I Versetti Biblici più popolari da 1 Yõwánĩ 4

Condividi

Õzõ nĩ õlẽ Ôvârí trá rî, nĩ âꞌdô gõꞌdá kpá gólâ rî ũrı̣̃ ꞌẽꞌá ꞌdĩ ángô tí yã? Õzõ ngá lẽlẽ Ôvârí kâ ẽêdê ãnî pı̣̃pı̣̂sı̣́lı̣́ trá rî, kôrô drílâ ũrı̣̃ drõzó vólé ãnî pı̣̃pı̣̂sı̣́lı̣́ ꞌásĩ. Õjílã rî ũrı̣̃ ꞌẽlé Ôvârí rî tãsĩ nõ rî, tãlâ Ôvârí ꞌê lâŋõ fẽlé gólĩyî drí rî drí. Õzõ gõꞌdá nĩ õꞌê Ôvârí rî ũrı̣̃ trá rî, ꞌdĩî ngá lẽlẽ Ôvârí kâ êdé drẽ ãnî pı̣̃pı̣̂sı̣́lı̣́ dódó kô.

Ámâ mvá yî, õzõ ãꞌdô trá ĩtí rî, ũrı̣̃ õꞌê ãnî kô. Ãnî trá Ôvârí rî mvá yî ĩꞌdî. Õjílã gólĩyî õnjõ ꞌbá ró ꞌdĩ ꞌbá yî îcá ĩyî ãnî âdólé kô, tãlâ Ôvârí rî rĩlí ãnî pı̣̃pı̣̂sı̣́lı̣́ ꞌá gõꞌdá rĩꞌá mbârâkã fẽlé ãnî drí. Gõꞌdá mbârâkã Ôvârí kâ rî rĩꞌá gạ̃rạ̃ mbârâkã Sãtánã rĩ ꞌbá fẽlé Yésũ rî ạ̃jú-ꞌbá-ãzí yî drí rî kâ drı̣̃ı̣̂ sĩ.

Mã âꞌdô mbârâkã ûsúꞌá Ôvârí rî lẽzó gõꞌdá õjílã ãzí lẽzó rî ãꞌdô ꞌásĩ yã? Ôvârí rî nĩ mbârâkã ꞌdî ꞌbá yî fẽlé ãmâ drí, tãlâ gólâ lẽ ãmâ kó trá sı̣́sı̣́ drẽ ãkpãkãꞌdã mã îtõó drẽ gólâ rî lẽlé kô.

Ámâ rû-lẽ-ãzí yî, ãmâ drí ãmâ ãzí-ãzí yî lẽlé. ꞌDĩî ngá gólâ tã lâ drí lậvũlı̣́ gạ̃rạ̃ rî ĩꞌdî, tãlâ ngá lẽlẽ ꞌdî âꞌdô Ôvârí ngá lésĩ. Õzõ nĩ õrî trá ãnî ãzí-ãzí yî lẽlé rî, ꞌdĩî ãnî trá Ôvârí rî mvá yî ĩꞌdî. ꞌDĩî rî kpá âꞌdálâ kĩ, pạ̃tı̣́-pạ̃tı̣̃ ró, nĩ lẽ tã trá Ôvârí ꞌá, gõꞌdá kpá nĩ nı̣̃ Ôvârí rî âꞌdô-âꞌdô trá.

Ĩtí rî gõꞌdá, õjílã gólâ íyî ãzí-ãzí yî lẽ ꞌbá kô rî, ꞌdĩî gólâ nı̣̃ı̣́ Ôvârí kô, tãlâ Ôvârí íyîngá ngá lẽlẽ lı̣́pı̣̂ ꞌî.

Mã îcá kô ngá lẽlẽ pạ̃tı̣́ı̣̃ rî lạ́tı̣̂ lâ ûsúlı̣́ ngá lẽlẽ ãmákâ Ôvârí drí rî sĩ. Bê-rî mã âꞌdô ngá lẽlẽ Ôvârí kâ ãmâ drí rî ndrẽꞌá ĩꞌdî tã âꞌdâ ngá lẽlẽ kâ ró ãmâ drí ꞌẽlé. Ôvârí âjô íyî mvá ꞌbã ꞌbá bê kó ãlô, gõꞌdá gólâ drí lẽlé kpá rõô rî drãlé ãmâ võ ꞌá drı̣̃ tĩ ꞌbá ró.

Ámâ rû-lẽ-ãzí yî, õzõ gõꞌdá Ôvârí õlẽ ãmâ trá tákányĩ ĩtí rî, ãmâ drí gõꞌdá ãmâ ãzí-ãzí yî lẽlé kpá nyé õzõ Ôvârí drí ãmâ lẽrẽ kâtí.

