Maqthaiq 8

Yeiqsul niaoqbhaoq daol nail teevq gaq bhai bhi meeq lai-a nail ganl

1Yeiqsul gaoqjaoq kovtavq nee yavq kha lee-u phao, tsaol-aq munl munl ma juq aivq nail haoqnao tsao the nail ngaol. 2Aq-u phao, niaoqbhaoq daol nail teevq gaq aivq jaol nail bha lal khi, maivphaoq miltsaq bhai gaol beiv khi, “Heeqphaq-ol, naol nl movq haq neq, ngal haol lal dai, naol nl nia nail ngaol” dai, hal hal ail khi ge nail ngaol.

3Yeiqsul aqlavq gaol tsaoq khi, aivq nail kovtavq bhai bavq dav khi, “Ngal nl movq naol. Haol lal yaoq” dai, ge bhiq-u phao, teevq pov taivq-ail niaoqbhaoq daol nail al peivq ail gil khi haol lal-a nail ngaol. 4Aq-u phao, Yeiqsul neq aivq bhai, “Ganl niil teevq gaq bhai iqsanl thaq ge bhiq dei-eiq. Phil yaq juq jaol nail bha naoq nail aqmaol bhi hel daiq-ail yaoq. Naol haol lal-aoq nail ganl aqyu juq ya heeq nia dai, Maolseiq-i mail daoq bivq-ai thaq nail khe-ai, laol bhiq nail phaq laol ail yaoq” dai, ge bhiq khi, bhi kovq ail-a nail ngaol.

Yeiqsul genl dev teevq yal gaq nail aqivq nail yaqkav teevq gaq bhai bhi meeq lai-a nail ganl

5Yeiqsul Gaq bheiq neiq oq meenq bhai aol lai-u phao, genl dev teevq yal gaq nail aqivq teevq gaq aivq jaol nail bha lal khi, hal hal ail ge nail: 6“Heeqphaq-ol, ngaq nail yaqkav teevq gaq nal kav khoeq dee dee-ai bhiq nail ngel-i mail, maq luv maq lav nia dai, ilkhaol bhai iq thaiq nail ngaol” dai, ge bhiq-a nail ngaol.

7“Ngal lav meeq lee bhiq naol” dai, Yeiqsul aivq bhai ge bhiq-a nail ngaol.

8Thail hai ngaol-aoq, genl dev nail aqivq al gaq, Yeiqsul bhai ge bhiq-a nail: “Heeqphaq-ol, naol neq, eeq dee dee nail ngel-i mail, ngaq nail ilkhaol bhai bhi aol lee nail maq geel-nvq-ail. Naol daoq teevq daoq taivq-ail ge khi ngaol-aoq, ngaq nail yaqkav meeq lai nail ngaol. 9Khul khi mail dai ngal-aq neq, ngal yu nail pul-nvq bhai jaol nail khe-ai, ngaq nail pul-nvq bhai iqsanl, genl dev nail juq jaol nail ngaol. ‘Ail yaoq’ dai, teevq gaq bhai khoel haq neq, aivq ail nail ngaol. ‘Lal yaoq’ dai, teevq gaq bhai khul haq neq, aivq lal nail ngaol. ‘Niil phaq nl yaoq’ dai ngaq nail yaqkav bhai ge bhiq haq neq, aivq nl nail ngaol” dai, Yeiqsul bhai ge bhiq-a nail ngaol.

10Yeiqsul daoq al daoq ya gaiq-u phao, noeq-u maq dov dai pevq-ail khi, aivq nail haoqnao tsao the jaol nail tsaol-aq juq bhai ge bhiq-a nail: “Ngal nul juq bhai mal dil dai, ge lavq bhel. Ngal Ilsaqleiqlav nail tsaol-aq juq nail lavqkhoel bhai iqsanl nii dai dai ail neema thaq tsaol nail tsaol-aq maq moel daiq haq-al. 11Ngal nul juq bhai ge lavq bhel. Nl ma dov khoeq ga khoeq phao jaol nail tsaol-aq mao dai jil lal khi, Aqbhaqlaqhaq, Ilcav, Yaqkov nee mail jaol deel khi, Nqtavq Milkhaoq lavqkhoel bhai, jaq tavq daol tavq nail ngaol. 12Thail hai ngaol-aoq, milkhaoq al khaoq nail lavqkhoel bhai ya jaol lai naol dai, noeq nail tsaol-aq juq neq, lavqniil phao nav tsee deel jaol duq bhai the ha nail bhai ya daq nail ngaol. A bhai khal jaol nail tsaol-aq juq neq, noeq haq dee dee nail lavqkhoel nee nioil khi, haoq gil keivq nail ngaol” dai, ge bhiq-a nail ngaol.

