Bula lə Israɛlje 2
2
Rəw loo-sije
1Njesigənea̰ ula Moyis gə Aaro̰ pana: 2Ŋgan Israɛlje lé nana kara a si gə kudu njérɔje ləa-ləa mbɔr nékɔr gin bɔbeeje-je’g, tɔɓəi d’a si kwɔji ne dɔ kəi-kubu-kiŋga-na̰ lé ləm, gə gugu ne dəa sub ləm tɔ. Nɛ d’a si gə kur dee ɗegse ɓa.
3Par gə́ bər lé ginkoji Judaje gə nékɔr gin dee ləm, gə kudu njérɔje lə dee ləm tɔ ɓa d’a si keneŋ. Lée neelé ɓa to loo si Nason, ŋgolə Aminadab gə́ to mbai dɔ ŋgalə Juda lé, 4gə kudu njérɔje ləa gə́ d’as dəwje tɔl-dɔg-loo rɔ-siri giree-sɔ gə dɔ dee tɔl-misa̰ (74.600), gə goo tura gə́ deḛ tura bula lə dee lé ya. 5Ginkoji Isakarje ləm gə ginkoji Jabilo̰je ləm tɔ lé ɓa d’a si mbɔr dee’g ya, 6ginkoji lə Isakarje lé Netaneel, ŋgolə Suar ɓa to mbai dɔ dee, yeḛ gə kudu njérɔje ləa lé d’as dəwje tɔl-dɔg-loo rɔ-mi giree-sɔ gə dɔ dee tɔl-sɔ (54.400), gə goo tura gə́ deḛ tura bula lə dee lé, 7ginkoji Jabilo̰je lé Eliab, ŋgolə Helo̰ ɓa to mbai dɔ dee ya. 8Yeḛ gə kudu njérɔje ləa lé d’as dəwje tɔl-dɔg-loo rɔ-mi giree-siri gə dɔ dee tɔl-sɔ (57.400), gə goo tura gə́ deḛ tura bula lə dee lé tɔ. 9Bula lə njé gə́ Juda lai, gə goo tura gə́ deḛ tura dee lé ɓa nee: Dəwje tɔl-dɔg-loo-tɔl gə dəa rɔ-jinaijoo giree-misa̰ gə dɔ dee tɔl-sɔ (186.400), gə goo kudu njérɔje lə dee. Deḛ ɓa d’a njaa kédé no̰ mar deeje’g.
10Par gə́ dɔkɔl lé, njé’g lə Rubḛ gə kudu njérɔje lə dee d’a si gel nékɔr gin dee’g ya. Lée neelé ɓa Elisur, ŋgolə Sedeur gə́ to mbai dɔ ŋgalə Rubḛje, 11gə kudu njérɔje ləa gə́ d’as dəwje tɔl-dɔg-loo rɔ-sɔ giree-misa̰ gə dɔ dee tɔl-mi (46.500), gə goo tura gə́ deḛ tura bula lə dee lé d’a si keneŋ. 12Ginkoji Simeo̰je d’a si mbɔr deḛ gə́ kára’g, Selumiel gə́ ŋgolə Surisadai lé ɓa to mbai dɔ ŋgalə Simeo̰je ya, 13yeḛ gə kudu njérɔje ləa gə́ d’as dəwje tɔl-dɔg-loo rɔ-mi giree-jinaikara gə dɔ dee tɔl-munda (59.300), gə goo tura gə́ deḛ tura bula lə dee lé, 14tɔɓəi ginkoji Gadje d’a si mbɔr deḛ gə́ raŋg’d, Eliasap, ŋgolə Ruel lé ɓa to mbai dɔ ŋgalə Gadje ya, 15yeḛ gə kudu njérɔje ləa gə́ d’as dəwje tɔl-dɔg-loo rɔ-sɔ giree-mi gə dɔ dee tɔl-misa̰ gə rɔ-mi (45.650), gə goo tura gə́ deḛ tura bula lə dee lé. 16Bula lə njé’g lə Rubḛ lai gə́ deḛ tura lé d’as dəwje tɔl-dɔg-loo-tɔl gə dəa rɔ-mi giree-kára gə dɔ dee tɔl-sɔ gə rɔ-mi (151.450), gə goo kudu njérɔje lə dee lə dee. Deḛ ɓa d’a njaa gə́ njékorè goo deeje gə́ njekɔm’g joo.
17Tɔɓəi Ləbije gə́ loo-si dee to loo gə́ dana bab’g mbuna loo-si deeje’g lé d’a kḭ kodo kəi-kubu-kiŋga-na̰: Gə goo loo-si dee si dee ɓa d’a njaa ne loo kaw dee’g gə lée-lée ləm, gə goo nékɔr gin dee gin dee ləm tɔ.
