Luk 5
5
Ciöt Yecu kɛ jaak tin nhiam
(Mɛ̈t 4:18-22, Mak 1:16-20)
1Kɛ cäŋ kɛl mëë te Yecu cuŋä thok yiëër Gɛ-nɛ-tha-rɛt, mëë dhoc nath duɔ̱pdiɛn kɛ ɣöö bikɛ ruac Kuɔth ben liŋ kä jɛ. 2Kä cuɛ murkäbni da̱ŋ rɛw nɛn thok yiëër, kä ci deep rɛc wä raar rɛydiɛn, lakɛ cambaknikiɛn. 3Kɛ cuɛ wä rɛy murkäbä Thay-mɔn, cuɛ jɛ thiec kɛ ɣöö bɛ jɛ ɣɔak yieer kä mi tɔt. Kä cuɛ nyuurɛ rɛy murkäbä, kä cuɛ naath ŋi̱eec. 4Kä mëë cɛ thuɔ̱k kɛ ruac, cuɛ Thay-mɔn jiök i̱, “Gɛri murkäb guäth mi lueŋ, kä luay cambaknikun yieer kä bia ka̱p kɛ rɛc.” 5Kä cu Thay-mɔn ɛ loc i̱, “Kuäär, cakɔ jɛ ɣɔ̱n kɛ wäär kɛɛliw, kä thilɛ mi cakɔ jek. Kä kɛ ɣöö ci jɛ lar bä cambakni luay yieer.” 6Mëë cikɛ nɔmɔ la̱t, cukɛ rɛc ti ŋuan käp amäni min ci cambaknikiɛn thia̱k kɛ ɣöö deekɛ rɛ̈ɛ̈t. 7Kä cukɛ gatikiɛn ti te rɛy murkäbä dɔ̱diɛn wɛt, kɛ ɣöö bikɛ kɛ ben luäk. Cukɛ ben, kä cukɛ murkäbni da̱ŋ rɛw diaal thiäŋ kɛ rɛc, a cukɛ thia̱k kɛ di̱ŋ. 8Mëë ci Thay-mɔn Pi-tɔr ɛ nɛn, cuɛ rɔ yuɔr piny ciökni Yecu, cuɛ jɛ jiök i̱, “Kuäärä, woc rɔɔdu kä ɣä, kɛ ɣöö ɛ ɣän ram mi gua̱n dueeri!” 9Kä jɛn cuɛ ga̱a̱c kɛnɛ nɛy diaal tëë te kɛɛl kɛ jɛ, kɛ pek rɛc tëë ci kɛn kɛ käp. 10Kä te gaat Dhɛ-ba-dii, ni Jɔ̱ɔ̱n kɛnɛ Je-mɛth thi̱n bä, tin la la̱a̱t kɛɛl kɛ Thay-mɔn. Kä cu Yecu Thay-mɔn jiök i̱, “/Cuarɛ dual, a tɛmɛ ni ɛn täämɛ bi yɛn a dëëp nath.” 11Mëë cikɛ murkäbnikiɛn nööŋ thok waath, cukɛ ti diaal ba̱ny piny, kä cukɛ jɛ guɔ̱ɔ̱r.
Jak Yecu kɛ ram mi tekɛ dhɔp kä gɔaa
(Mɛ̈t 8:1-4, Mak 1:40-45)
12Mëë te Yecu wi̱c kɛl kä wi̱i̱, cuɛ tekɛ wut mi tekɛ dhɔp. Kä mëë cɛ Yecu nɛn, cuɛ rɔɔdɛ yuɔr piny nhiamdɛ, kä cuɛ jɛ läŋ wëë i̱, “Kuäär ni Kuoth, duŋ mi nhɔki jɛ, deri ɣä jakä gɔaa.” 13Kä cu Yecu tetdɛ riny, kä cuɛ jɛ thiap, wëë i̱, “Nhɔakä jɛ. A puɔ̱nydu ku gɔaa.” Kä cu dhɔp jiɛɛn puɔ̱nydɛ ni ɛn guäth ɛmɔ pa̱ny. 14Kä cuɛ jɛ gok, ɛn ɣöö /cɛ jɛ bi la̱r naath. Kä cuɛ jɛ jiök i̱, “Wër, nyuthni rɔ bo̱o̱th palä, kä ce̱tkɛ min ci Muthɛ jɛ lar, wër tho̱pni muc kɛ kui̱ kä ɣöö ci puɔ̱nydu gɔaa mi bi a nyuuth kɛ kui̱ nath.” 15Kä cu kɛ̈kdɛ räth ɛlɔ̱ŋ. Cu bua̱n nath ti ŋuan rɔ̱ ma̱a̱t kɛ ɣöö ba ruacdɛ liŋ, kɛnɛ ɣöö bɛ kɛ jak kä gɔw kä jua̱thkiɛn. 16Kä cuɛ wä pal där dɔaar gua̱a̱thdɛ kärɔa.