13A bhai nee ngal-aq, genl dev nail aqivq al gaq bhai: “Naol kovq-ail yaoq. Naol neema thaq tsaol nail khe-ai, naoq nail haqbhoil pevq lal dei-eiq” dai, ge bhiq-a nail ngaol. Aq-u phao, teevq pov taivq-ail yaqkav al gaq meeq lai-a nail ngaol.

Yeiqsul Bheiqtuvluv nail khoeq-oel aqma bhai bhi meeq lai-a nail ganl

14Yeiqsul Bheiqtuvluv nail ilkhaol bhai aol lai-u phao, Bheiqtuvluv nail khoeq-oel aqma coevq sil nail ngel-i mail, iq thaiq nail bhai ya moel-a nail ngaol. 15Yeiqsul aivq nail aqlavq bhai nieivq thaiq-u phao, aivq coevq sil nail al meeq lai-a nail ngel-i mail, thul khi Yeiqsul bhai aoq bhaol laol bhiq-a nail ngaol.

Yeiqsul tsaol-aq mao dai gaq bhai lav meeq bhiq-a nail ganl

16Nl ma ga bhoel ail khi nqkivq kivq lee-u phao, neivq aol nail tsaol-aq mao dai yu Yeiqsul jaol nail bha hel lavq-a nail ngaol. Aivq daoq bivq khi, neivq al juq bhai the dov-a nail nee ovqtavq, nal nail tsaol-aq juq iqsanl bhai, bhi meeq lai-a nail ngaol. 17Aivq al hai nl-a nail neq, Miqyail nail haqbhoil ge dan nail Ilsaqyal-i mail ge-ai thaq nail khe-ai bhee lal dai nl-a nail ngaol. Ilsaqyal ge nail:

“Aivq neq,

ngadao nail haq aoq

nalgoel juq bhai oil khi,

ngadao nail nal nail

goel nail juq bhai

phi-a nail ngaol” dai,

ge-ai thaq nail ngaol.

Yeiqsul nail haoqnao tsao thel aivq movq nail juq

18Tsaol-aq munl munl ma juq aivq jaol nail teevq jaoq jaoljaoq-ai thaq nail bhai Yeiqsul ya moel-u phao, “Ngaq kha a phao lel khel bha ceiv ail bhel” dai, aivq nail yaq laol juq bhai daoq bivq-a nail ngaol. 19Aq-u phao, aoldaoq kovqdaoq cavq nail cov nail teevq gaq Yeiqsul jaol nail bha lal khi, “Saq laq-ol, naol khaq bha ail khi ngaol-aoq, ngal naoq nail haoqnao tsao thel leevq naol” dai, ge bhiq-a nail ngaol.

20Yeiqsul aivq bhai ge bhiq-a nail: “Kheeq siv neq, aivq nail aq khaol bhao nail ngaol. Nqtavq phao bhail nail keivq-avq iqsanl aivq nail aq kheel bhao nail ngaol. Thail hai ngaol-aoq, Tsaol-aq nail Yaqyov neq, uqhuq bavq thaq duq maq jiav-ail” dai, ge bhiq-a nail ngaol.

21Yeiqsul nail yaq laol yaoq gaq yaoq gaoq ge nail: “Heeqphaq-ol, ngaq nail aqbhu bhai iqmoeq bhi duq pheeq ail lavq yaoq” dai, hal nail ngaol.

22Yeiqsul aivq bhai ge bhiq-a nail: “Ngaq nail haoqnao tsao thel lavq yaoq. Sil-a nail tsaol-aq juq neq, aqyu juq nail gaiqlaq bhai, aqyu juq duq pheeq nail ngaol” dai, ge bhiq-a nail ngaol.

