2 Corintios 8
8
Ofrendata shuntananpaq nishqan
1Wawqi panikuna, wilapäshayki Macedoniacho kaq wawqi panikunata Tayta Dios kuyapar imano yanapashqantapis. 2Paykunaqa fiyupa nakarpis y pasaypa waktsa karpis kushishqami tsaytsika ofrendata shuntashqa. 3Kikïmi rikashqä ofrendata churananpaq kaqpita masta churapäkushqanta. Tsayno churashqa voluntäninkunapitami. 4Paykunami yaparir yaparir ruwakamashqa wakin markakunacho ofrendata shuntashqanno Jerusaléncho yärakuq mayintsikunapaq shuntapäkunanpaq.#Rom. 15.26. 5Ofrendata shuntarnami yarpashqäpitapis mas atskata shuntapäkushqa. Puntataqa Señor Jesucristupa munaynincho kawapäkunanpaqmi promitishqa. Tsaypitanami imata yätsishqätapis Tayta Dios munashqanno cumplinanpaq nipäkamashqa.
6Qamkunapis ofrendata shuntayta qalaykärinaykipaq Titumi shakyätsishushqanki. Tsaymi payta ruwakurqä qamkuna kaqman kutimur tsaynöla mas shakyätsishunaykipaq. 7Tayta Dios alimi yanapaykäshunki payman yärakärinaykipaq, shumaq parlapäkunaykipaq, ali yachapäkunaykipaq, yanapakuq kapäkunaykipaq y yachatsishqäno pïmaytapis kuyapäkunaykipaq. Tsaynöla atska ofrendata shuntanaykipaqpis Tayta Dios yanapaykuläshunki.
8Wakinkuna kushishqa shuntashqanta niykä manami mana munaykaqta obligartsu, sinöqa kuyapäkuq kashqaykita pïmaypis musyananpaqmi. 9Qamkuna musyapäkunkimi Señor Jesucristupis kuyapäkuq kashqanta. Paymi gloriacho rïcu kashqanta kacharishpan kay patsaman shamur waktsanöla rikakurqan. Tsayno rikakurqan qamkunapis gloriaman chayar Tayta Diospa nawpancho rïcu kanaykipaqmi.
10Kanan yätsishqäta chaskikäriy: Qanyan wata ofrendata shuntayta qalaykushqana kaykarqa 11kashqanman tupu tsaynöla shuntapäkuy. 12Lapan shonquykiwan kushishqa shuntaptikiqa ofrendashqaykita Tayta Dios chaskipäkushunkipaqmi. Itsanqa kashqalanpita shuntapäkuy. Ama lakikäriytsu shuntashqayki ofrenda walkala kaptinpis.
13Manami pobriyätsiyta munartsu tsayno niykä, sinöqa lapantsipis yanapanakunantsita munarmi. 14Jerusaléncho yärakuq mayintsikuna kanan muchuycho kaptinpis qamkunapaqa kaykanraqmi. Qamkuna muchuycho kaptikinami paykunapis yanapashunkipaq. Juknintsi juknintsi tsayno yanapanakurqa manami muchüshunnatsu. 15Tayta Diospa palabranchöpis kaynömi qelqaraykan:
<<Atskata shuntaptinpis manami putsurqantsu.
Walkalata shuntaptinpis manami pishirqantsu>>.#Éxo. 16.18.
Yanaqaqninkunawan Corintuman Tito aywananpaq nishqan
16Titupis noqanöla qamkunapaq yarparaptinmi Tayta Diosta agradëcikü. 17Tsaymi qamkuna kaqman kutimunanpaq niptï kushishqa awnimarqan. Qamkunawan tinkuyta munarmi manaraq niptïpis shamuyta munaykan. 18Tituwanmi juk wawqitapis kachaykämü. Tayta Diospa wilakuyninta ali wilakuq kaptinmi kaycho kaq lapan wawqi panikuna nipäkun ali wawqi kashqanta. 19Tsaymi Jerusalénman ofrendata apaptï yanaqämänanpaqpis payta akrapäkushqa. Ofrendata chayatsiptïnami yanapakuq kashqantsita tantiyar Tayta Diosta alabapäkunqa. 20Tsaytsika ofrendata chayatsinäpaq yanaqämaptinmi pipis lutanta mana rimanqatsu. 21Tayta Diospa nawpanchöpis y runakunapa nawpanchöpis alilatami rurayta munä.
22Tituwanmi mas juk wawqitapis kachaykämü. Paypis Tayta Dios munashqanno kawaq wawqimi. Ali chaskinaykipaq kashqanta musyarmi paypis yanapashunaykipaq kushishqa aywaykämun.
23Tito pï kashqantapis tapushuptiki wilapäkunki noqawan wilakur puriq kashqanta. Manami noqalata yanapamänanpaqtsu tsayno purin, sinöqa qamkunatapis yanapashunaykipaqmi. Tsaynöla paywan shamuq ishkay wawqikunapita tapushuptikipis wilapäkunki kaycho kaq wawqi panikuna paykunata kachamushqanta y Cristo munashqanno ali kawarkaykashqanta. 24Qamkuna kaqman chayamuptin paykunata shumaq chaskiykulay. Tsaynöpami maytsaychöpis wawqi panikuna musyapäkunqa nishqänöla kuyapäkuq kashqaykita.
Attualmente Selezionati:
2 Corintios 8: qvmB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.