Jak Yecu ram mi cɛ nuäŋ kä gɔaa
(Mɛ̈t 9:1-8, Mak 2:1-12)
17Kɛ cäŋ kɛl mëë ŋi̱i̱c Yecu naath, kä nyuur ji̱ Pa-ri-thii kɛnɛ ŋi̱eec ŋuɔ̱tni Muthɛ thiäkädɛ. (Bäkɛ rɛy ciëëŋni diaal kä Gɛ̈-lɛ-li kɛnɛ Ju-dia kɛ Jɛ-ru-tha-lɛm), kä te buɔ̱m Kua̱r ni Kuoth kɛ Yecu kɛ ɣöö bɛ ji̱ jua̱thni jakä gɔw. 18Kä cu wutni ti kapkɛ ram mi cɛ nuäŋ kɛ gal ben. Cukɛ jɛ go̱r ɛn ɣöö bi kɛn ɛ nööŋ rɛc, kä dëë jɛ ben la̱th nhiam Yecu. 19Mëë cɛ thil gua̱a̱th mi nööŋkɛ jɛ rɛy duëël kɛ ɣöö ŋuan naath, cukɛ jɛ kap wi̱i̱ duëël nhial, kä cukɛ jɛ luay piny kɛ gal däär nath nhiam Yecu. 20Kä mëë cɛ ŋa̱thdiɛn nɛn, cuɛ wee i̱, “Määthdä, ca dueerku päl.” 21Cu ji̱ gɔ̱rkä kɛnɛ ji̱ Pa-ri-thii jɛ tok kɛ mi thiëckɛ rɔ̱, wäkɛ i̱, “Ɛ ram mi te i̱di ɛnɔ kueth Kuoth ɔ? Ɛŋa mi dee dueer ran pälɔ, /ciɛ ni Kuoth kärɔa?” 22Kä mëë ci Yecu thiecnikiɛn kɛ rɔ̱ mir, cuɛ kɛ loc i̱, “Ɛŋu thiëcɛ rɔ̱ kɛ lo̱ckun ɔ? 23Thia̱kni mith, ɛ ɣöö ba lar i̱, ‘Ca dueerku päl,’ kiɛ ba wee i̱, ‘Jiɛc rɔɔdu kä jäli’? 24Kä bi yɛn ɛ ŋa̱c ɛn ɣöö te Gat Ran kɛ lua̱ŋ mi päl ni dueer wi̱i̱ muɔ̱ɔ̱n,” Kä cuɛ wut in cɛ nuäŋ jiök i̱, “Ɣän la̱rä jɛ ji̱ i̱, ‘Jiɛc rɔɔdu, käni ko̱lu, kä wër dhɔru.’ ” 25Ni ɛn guäth ɛmɔ, cuɛ rɔ jiɛc nhiamdiɛn kä cuɛ duŋ tɔ̱ɔ̱cädɛ ka̱n. Kä cuɛ wä cieeŋdɛ a liakɛ Kuoth. 26Cu nɛy diaal ga̱a̱c. Cukɛ Kuoth liak, kä cukɛ jɛ luɔ̱th, wä kɛ i̱, “Cakɔ ti buɔ̱m buɔ̱ɔ̱m ti ga̱ykɛ naath nɛn ɛn walɛ!”
