Матта 2
2
Исайихьна гъафи аьяндрар
1Иса Гьирод паччагьдин девриъ Ягьудия уьлкейиъ айи Вифлеем кӀуру шагьриъ бабкан гъахьнийи. Магьа, Ерусалимдиз ригъгьудубчӀвру терефнахъан аьяндрар гъюру. 2Дурари гьерхру: «Ягьудияйин паччагь хьуз пну бабкан гъашир нашди? Дугъкан хабар туврайи хяд ригъгьудубчӀвру терефнаъ кабхьну гъябкъюнчуз, ва Дугъаз икрам апӀуз гъафунча».
3Му гафар гъеерхьган, Гьирод паччагьдик ва Ерусалимдин агьалйирик гъалабулугъ кабхъру. 4Думуган Гьиродди, жугьдарин вари аьхюну маллйир ва къанунчйир уч дапӀну, дурарихьан, Месигь наан бабкан духьну ккунир вуйи, – пну, гьерхру.
5– Ягьудияйин Вифлеем шагьриъ, – жаваб тувру дурари, – фицики Пайгъамбрин Китабдиъ дибикӀна:
6«Увура, Вифлеем, Ягьудия юрднан шагьрарин арайиъ сабдииндира бицӀиб дарва, фицики увʼан удучӀвиди Йиз Израилин халкь уьрхру Аьхюр». 7Думуган Гьиродди, дуфнайи аьяндрариз жиниди дих дапӀну, дурарихьан хяд гьудубчӀвру вахт гьерхну, дюзди аьгъю апӀуру. 8Ва, дурар Вифлеемдиз рякъюъ тӀаъри, гьамци кӀуру: «Душну БицӀирин гьякьнаан вари уччвуди аьгъю апӀинай. Хъа учвуз Думу гъидихъган, узузра хабар дебккай, узхьанна, душну, Дугъаз икрам апӀуз шлуганси». 9Паччагьдихъ хъебехъну, дурар рякъюъ учӀвру. Ва магьа завун ригъгьудубчӀвру терефнаъ чпиз гъябкъю хяд, тап БицӀир айи йишвʼина дубшну дийибгъайизкьан, дурарин улихьди гъябгъюру. 10Аьяндрар, хяд гъябкъган, кьадар адрубкьан шад гъахьнийи. 11Ва хулаъ учӀвган, дурариз БицӀирна Дугъан дада Марʼям рякъюру ва жилʼина ис духьну, Дугъаз икрам апӀуру. Хъасин, чпин пешкешар адагъну, БицӀириз тувру: гъизил, ладан кӀуру ицци ниъ хъайи ягъ ва смирна кӀуру багьалу дармансиб шейъ. 12Ва Гьироддихьна кьяляхъ махъадаканай кӀури нивкӀукди дябкъну, аьяндрар жара рякъюъди чпин юрдариз гъягъюру.
Египетдиз гьергну гъягъюб
13Дурар гъушхъан, магьа Юсуфдиз нивкӀукди малайикди дуфну кӀуру: «Гъудужв, БицӀирна Дугъан дада увухъди гъадагъну, Египетдиз гьергну гъарах ва узу увуз хабар апӀайизкьан душваъ гъуз; фицики Гьироддиз, БицӀир пуч апӀбан бадали, Думу агуз ккунди а». 14Юсуфра дишла, гьадму йишван гъудужвну, Исана Марʼям гъадагъну, Египетдиз гъягъюру 15ва, Гьирод кечмиш хьайизкьан, душваъ гъузру. Гьамци, Агъайи пайгъамбрин мелзналан: «Египетдиан Узу Йиз Бализ дих гъапӀунза», гъапи гафар кӀулиз удучӀвуз кӀури, гъабхьиб вуйи.
БицӀидар терг апӀбан Гьироддин буйругъ
16Ва думуган Гьирод, аьяндрари чаз кучӀлар гъапӀуб аьгъю дубхьну, хъюлу ацӀнийи ва дугъу Вифлеемдиъна дидин аьтрафариъ айикьан кьюд йисазкьан вуйи вари жили веледар пуч апӀуз чан эскрар гьаъру. Швнуд йисаъ айидар дийихну ккундуш, Гьиродди аьяндрари гъапибдиан аьгъю гъапӀнийи. 17Гьамци Еремия пайгъамбрин мелзналан дупнайи гьаму гафар кӀулиз удучӀвнийи:
18«Рама шагьриъ гъал абхъна ишбан, ишларин зурба фигъан; Рахил ишура чан веледарихъ, дугъаз ккебехъуз ккунди адар, гьаз гъапиш дурар сарун имдар».
Египетдиан хъадакну гъюб
19Хъа Гьирод кечмиш гъашихъан, Египетдиъ айи Юсуфдихьна нивкӀукди Аллагьдин малайик гъюру 20ва гьамци кӀуру: «Гъудужв, БицӀирна Дугъан дада гъадагъну, дурарра хъади Израилин ругариина гъарах, фицики БицӀирин аьжал ккунидар гъийихну». 21Юсуф гъудужву ва, БицӀирна Марʼям гъадагъну, Израилин ругариина хъадаку.
22Ягьудияйиъ чан адаш Гьироддин ерина дугъан бай Архелайи паччагьвал апӀурайиваликан гъеебхьган, Юсуфдиз дина гъягъюз гучӀ гъабхьнийи. Амма хъасин чаз нивкӀукди хабар дебккган, думу Галилейин ругариина гъягъюру. 23Ва душваз дуфну, Назарет кӀуру шагьриъ бин ккебгъну. Гьамци: «Месигьдиз Назарей ччвур тувди», – кӀуру пайгъамбрарин гафарра кӀулиз удучӀвнийи.
Attualmente Selezionati:
Матта 2: ТабГК
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Институт перевода Библии, 2010, 2013, 2016, 2018, 2023