Yeiqsul lilmoel bhai bhi naq lai-a nail ganl

23Yeiqsul laovq jeeq khi ail-u phao, aivq nail yaq laol juq iqsanl aivq nee mail laovq jeeq khi ail-a nail ngaol. 24Aq-u phao, ngaqkha bhai lilmoel lil ma bhoe lal khi, ulcuvq eel khaol thaoq dee dee nail ngel-i mail, laovq ga nevq ail heeq phaq-ail pevq lal-a nail ngaol. Thail hai ngaol-aoq, Yeiqsul neq, iq thaiq kov-ai thaq nail ngaol. 25Yaq laol juq aivq bhai lav noeq ail khi, “Heeqphaq-ol, nv juq bhai hevq kovq lavq yaoq. Nv juq ga nevq heivq gil nail kev lal aivq nail ngaol” dai, ge bhiq-a nail ngaol.

26Yeiqsul aqyu juq bhai ge bhiq-a nail: “Neema thaq tsaol nail phaq gaq bhaq nail tsaol-aq juq-ol, nul juq khul khi mail thoi dai dai ail gee sil nail-aiq” dai, ge bhiq-a nail ngaol. A bhai nee ngal-aq, aivq thul khi, lilmoel khi mail ulcuvq eel khaol bhai khaq-u phao, aq tsi tsu dai, pevq ail-a nail ngaol. 27Yaq laol juq noeq-u maq dov dai, pevq-ail khi, “Tsaol-aq thoil gaq neq, khalheel nail tsaol-aq ngel-ail. Lil moel khi mail eel khaol iqsanl aivq nail daoq nal daiq nail niil” dai, aqyu juq nail gaiqlaq bhai, ge pheel jaq nail ngaol.

Neivq aol nail Gaq daq lal tsaol-aq nvq gaq nail ganl

28Ngaq kha a phao lel khel bha jiav nail Gaq daq lal milkhaoq bhai ail kev-u phao, neivq aol nail tsaol-aq nvq gaq luqdaol nee dov lee khi mail Yeiqsul bhai hav laq lee-a nail ngaol. Aqyu nvq gaq al jaiq-ail haqeiv nail ngel-i mail, gailkhaol al khaol bhai teevq gaq iqsanl maq tsao ceiv tseq-ail. 29Aqyu nvq gaq gul gul ail, “Miqyail nail Yaqyov-ol, naol nv-nvq gaq bhai khal hai tavq nail-aiq. Aq yanq maq kev lal khi ngaol-aoq, nv-nvq gaq bhai khoeq lee jiovq lee-a nail laiq” dai, ge bhiq-a nail ngaol.

30Aqyu juq jaol nail nee mao ail maq eq nail bhai, wavq mao ail mao nail teevq munl gav jaq thail thaiq nail ngaol. 31“Naol nv juq bhai the ha lavq nail dai ngal-aq neq, wavq al munl nail lavqkhoel bhai bhi aol ail lavq-o” dai, tsaol-aq al nvq gaq nail lavqkhoel bhai aol nail neivq juq Yeiqsul bhai hal-a nail ngaol.

32“Dov ail yaoq” dai, Yeiqsul neivq al juq bhai ge bhiq-u phao, neivq al juq dov-ail khi, wavq al juq nail lavqkhoel bhai aol ail-a nail ngaol. Aq-u phao, wavq al juq beiv khaiq bhai tsaoq khal aivq khi, ngaqkha bhai ga puvq heivq gil-a nail ngaol. 33Wavq bhai lovq nail juq neq, meenq lavqkhoel bhai tsaoq kol-aivq khi, khal pevq lal-a nail ganl iqsanl khi mail, neivq aol daiq-a nail tsaol-aq al nvq gaq nail ganl iqsanl ge gaiq bhiq ail-a nail ngaol. 34Aq-u phao, meenq lavqkhoel bhai jaol nail tsaol-aq iqsanl mail Yeiqsul bhai ya moel dai, dov lal-a nail ngaol. Aqyu juq Yeiqsul bhai ya moel-u phao, “Nv juq nail milkhaoq lavqkhoel nee mail dov-ail lavq yaoq” dai, hal-a nail ngaol.

Attualmente Selezionati:

Maqthaiq 8: aeu

Evidenzia

Copia

Confronta