Ciöt Yecu kɛ Lii-bay
(Mɛ̈t 9:9-13, Mak 2:13-17)
27Kɛ kɔr kä mɛmɛ cu Yecu wä raar, cuɛ thuul tho̱lbo̱kä mi cɔal i̱ Lii-bay nɛn, nyuurɛ dueel tho̱lbo̱kä. Cuɛ jɛ jiök i̱, “Guuri ɣä.” 28Kä cu Lii-bäy rɔ jiɛc, cuɛ ti diaal ba̱ny piny, kä cuɛ jɛ guɔ̱ɔ̱r.
29Cu Lii-bay jɛ lät kä mi̱eth mi di̱i̱t cieeŋdɛ. Cukɛ nyuur guäth mi̱eth kɛɛl kɛ thuɔ̱ɔ̱l tho̱lbo̱kni kɛnɛ nɛy ti ŋuan kɔ̱kiɛn. 30Kä cu ji̱ Pa-ri-thii kɛnɛ ji̱ gɔ̱rä göny kä ji̱ kɔaar Yecu, wäkɛ i̱, “Ɛŋu mi̱th yɛn kä mäth Yɛn kɛɛl kɛ thuɔ̱ɔ̱l tho̱lbo̱kni kɛnɛ ji̱ dueeri mɔ?” 31Cu Yecu kɛ loc i̱, “Nɛy ti puɔl pua̱nykiɛn /cikɛ ki̱m go̱r, kä ji̱ jua̱thni görkɛ jɛ! 32Ɣän /cä bä kɛ kui̱ ji̱ cuŋni, duundɛ ɣöö ba̱a̱ kɛ ɣöö bä ji̱ dueeri jakä riet kɛ rɔ̱ dueerikiɛn.”
Thiec kɛ kui̱ ruac thekä mi̱thni
(Mɛ̈t 9:14-17, Mak 2:18-22)
33Kä cu naath Yecu jiök i̱, “Ji̱ kɔaar Jɔ̱ɔ̱n thɛ̈kɛ mi̱th kä palkɛ Kuɔth gua̱thni ti ŋuan, kä lät ji̱ kɔaar Pa-ri-thii inɔ bä, kä ji̱ kɔaaru mi̱thkɛ kä mäthkɛ.” 34Kä cu Yecu kɛ jiök i̱, “Dee ji̱ kuën mi̱th thɛk, mi te cɔ nyaal kɛɛl kɛ kɛ? 35Bi ni̱n ben tin ba cɔ nyaal naŋ rɛydiɛn, kä bikɛ cu thɛɛk ɛ ni̱ni tɔ̱tɔ̱.” 36Kä cuɛ kɛ la̱t ruac cäätdä bä i̱, “Thilɛ ram mi dee bi̱i̱ mi bo̱r rɛt a bɛ jɛ wä kɔac biey mi dɔaaŋ. Kä mi cɛ jɛ la̱t inɔ, bi bi̱i̱ in bo̱r rɛ̈ɛ̈t, kä /ci bi̱i̱ in bo̱r rɔ bi lot kɛnɛ bi̱i̱ in ci dɔŋ. 37Kä thilɛ ram mi bi kɔaŋ mi pay mil piɛk rɛy göökni ti ci dɔŋ. Dee kɔaŋ in pay mil, göök ti ci dɔŋ pät, a bɛ lo̱ny jɔ̱ɔ̱r, kä bi göök cu da̱k. 38Kä duundɛ ɣöö ba kɔaŋ mi pay mil yi̱k piɛk rɛy göökni ti bo̱o̱r. 39Thilɛ ram mi go̱o̱r kɔaŋ mi pay mil, mi cɛ maath kɛ kɔaŋ mi ci jiɛɛn. Derɛ wee i̱, ‘Gɔaa ni kɔaŋ mi ci jiɛɛn.’ ”
Attualmente Selezionati:
Luk 5: nusNHB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Nuer Bible © Bible Society in South Sudan 1998,2012.
