2 RAJA'-RAJA' 22
22
Raja' Josia, raja' ru Jiuda
(2 Tun. 34:1-2)
1 #
Jir. 3:6
Umur ru Raja' Josia balu' ngambilor paat ra io nasauk ra raja' ru Jiuda. Namarinta io ra Jirusalim buoi talu ngoopor am rondo' ngambilor. Ina' nano ininggalanan ri Jidida anak ri Adaya intor ra bandar Bojkat. 2Nambaal Raja' Josia ra atan ondo' mapabansuk ra guang ru Tuhan. Minaya' io ra binaal moonsoi ru kinamatuaan nali, Raja' Daut, ondo' giminagaya' toojo ra ngaangai' ukum ri Aki Kapuuno'.
Natuum saguli' Kitab ru Ukum
(2 Tun. 34:8-28)
3Paat ra bilor koopor am balu' ru pamarintaan nano, nanusub Raja' Josia ra mamamatik ru istana, i Sapan anak ri Ajalia, iono akupu ri Misulam, minongoi ra Baloi ru Tuhan. Kon ru Raja' Josia, 4“Ongoi no ra Tingganai maayo Imam Ilkia, am kitaako' pambalaan intor ra suang ru ruit intor ra mamagun ondo' inapu ru imam-imam ondo' nangandoi giu' ra kulobon ru Baloi ru Tuhan. 5Susubo' io manaak ra ruit no ra ulun ondo' mantamung ra kandoi mamuna' giu' ra Baloi ru Tuhan. Ulun-ulun mantamung no musiti' mambayar ra gaji' 6ru manukang ra tataun, mananambaloi, am manukang ra batu, am niayuk mambali ra tataun am batu ondo' makapakuan. 7#2 Raj. 12:15Ulun-ulun mantamung ra kandoi no mabanis toojo guang. Ginio ra kalo pana manaak ilo ra pambalaan ru ruit.”
8Pinasaboi ri Sapan ragu ru raja' no ri Ilkia, am binalaan ri Ilkia i Sapan ra natuum no kitab ru Ukum giu' ra ralalom Baloi ru Tuhan. Pataako' ri Ilkia kitab no ri Sapan, am basaa' boo ri Sapan. 9Kopongo raginio saguli' i Sapan am pambala' ra raja', kono, “Ulipon-ulipon muno nangalap noyo ra ruit ondo' soroi giu' ra ralalom Baloi ru Tuhan am pinataak ginio ra ulun ondo' mantamung ra kandoi mamuna' ra giu' no.” 10Kono poyo, “Ilai' kitab ti ondo' pinataak ri Ilkia raki'.” I Sapan pana nambasa' ra kitab no ra saang ru raja'.
11Pokorongog raja' ra suang ru kitab no, rinilak no bayang nano sabap ra mangiluk. 12Kono ra Imam Ilkia, ri Agikam anak ri Sapan, i Akbor anak ri Mika, i Sapan, iono mamamatik ru istana, am ri Asaya, iono pagawai saujor ru raja', 13“Ongoi no pakitulu' intor ra Tuhan ra tayar kuno am ra tayar ru ngaangai' mamagun ru Jiuda intor ra pangilaan ru kitab ti. Siminangit Tuhan ritakau sabap ra kinamatuaan takali kalo nambaal ra atan ondo' tinulisan ra ralalom ru kitab ti.”
14I Ilkia, i Agikam, i Akbor, i Sapan am i Asaya minongoi pakitulu' intor ra sangulun ruandu' ininggalanan ri Gulda. Io sangulun nabi ruandu' ondo' minayan giu' ra namagunan bagu giu' ra Jirusalim. Ralaki nano i Salum, anak ri Tikwa, akupu ri Gargas, iono manalingapu ra bayang ru sambayang giu' ra Baloi ru Tuhan. Tinunung nilo atan ondo' nasauk no ri Gulda. 15I Gulda pana nanusub boo risilo sumaguli' ra raja' am nampasaboi ra 16ragu ru Tuhan koon raginio, “Mangukum Aku ra Jirusalim am niayuk ngaangai' ru mamagun nano koson ra ondo' tinulisan ralalom ru kitab ondo' binasa' ru raja'. 17Nangimpai ilo Raki' am nampataak ra taak simbalui ra tuhan-tuhan ra bokon. Napasingkual ilo ra sangit Kuno sabap ra ngaangai' ru binaal nilo. Raino sumangit Aku ra Jirusalim, am sangit Kuno kalo lumonggo'-longgo'. 18Kaa' intor ra Raja' Josia, koon raginio ragu ru Tuhan, i Aki Kapuuno' ru Israil: Rinongog mu suang ru kitab no, 19am okou pana timinalikur intor ra tula am mininggana' kou ra saang Kuno. Rinilak mu bayang muno am niayuk nantangi' paat ra okou nangkirongog ra lolob Kuno ra Jirusalim am mamagun nano. Mangukum Aku ra Jirusalim ra masaran saboi inggalan nano masauk ra rondo' ulas, kaa' nokorongog Aku noyo ra pakiasian muno. 20Ginio ra baal ondo' baalon Kuno ra Jirusalim kalo masauk buoi okou maayag. Iowon Tokou matoi ra kaansayan.”
Ulun-ulun sinusub no siminaguli' ra Raja' Josia am nampasaboi ra tanou raginio.
Valið núna:
2 RAJA'-RAJA' 22: TMT
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
Hakcipta © Bible Society of Malaysia, 2013.