18Par gə́ dɔ-gó lé njé’g lə Eprayim gə kudu njérɔje lə dee d’a si gel nékɔr gin dee’g ya. Lée neelé ɓa Elisama gə́ ŋgolə Amiud gə́ to mbai dɔ ŋgalə Eprayimje, 19gə kudu njérɔje ləa gə́ d’as dəwje tɔl-dɔg-loo rɔ-sɔ gə dɔ dee tɔl-mi (40.500), gə goo tura gə́ deḛ tura bula lə dee lé d’a si keneŋ. 20Ginkoji Manasəje d’a si mbɔr Eprayimje’g ya, Gamaliel, ŋgolə Pedasur gə́ to mbai dɔ ŋgalə Manasəje, 21gə kudu njérɔje ləa gə́ d’as dəwje tɔl-dɔg-loo rɔ-munda giree-joo gə dɔ dee tɔl-joo (32.200), gə goo tura gə́ deḛ tura dee lé d’a si keneŋ, 22tɔɓəi ginkoji Bḛjamije d’a si mbɔr deḛ gə́ raŋg’d tɔ, Abidan gə́ ŋgolə Gideoni, gə́ to mbai dɔ ŋgalə Bḛjamije, 23gə kudu njérɔje ləa gə́ d’as dəwje tɔl-dɔg-loo rɔ-munda giree-mi gə dɔ dee tɔl-sɔ lé (35.400), gə goo tura gə́ deḛ tura dee ya. 24Bula lə njé’g lə Eprayim lai gə goo tura gə́ deḛ tura dee lé d’as dəwje tɔl-dɔg-loo-tɔl-giree-jinaijoo gə dɔ dee tɔl (108.100), gə goo kudu njérɔje lə dee lə dee. Loo njaa lə dee lé deḛ nja d’a to njékorè goo deeje gə́ njekɔm’g munda.
25Par gə́ dɔgel lé njé’g lə Dan ɓa d’a si keneŋ gel nékɔr gin dee’g gə kudu njérɔje lə dee ləm tɔ. Lée neelé ɓa Ahiejer, ŋgolə Amisadai, gə́ to mbai dɔ ŋgalə Dan, 26gə kudu njérɔje ləa gə́ to dəwje tɔl-dɔg-loo rɔ-misa̰ giree-joo gə dɔ dee tɔl-siri (62.700), gə goo tura gə́ deḛ tura dee lé d’a si keneŋ ya. 27Ginkojije lə Aser ləm gə gin kojije lə Neptali d’a si mbɔr Dan’g: Pagiel gə́ to mbai dɔ ŋgalə Aser, 28gə kudu njérɔje ləa lai gə́ tura dee lé to dəwje tɔl-dɔg-loo rɔ-sɔ giree-kára gə dɔ dee tɔl-mi (41.500), 29tɔɓəi Ahira, ŋgolə Enan, gə́ to mbai dɔ ŋgalə Neptalije lé, 30gə kudu njérɔje ləa gə́ d’as dəwje tɔl-dɔg-loo-rɔ-mi-gir-dee-munda gə dɔ dee tɔl-sɔ (53.400), gə goo tura gə́ deḛ tura dee lé. 31Bula lə njé’g lə Dan lai gə goo tura gə́ deḛ tura bula lə dee lé d’as dəwje tɔl-dɔg-loo-tɔl gə dəa rɔ-mi giree-siri gə dɔ dee tɔl-misa̰ (157.600) tɔ. Loo njaa lə dee lé deḛ nja d’a kaw gə́ rudu deeje gə goo nékɔr gin dee tɔ.
32Deḛ nja ɓa to Israɛlje gə́ deḛ tura bula lə dee, gə goo kəije lə bɔ deeje-je lé. Deḛ lai gə́ tura bula lə dee, gə́ d’isi gə kudu dee kudu dee, gə goo kudu njérɔje lə dee lé d’aḭ dəwje tɔl-dɔg-loo-tɔl-misa̰ giree-munda gə dɔ dee tɔl-mi gə rɔ-mi (603.550). 33Gə goo ndukun lə Njesigənea̰ gə́ yeḛ un ar Moyis lé ndá Ləbije lé dee tura bula lə dee gə Israɛlje na̰’d el.
34Néje lai gə́ Njesigənea̰ un ndia dɔ’g ar Moyis lé Israɛlje ra ya. Togə́bè ɓa deḛ d’isi ne gə goo nékɔr gin dee gin dee ləm, deḛ d’ḭ gə mba njaa ne rəbee gə goo gel-bɔje lə nana kara ləm tɔ.
Valið núna:
Bula lə Israɛlje 2: SBA2015
Áherslumerki
Deildu
Afrita
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.