunatapis Tayta Diospa wilakuyninta tantiyatsiq. Pläzamanpis waran waran aywarmi runakunata wilapaq.

18Tsaychömi Epicúreo y Estoico nishqan yachaq runakunawanpis rimanakuq. Jesúspita Pablo wilapaptin y wanushkuna kawarimunanpaq kashqanta wilapaptinmi wakin runakuna kayno nipäkurqan: <<Kay yachaq tukuq runa ¿imataraq parlakunpis?>>

Y wakinnami kayno nipäkurqan: <<Kay runaqa mana reqishqantsi dioskunapitami parlakun>>.

19Tsayno nirmi masta tantiyatsinanpaq Pabluta pusharqan autoridäkuna juntakashqan Areópago nishqanman. 20Tsaychömi Pabluta kayno nipäkurqan: <<Qamqa yacharkaykätsimanki imaypis mana mayapäkushqätami. Tsaymi imano kashqantapis shumaq mayayta munapäkü>>.

21(Atenas runakuna y tsaycho taq jäpa runakunaqa mushuq yachatsikuy kaptinqa imaypis mayaytami munapäkuq. Nirkurmi waran waran tsay mayashqankunalata parlapäkuq.)

22Tsawraqa Areópagucho juntaraykaq autoridäkunapa nawpanman ichiykur Pablo kayno nirqan: <<Atenas runakuna, noqa tantiyaykämi dioskunata aläpa adorarkaykashqaykita. 23Markapa purirmi capillakunata, altarkunata y ïdulukunatapis rikashqä. Tsaynöpis rikashqä juk altarcho kayno nir qelqaraykaqtami: <Kay altarqa mana reqishqantsi diospaqmi>. Tsay mana reqishqayki Diospitami wilakuykä.

24<<Paymi kay patsata y lapan imaykatapis kamashqa. Jana patsatapis y kay patsatapis munayninchömi tsararaykan. Tsaymi runakuna rurashqan templuchöqa mana tantsu.#1Rey. 8.27; Isa. 42.5. 25Noqantsi manami imatapis payta kamaripantsitsu. Tsaypa trukanqa paymi kawanantsipaqpis jämayta qomantsi y lapan munashqantsikunatapis kamaripämantsi.

26<<Juk runalata kamarkurmi bendicionninta churarqan atskaqman mirarkur nacionkuna maytsaychöpis kananpaq. Paymi destinarqan tsay nacionkuna imayyaq kananpaq y mujunninkuna mayyaq kananpaqpis. 27Tayta Dios tsayno kamakätsishqa imaykanöpapis payman yärakunantsipaqmi. Payqa manami noqantsipita karuchötsu kaykan, sinöqa nawpantsichömi kaykan. 28Tayta Dios yanapamaptintsiraqmi kawantsipis y purintsipis. Marka mayikipis shumaq yarpachakurir kayno nirmi qelqarqan: <Lapantsipis paypa wamrankunami kaykantsi>.

29<<Tayta Diospa wamran kaykarqa ama yarpapäkushuntsu qoripita, qellaypita o rumipita rurashqa ïdulukunano Dios kashqanta. Tsaykunataqa runakuna kikinpa yarpaynilanpitami rurapäkun. 30Runakuna mana musyayninpa ïdulukunata rurapäkushqanpita Tayta Dios manami castigarqantsu. Kananqa maytsaychöpis lapan runakunatami niykan ïdulukuna adorayta kacharir pay munashqannöna kawapäkunanpaq. 31Lapan runakunata mana jananpaypa juzgananpaqmi#Sal. 9.8. Tayta Dios juk runata akrashqa. Tsay runa pï kashqantapis musyanantsipaqmi wanushqanpita kawaritsimushqa>>.

32Wanushqanpita kawarimushqanta Pablo niptinmi wakin runakuna asiparqan. Wakin runakunanami kayno nipäkurqan: <<Yapaychömi qayatsishayki masta tantiyatsimänaykipaq>>.

33Tsawraqa tsay runakuna juntakashqanpita Pablo aywakurqan. 34Juk ishkay runakunami itsanqa Pablo wilapashqankunata criyir paywan juntakarqan. Paykunami karqan Areópagucho mandaq Dionisio, Dámaris jutiyuq warmi y mas wakin runakunapis.

Attualmente Selezionati:

Hechos 17: qvmB

Evidenzia

Copia

Confronta