I Versetti Biblici più popolari da Santiago 1

Condividi

Vitz'in vatzik, k'uxh kam kuxh k'axk'oil la epaleb'e, as la txuq'txun ex sti', tan ootzimale' seta'n uva' tul nepaleb'e unq'a k'axk'oe', as a' u k'ujleb'al ek'u'le' ni aq'on etxumb'al ti' ekuyat unq'a k'axk'oe'.

Pet asoj at umaj ex uva' ye'l etxumb'al ati ti' u b'a'ne', as ejajtaj te u Tiixhe'. As la taq' Aake' sete, tan aya'l chit ik'u'l Aak ti' taq'at sete. As ye'l ex la iyaa ex Aak tul la ejaj te Aak.

Vitz'in vatzik uva' xo'n ex sve, as sotzi'k u yole' sek'u'l. Tan la eb'an tab'it unq'a yole' uva' la alpi. As jit kuxh oora la yolon ex. As jit kuxh oora la ul evi'.

As tul uva' nekuy unq'a k'axk'oe', as aal niyak'in etaama ti' ichee etxumb'al ti' u b'a'ne'. As ye'xhkam kuxh uma'toj la sa'vit ve't seti'.

As kam ni tal viyol u Tiixhe' uva' nichuspu sete, as eb'antaj. As ye' la eb'ane' uva' la kuxh etab'i viyol u Tiixhe'. Tan asoj ye' la eb'ane' kam uva' ni tal u yole', as an kuxh ex neteesa etib' tu b'ey.

As achveb'al chit unq'a uxhchile' uva' la itx'ol ipal tu u k'axk'oe'. Tan tul uva' ma't itx'olat ipal tu u k'axk'oe', as tetz ve'te' u tx'aja'me' uva' altzi'mal kan ta'n u Tiixhe' uva' la taq' Aak ste ab'il uva' la toksa taama ti' Aak. As a'e' u tiichajile' k'atz Aak uva' ye'l iya'teb'al.

tan jank'al unq'a b'a'nile' uva' ye'l unb'ooj va'lexh la chee sti', as a' nitzaakat k'atz u Tiixhe' tu almika', vib'aal unq'a vee' skajayil uva' nitxijun tu almika'e'. As Aake' ni aq'on ku' tzan unq'a b'a'nile' skajayil, tan ye'l itxumb'al Aak nijalpe'. Pet ech chit itxumb'al Aake' ti' chit ib'ene'.

As ab'il uva' la kuxh tab'i viyol u Tiixhe' as ye' la inima, as eela kuxh u uxhchile' tuk' umaj naj uva' kat kuxh isaji tib' tu umaj ilonb'al. As tul kat el ve't ch'u'l naj vatz u ilonb'ale', as oora kuxh kat sotz ve't vika'y naje' sk'u'l.

Pet nitxuq'txun u Kub'aal Tiixhe' ti' uva' la lochpu unq'a talaj intxa'e' uva' ye'l itxutx ib'aal, tuk' unq'a txakay ixoje' tul uva' nipaleb'e unq'a k'axk'oe', tan a'e' uva' b'a'n vatz Aak. As nitxuq'txun Aak unpajte ti' uva' ye' la kuyansa qib' ta'n u va'lexhe' uve' nib'an unq'a uxhchile' uva' a' kuxh u vatz tx'ava'illa txumb'ale' eq'omal sta'n.

As tul uva' la chukax txumb'al sqi' ti' uva' la paavin o', as ye' la qitz'a uva' a' u Tiixhe' ni b'anon, tan ye'l tetz Aak ti' u va'lexhe'. As ye'xh jatu la ichuk Aak txumb'al sqi' ti' uva' la paavin o'. Pet a' u tacha'v u kuchi'ole' ni chukun txumb'al sqi' skujununila ti' teq'ot o' ti' kub'anat u va'lexhe'

As u qitz'in qatzike' uva' ootzimal sta'n uva' techal la lochpi ta'n u Tiixhe', tan ye'l tetz at vatz u tx'ava'e', as la txuq'txun ve'te', tan kat toksa ve't u Tiixhe' iq'ii.