I Versetti Biblici più popolari da Ruma 16

Condividi

Ne emun iyan heini egkehitavù, is Megbevayà he iyan puunà te kelinew, meg̵aan din en edhimuwa he mepurung niw mezaag si Setanas. Berakat he ikeg̵ag̵ew kew te Nengazen tew he si Jesu Kristu.

Menge suled, edhengyuen ku keniyu he mebantey kew, ne likayi niw is menge etew he edsamuk te kebpekidsevaha niw wey kedtuu niw te menge tumutuu su edsupaken dan is tutuu he tuluuwen he impenurù keniyu.

Su is menge etew he ed-ulaula te iring kayi, kenè dan edtumanen is sug̵ù te Nengazen tew he si Kristu, kekenà, iyan dan edtumanen is kandan he menge suat. Pinaag̵i te ketau zan te kegkag̵i wey pinaag̵i te mekempet he egkeg̵iyen dan, egkeekalan dan is isip te menge paglung he etew.

Edelig̵en tew is Megbevayà! Pinaag̵i te Meupiya he Tudtulanen he ibpenudtul ku he iyan is mehitenged ki Jesu Kristu, wey pinaag̵i te tuluuwen he neug̵et he timpu is ked-elesa zuen te Megbevayà, egkehimu he edheg̵eten din is kedtuu niw. Ne haazà is tuluuwen he in-eles dengan, impezayag en te Megbevayà pinaag̵i te menge surat dengan te menge ebpeneuven din. Ne g̵eina te iyan sug̵ù te wazè din kemetayen he Megbevayà, idsangyew en heini is tuluuwen diyà te menge etew ziyà te minsan hendei su wey meketuu is langun ne ebpeketuman te menge sug̵ù din. Is sebsevaha zà he Megbevayà he iyan dà nesayud te minsan hengkey, berakat he wazà pidtemanan te kedelig̵a kandin pinaag̵i ki Jesu Kristu.