2 Njé gə́ Kɔrḭtə 11
11
Pool ula rəa ndubu mbata lə Mbaidɔmbaije
1Oiyo, ta gə́ m’a gə pa lé lé seḭ ooje gə́ ta mbə lam kara ma m’ndigi kar sí taaje ya. Ma m’gər gao seḭ a taaje ya. 2Mbata kəm əḭ dɔ sí’g gə kəmkəḭ ka̰ Ala. Ma m’ar sí taaje Kristi gə́ ŋgaw-kar gə mba kam m’teḛ sə sí rɔ Kristi asəna gə ŋgoma̰də gə́ rəa àr ŋgad-ŋgad gə́ gər ŋgaw el ɓəi. 3Nɛ lé bèe kara ma m’ɓəl nà banelə to gə́ li ra gosɔyèr su ne kəm Ebe su-su lé takə̰jije lə sí kara a kar sí ndəmje ne kar sí ubaje ne ta lə Kristi gə́ seḭ ndaje meḛ sí kaḭ dəa’g lé kya̰je.#Gn 3.1-5,13 4Ɓó lé dəw ree ila mber ta lə Jeju gə́ raŋg ar sí ɓó yeḛ gə́ jeḛ nja j’ila mber ta ləa j’ar sí lé el ləm, əsé ɓó lé seḭ taaje Ndil gə́ raŋg ɓó yeḛ gə́ seḭ taaje mba̰ lé el ləma, əsé d’ula sí Tagə́maji gə́ raŋg ɓó yeḛ gə́ seḭ ɔmje meḛ sí dɔ’g lé el ləm tɔ ndá seḭ a ndigije səa ya.
5Njékaḭkulaje neelé gə́ to dəwje gə́ boo lé ma m’oo to gə́ deḛ dum-ma gə né kára kara el. 6Ɓó lé tapam lé to tapa dəw gə́ kari ba ndá kara né gə́ wɔji dɔ gosonégər lé ma m’to gə́ babee tɔ, yee ɓa, ma m’tɔji sí ne ta-ta m’ar sí ooje gao ya loo gə́ ma m’nai ne mbuna sí’g lé.
7Loo gə́ ma m’ula sí Tagə́maji lə Ala ɓa ma m’tɔji sí kari kari-kari ləm, ma nja m’oso ne kul gə mba kun sí kunda sí ne gə́ tar ləm tɔ lé see to né gə́ to lée’g el ɓa ma m’ra wa. 8Kula gə́ m’ra mbuna sí’g lé Eglisəje gə́ raŋg ɓa busu néje lə dee d’uga ne dɔ jim. Loo gə́ ma m’isi mbuna sí’g ɓa ndòo né ram ndá m’aw kabee ji dəw kára kara el tɔ, 9mbata ŋgako̰ síje gə́ d’ḭ Masedoinə ɓa d’am né gə́ m’aw ndée. Lé riri gə́ lalm kara ma m’ɔg rɔm kaw kabee ji sí’g tɔɓəi m’a kɔg rɔm dɔ’g bèe ya saar-saar ya tɔ#Plb 4.15-18. 10Ta neelé gə́ ma m’ti ne rɔm dɔ’g lé dəw kára kara mee dəb ɓeeko̰ gə́ Akai lé a kɔgm dɔ’g el, yee ɓa to ta gə́ m’ula sí gə goo kankəmta lə Kristi gə́ to məəm’g lé. 11See ban ɓa m’pa bèe wa. See mba kunda gə́ m’unda sí dan kəm’g el ɓa m’pa ne bèe wa. Wah! Ala gər gao!
12Nɛ né gə́ m’ra lé m’a ra kəm gə́ kédé ya ɓəi mba kɔg ne deḛ gə́ saŋg loo mba tɔi rɔ dee lé mba kar néje gə́ deḛ ti ne rɔ dee dɔ’g lé a to asəna gə ka̰ síjeḛ bèe tɔ. 13Dəwje neelé to njékaḭkulaje gə́ ŋgɔm gə njékulaje gə́ d’ər kəm dəwje gə́ tel rɔ dee asəna gə njékaḭkulaje lə Kristi. 14Né gə́ deḛ ra lé to kəm kar dəw ndəb ne gə mbəa el mbata Njekurai nja kara tel rəa asəna gə kura gə́ dara gə́ ka̰ lookàr tɔ. 15Bèe ndá loo gə́ kuraje ləa tel turu rɔ dee gə́ kuraje gə́ ka̰ meekarabasur ndá to né gə́ kəm kaar dəw ndəb dɔ’g el. Bo̰ néra dee gə́ a kɔs ta dee’g lé a to gə goo kula ra dee ya.
