Mateyo 4
4
Yesu ayeshewa kuli Satana
(Mk. 1.12-13; Luk. 4.1-13)
1Elo Mupashi Wabuta watwite Yesu muchiswebebe mukweshewa kuli Satana. 2Panuma yanshiku amakumi ane, akasuba nobushiku, ukwambula ukulya, Yesu aliumfwile insala. 3Epo Satana alishile nokumwesha ati, “Kati niwe Mwana waku Lesa, eba amabwe nga ukuti aaluke umufuba.”
4Elo Yesu amwasukile ati, “Chalilembwa ati, ‘Umuntu tangekala uwabumi pakulya umufuba wenka iyowo, kuntu pa mashiwi onse aafuma mukanwa kaku Lesa.’”#Deut. 8.3
5Epo Satana atwite Yesu kumusumba wa Yelusalemu, amutekele pachitumbe chananda yaku Lesa. 6Elo asosele kuli Ye ati, “Kati niwe Mwana waku Lesa, chilukila panshi pakuti chalilembwa ati,
‘Lesa akweba abangelo bakwe
ukwisa kukwelekela pamaboko abo,
ukuti wiyitutulapo amakasa obe pamabwe.’”#Amal. 91.11-12
7Yesu alyasukile ati, “Nakambi chalilembwa ati, ‘Wiyeshapo Bashikulu Lesa obe.’”#Deut. 6.16
8Nakambi Satana atwite Yesu palupili ulutali nokumulanga amabufumu onse aamuchalo chonse nomuchinshi waako. 9Elo asosele kuli Yesu ati, “Mfi fyonse nkokupela nga wafukama pamakasa anji nokunambila.”
10Yesu alimwasukile ati, “Fuma mpa, we Satana! Pakuti chalilembwa ati, ‘Ulokulambila Bashikulu Lesa obe, mba benka ebo ulokupyungila.’”#Deut. 6.13
11Elo Satana alimushile Yesu, nabangelo balishile nokumupyungila.
Yesu atatika umulimo wakwe mu Galili
(Mk. 1.14-15; Luk. 4.14-15)
12Ulo Yesu aumfwile ukuti Yohane bamukaka muchifungo, abwelelemo ku Galili. 13Tayikelepo mu Nasaleti, kuntu ayile kwikala mu Kapenaumu, umushi wamululamba lwaku Bemba wa Galili, mumipaka ya Sebuloni na Nafutali. 14Nchi chachitikilwe pakuti chifikilishiwe ichalembelwe na Esaya umusoseshi ati,
15“We chalo cha Sebuloni necha Nafutali,
kunshila yaku bemba, petala ya Yodani,
we Galili, ichalo chabenafyalo!#Esa. 9.1-2
16Abantu abayikala mumfishi
bakobona ukusanika ukukulu!
Bo abayikala muchalo chamfinshi iyamfwa,
ukusanika kwakubatulila.”
17Ukufuma pali njilya nshita, Yesu atatikile ukubilisha ati, “Lapileni pantu ubufumu bwakumulu bwapalamina.”
Yesu ayita abalofi banswi bane
(Mk. 1.16-20; Luk. 5.1-11)
18Ulo Yesu alikwenda mululamba lwaku Bemba wa Galili, abwene abalofi babili: Simoni (uwitwa Petulo), na Andileya wakwe, balikuteya isumbu muli bemba pakuti bali abalofi banswi. 19Elo Yesu asosele kuli bo ati, “Nkonkeni pakuti nkoyisa kumulenga ukuba abalofi babantu.” 20Bwangu-bwangu balishile amasumbu abo nokumukonka.
21Nakambi ulo Yesu aendeleko panini, abwene Yemusi mwana Sebedi na Yohane wakwe bali mubwato pamo nabawishibo, balikusosola amasumbu abo. Nabo alibetile. 22Bwangu-bwangu bashile ubwato nabawishibo, nokumukonka.
Yesu asambisha, ashimikila nokuposha
(Luk. 6.17-19)
23Yesu alikwenda-enda muchalo cha Galili, ukusambisha mumananda aakulombelamo Lesa, nokubilisha Ubutumi Bwawama ubwa Bufumu, nokuposha abantu abali namalwele aapusene-pusene nabanakile imibili. 24Ululumbi lwakwe lwalitulikile muchalo chonse icha Siliya. Elo abantu batwite kuli Yesu bonse abalikulwala amalwele aapusene-pusene, abayiketwe imipashi iibi, abachinkoni-nkoni, nababulebe, bonse kabaposha. 25Echo amabumba abantu ayenji alimukonkele, ayafumine ku Galili, kuchalo chamishi ikumi, kumusumba wa Yelusalemu, ku Yudeya, elo nabakwitala lyamulonga wa Yodani.
Attualmente Selezionati:
Mateyo 4: LalaNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Chilala New Testament © Bible Society of Zambia, 1998.