Tã gólâ ngá lẽlẽ Ôvârí kâ âꞌdá ꞌbá ãmâ drí rî ĩꞌdî nõ, Ôvârí âjô íyî mvá ꞌbã ꞌbá bê kó ãlô, Yésũ Krístõ, ânĩlí ãngó nõ ꞌá, ãꞌdô ró ãmâ drí rĩzó bê zãâ gbạ́dú ạ̃dũkũ ãkó gólâ sĩ.

Õzõ gõꞌdá nĩ õꞌbã õjílã ãzí lôvó kô rî, nĩ âꞌdô âtáꞌá lâ kĩꞌá nĩ rî, yĩ õlẽ Ôvârí trá pı̣̃pı̣̂sı̣́lı̣́ ãlô sĩ ꞌdî kó ángô tí yã? ꞌDĩî trá õnjõ ꞌî. Õzõ mã õlẽ ãmâ ãzí-ãzí yî gólĩyî ãmâ drí rĩꞌá ndrẽlâ cú ãmâ lı̣̃fı̣́ sĩ rî kô rî, mã âꞌdô ãmákâ gõꞌdá Ôvârí ãmâ drí ndrẽlé kô rî lẽꞌá ángô tí yã?

ꞌDĩî kâ rî tí rî, õzõ nĩ õlẽ tã trá kĩꞌá nĩ rî, pạ̃tı̣́-pạ̃tı̣̃ Yésũ Krístõ Ôvârí rî mvá ꞌî rî, gõꞌdá tã lâ âtá bê õjílã drí rî, ꞌdĩî ãnî trá õjílã Ôvârí kâ pạ̃tı̣́ı̣̃ lâ ꞌî, gõꞌdá kpá ãnî trá ngá ãlô ró Ôvârí bê.

Tã gólâ Ôvârí drí ꞌbãlé ãmâ drí ꞌẽlé rî ĩꞌdî nõ, õzõ õjílã ãzâ õlẽ Ôvârí rî lẽlé pạ̃tı̣́-pạ̃tı̣̃ ró rî, ꞌdõvó gólâ õlẽ íyî ãzí-ãzí yî zãlô, tãlâ ãmâ Ôvârí rî mvá yî ĩꞌdî.

Ámâ rû-lẽ-ãzí yî, má âtâ ãnî drí, ãnî lı̣̃fı̣́ õmbâ ãnî rú, tãlâ õjílã dũû trá rĩꞌá ĩyî nĩꞌá tã âtá bê kĩ, tã ĩyî drí rĩꞌá pẽlâ rî ãâꞌdô Líndrí Tãndí Ôvârí kâ rî tı̣́ sĩ. Õzõ gólĩyî ãâtâ tã rî ꞌdĩ ꞌbá yî trá ĩtí rî, nĩ lẽ tã drẽ kôrô ꞌwãâ tã gólĩyíkâ ꞌá kô. Bê-rî nĩ ârî tã õjílã rî ꞌdĩ kâ zãlô dódó nĩ nı̣̃ ró bê, ngãtá tã gólâkâ ꞌdĩ âfõ Líndrí Tãndí Ôvârí kâ ngá lésĩ pạ̃tı̣́ı̣̃ ró, ngã tã ꞌdî ânĩ íyîngá líndrí õnjí ngá lésĩ. Ĩtí rî, lạ́tı̣̂ gólâ ãnî drí õjílã gólâ Líndrí Tãndí Ôvârí kâ bê rî nı̣̃zó rî ĩꞌdî nõ. Õzõ õjílã ãzâ ãâtâ tã trá kĩ, pạ̃tı̣́ı̣̃ Ôvârí âjô Yésũ Krístõ nĩ ânĩlí ãngó nõ ꞌá õjílã mvá ró rî, ꞌdĩî õjílã rî ꞌdĩ trá Líndrí Tãndí Ôvârí kâ bê yí ꞌá pạ̃tı̣́-pạ̃tı̣̃ ró.

Gõꞌdá õzõ õjílã ãzâ ãâtâ tã kĩ, Ôvârí ãâjó Yésũ nĩ ãngó nõ ꞌá õjílã mvá ró kô rî, ꞌdĩî õjílã rî ꞌdĩ Líndrí Tãndí Ôvârí kâ ãkó yí ꞌá. ꞌDĩî õjílã rî ꞌdĩ trá ạ̃jú-ꞌbá-ãzí Yésũ Krístõ kâ rî ĩꞌdî, õzõ má drí âtárẽ lâ trá ãnî drí ạ̃kû ró rî kâtí, kĩꞌá nĩ rî, ạ̃jú-ꞌbá-ãzí Yésũ kâ âꞌdô âcáꞌá ãngó nõ ꞌá rî. Ạ̃jú-ꞌbá-ãzí rî ꞌdĩ âcâ trá, gõꞌdá trá rĩꞌá mbârâkã fẽꞌá õjílã ãngó nõ ꞌá nõ gólĩyî rû jã ꞌbá trá Ôvârí rú rî ꞌbá yî drí.