1 TIKRONIKA 20
20
Ta muti wa Raba loko wu mbundzuxiwa.
1Lembe leri tlhandlamaka, hi nkarhi lowu tihosi ti humaka nyimpi, Yowabu a fambisa nyimpi, a ya hlasela tiko ra vana va Amoni, a rhendzela Rhaba, kambe Davhida a sala eYerusalema; Yowabu a hlula Raba, a wu mbundzuxa. 2Davhida a teka harhi ya vuhosi ya hosi ya vona enhlokweni ya yona, a yi kuma yi ri ya talenta ya nsuku, yi namekiwile hi maribye ya risima; kutani yi vekiwa enhlokweni ya Davhida; a teka ni xuma lexikulu ngopfu emutini, a famba ra xona. 3Loko va ri vaaki va wona, a va humesa, a va tirhisa emasaheni, ni le tipikeni ta nsimbhi, ni le swihlokeni. Davhida a endlisa sweswo emitini hinkwayo ya vana va Amoni. Kutani Davhida a tlhela a muka eYerusalema, ni tiko hinkwaro.
Vafilista va hluriwa.
4Endzhaku ka sweswo a ku ri ni ku lwa ni Vafilista eGezere. Sibekayi, wa Huxa, a dlaya Sipayi, un'wana wa vana va Rafa. Kutani Vafilista va tsongahatiwa.
5A ku ri ni ku lwa kun'wana ni Vafilista, Elihanani, n'wana Yayiro, a dlaya Lahimi, makwa Goliyadi, wa Gati, la ngi a ri ni tlhari leri mbhingo wa rona wu fanaka ni mhandze ya muluki.
6A ku ri ni ku lwa kun'wana eGati. Wanuna wa xiyimo lexikulu, la ngi a ri ni tintiho ta ntlhanu na rin'we emavokweni ni le milengeni, ti ri ta makume mambirhi na mune; na yena a a ri ntukulu wa Rafa. 7Kakuloko a sandza Israele, Yonatani, n'wana Ximeya, makwa Davhida, a n'wi dlaya. 8Vavanuna lava a va ri vana va Rafa, wa Gati; va dlawa hi voko ra Davhida, ni voko ra malandza ya yena.
Valið núna:
1 TIKRONIKA 20: TSO29
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.