Nékəmndooje ɓəd-ɓəd gə́ ra Pool lé
16Ma m’pa gɔl kára tɔɓəi, maji kar dəw kára kara oom gə́ mbə-dəw el. Esé maji kar sí wamje gə́ rɔ sí’g asəna gə mbə-dəw mba karm-ma nja m’ti rɔm bəl tɔ ŋga ɓa. 17Loo gə́ ma m’pata gə́ nuŋga so m’ti ne rɔm lé to tapa dəw gə́ ndilee igee ɓó to gə goo torndu Mbaidɔmbaije el. 18To gə́ dəwje gə́ na̰je bula ti rɔ dee dɔ néje gə́ naŋg neelé ma kara m’a ti ne rɔm togə́bè tɔ. 19Mbata seḭ gə́ toje njékəmkàrje lé seḭ ḭje rad ndigije ta lə mbəje gə́ ndigi par. 20Ɓó lé deḛ d’wa sí ɓər əsé deḛ rum sí əsé deḛ ɓogo sí əsé deḛ d’uba dɔ sí d’isi tar əsé deḛ kunda kwɔji sí kara yee ɓa seḭ ndigije ya. 21Ta nee ɓa ma m’pa m’ila ne rɔkul dɔ síjeḛ’g ya mbata jeḛ lé nai gə́ njérəmje mbuna sí’g.
Nɛ lé bèe kara ɓó lé dəw kára aw gə né gə mba ti rəa dɔ’g ndá ma kara m’aw gə né mba ti ne rɔm dɔ’g tɔ. (Ta neelé m’pa asəna gə dəw gə́ ndilee igee lé tɔ). 22See deḛ to Ǝbrəje wa. Ma kara ma m’to Ǝbrə ya tɔ. See deḛ to Israɛlje wa. Ma kara m’to Israɛl nja tɔ. See deḛ to ŋgaka Abrakam lé wa. Ma kara m’to ŋgoka Abrakam ya tɔ. 23See deḛ to kuraje lə Kristi wa. (Ma m’pata asəna gə dəw gə́ ndilee igee.) Ma lé m’to kura lə Kristi gə́ ur dɔ ɓəi gə goo kula ramje gə́ to yaa̰ unda ka̰ dee-deḛ ləm, gə goo kunda gə́ deḛ kundam yaa̰ unda dee-deḛ ləma, gə goo kisi gə́ m’isi daŋgai’g gɔl bula unda dee ləm tɔ. Ta-ta m’isi ta yoo’g ləm#NNk 16.23, 24gɔl mi lé Jibje kundam gə ndəi ji dee rɔ-sɔ-sɔ, nɛ d’ɔr təa kára-kára ləm#TtG 25.3, 25deḛ kundam gə kag kɔb-kɔb gɔl munda ləm, deḛ tilam gə kɔri-ər gɔl kára ləm, to ndii dɔm’g gɔl munda ləma, m’to dan mán bélm’g m’ar loondul dɔm’g jib ɓa loo àr dɔm’g yərərə ɓəi ləm tɔ#NNk 16.22, 14.19. 26Loo mbá gə́ m’aw bula lé m’uru ta yoo’g dan baa’g ləm, m’uru ta yoo’g dan gayim-ɓogoje’g ləm, m’uru ta yoo’g dan njékama’g ya ləm, m’uru ta yoo’g mbuna njépole-magəje’g ləm, m’uru ta yoo’g dan ɓee-booje’g ləm, m’uru ta yoo’g dɔdilaloo’g ləm, m’uru ta yoo’g dan mán bélm’g ləma, m’uru ta yoo’g mbuna njétakorije’g gə́ turu rɔ dee gə́ njénojije ləm lé ləm tɔ#NNk 9.23, 14.15. 27M’ula rɔm ndubu m’ra ne kula gə́ kədərə ləm, gɔl bula ɓi wa kəm loondul’g el ləm, m’wəi yoo-ɓoo gə yoo-kunda-mán ləm, m’ɔg məəm ɓoo gɔl bula ləm, m’wəi yoo-kul ləma, nékɔn-rɔ ləm godo ləm tɔ. 28Ges néje gə́ kəm pa el nai bura ɓəi tɔ. Tɔɓəi gə ndɔm-ndɔm məəm to kərm dɔ Eglisəje’g lai ya. 29See na̰ ɓa to gə́ yɔ-dəw lé ɓa a kulm gə́ mán wa. See na̰ ɓa oso gə́ koso ɓa məəm a ko̰m gə mbəa el wa.
30Ɓó lé m’a gə ti rɔm ndá m’a ti rɔm dɔ nérəmje’g ləm ya. 31Ala gə́ to Bɔ Mbaidɔmbaije Jeju ləm, gə́ to njedɔkaisəgərə gə ləbee-ləbee gə no̰ ləm tɔ lé yeḛ nja gər gao to gə́ ma m’pata ŋgɔm el. 32Mee ɓee gə́ Damas lé njeguburuɓee gə́ ta tor mbai Aretas lé ar dee ŋgəm tarəw ɓee-boo gə́ Damas mba kwam#NNk 9.23-25. 33Nɛ deḛ d’ilam mee karè’g tuga kúla ta’g d’unm d’ulam kəmbolè’g d’arm m’risi m’uru naŋg gir ndògo ɓa m’taa ne rɔm jia’g.
Valið núna:
2 Njé gə́ Kɔrḭtə 11: SBA2015
Áherslumerki
Deildu
Afrita
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.