MATTHEW 5
5
Pahar Pora Sikhai Diya
1Besi manuh jama kora ketiya dekhise, Tar ekta pahar uporte uthise, aru Tar bohi jua pasote chella khan Tar usor te ahhise.
Sorgo Anand Kotha
2Aru nijor mukh khuli kene taikhan ke sikhai dise aru koise:
3“Atma te dukhiya manuh ashish, kilemane sorgo rajyo taikhan laga ase.
4“Mon dukh hoi kene kanda khan ashish, kilemane tarkhan he anando pabo.
5“Nomro manuh khan ashish, kilemane taikhan he prithibi laga uttarodhikar pabo.
6“Dharmikota karne kon pora bhuk aru piyas lage, taikhan ashish, kilemane taikhan bhorta koridibo.
7“Doyalu khan ashish, kilemane tarkhan bhi doya pabo.
8“Mon safa khan ashish, kilemane taikhan pora Isor ke dekhibo.
9“Shanti ani diya khan ashish, kilemane tarkhan ke Isor laga bacha eneka matibo.
10“Dharmik kam nimite kon he kosto paise taikhan ashish, kilemane sorgo rajyo tar khan laga ase.
11“Ketiya manuh khan pora tumi ke dukh aru kosto diye, aru Isor nam nimite misa pora beya sob tumar uporte hali dibo, tetiya tumikhan ashish. 12Anando aru khushi koribi, kilemane sorgo te tumi laga inam dangor ase, kilemane eneka he tumar aage te thaka bhavobadi khan ke bhi taikhan pora kosto korise.”
Nimok Aru Puhor
13“Tumikhan prithibi laga nimok ase; kintu jodi nimok tu swad harai jale, keneka eitu laga swades ghurai anibo paribo? Etiya eitu eku kam te nahhibo, kintu phelai kene manuh khan laga theng pora chapai dibole he hobo.
14“Tumikhan prithibi laga puhor ase. Pahar te thaka sohor ekta lukabo naparibo. 15Nahole kon pora bhi saaki jolai kene tukuri pora bond kori narakhe, kintu nijor jagate rakhe, aru ghor te thaka manuh sob nimite ujala dibo. 16Eitu nisna tumar puhor dusera manuh khan aage te ujala koribole dibi, tetiya tarkhan pora tumar laga bhall kam dekhibo aru sorgo te thaka tumar Pitri nam stuti koribo.
Kanoon Hidho Hobole Khrista Ahhise
17“Kanoon aru bhavobadi hatai dibole moi ahhise eneka bhabna nakoribi; moi eitu hatai dibole nahoi kintu pongchabo nimite ahhise. 18Kilemane hosa pora, Moi tumikhan ke koi ase, Sorgo aru prithibi khotom nahua aage te, ekta akhor holebhi, nahole fut ekta holebhi, ki kanoon te likha ase eitu sob napongcha tak ekta bhi harai najabo. 19Eitu nimite, konuba manuh pora eitu hukum te likha huru ekta holebhi dhila kori kene, aru dusera ke bhi ulta koribole sikhai dise, tetiya sorgo rajyo te sob pora huru eneka matibo; kintu kon pora eitu hukum tu thik pora cholai ase, aru thik sikhai ase, sorgo rajyo te sob pora dangor eneka matibo. 20Kilemane moi tumikhan ke kobo, ketiya tak tumar dharmik jivon tu pondit aru Pharisees khan pora aage najai, tumi ketiya bhi sorgo rajyo te najabo.
Khong
21“Aage din te thaka manuh khan ke eitu kua tumikhan pora hunise, ‘manuh ke namorabi;’ aru ‘kon pora manuh ke morai, tar ke bhi bichar koribo.’ 22Kintu tumikhan ke moi koi ase tumikhan nijor bhai-bhoni uporte khong uthile tumikhan ke bhi bichar koribo; konuba manuh he nijor bhai-bhoni ke ninda korile rajyo laga aage te khara koribo lagibo, aru kon he eneka koi, ‘tumi okora!’ eitu manuh tu norok laga jui te jabole he lagibo.” 23“Eitu nimite, ketiya tumi bedit te daan anibo, aru tate tumar nijor bhai logote jhamela thaka yaad te ahhise, 24tumar daan tate he shari dibi aru jabi; pahila tumar bhai logote mil-milap korilobi, eitu pasote ahhi kene upohar tu daan dibi. 25Tumar dushman logote, adalat raasta te thaka homoi tar logote joldi mil-milap kori lobi, nahole tumar dushman pora tumi ke bichar manuh haat te dibo pare, aru bichar kora manuh pora roikhya laga haat te dibo pare, aru tumi ke bandhighor te humai dibo; 26Hosa bhi, Moi tumikhan ke koi ase, tumikhan ketiya tak dhaar sob tu nadibo tetiya tak ulabo naparibo.”
Biyobichar
27“Tumikhan pora eneka koi thaka bhi hunise, ‘Tumi biyobichar kam nakoribi.’ 28Kintu tumikhan ke moi koi ase kon pora ekta maiki manuh ke beya kam koribole monn hoi kene sai ase, tar mon te eitu maiki manuh logote biyobichar kam kori loise. 29Jodi daina soku pora tumikhan ke paap koribole dile, eitu ulai kene phelai dibi; tumikhan nimite jivon sob norok te jaa bodli gau te ekta bhag nathaka tu he bhall ase. 30Aru jodi tumikhan laga daina haat pora paap koribole diye, eitu kati kene phelai dibi; tumikhan nimite jivon sob norok te jaa bodli gau te ekta bhag nathaka tu he bhall ase.”
Shara-shari
31“Eitu bhi koise, ‘Jodi konuba pora nijor patni ke sharile, tai ke talaq sithi ekta dibo lage.’ 32Kintu moi tumikhan ke koi ase, jodi konuba pora nijor patni ke biyobichar nakorilebhi dusera nimite shari ase, tar pora nijor patni tu biyobichar koribole di ase; aru shara-shari kori thaka patni logot te kon he saadi kore, eitu mota bhi biyobichar kori ase.
Kosom
33“Arubhi, aage din te thaka manuh khan ke eitu kua tumi hunise, ‘Tumi misa-misi pora kosom nakoribi, kintu Prabhu usor te ki kosom rakhise eitu thik kori lobi.’ 34Kintu moi tumi khan ke koi ase, eku kosom nakhabi, sorgo nam pora bhi nakhabi, kilemane eitu Isor laga singsason ase, 35nahole prithibi nam pora bhi nakhabi, kilemane eitu Tar theng rakha jaga ase, nahole Jerusalem nam pora bhi nakhabi, kilemane eitu mahan Raja laga sohor ase. 36Aru tumi nijor laga matha pora bhi kosom nakhabi, kilemane tumi nijor pora chuli ekta bhi boga nahole kala bonabo napare. 37Tumar kotha tu eneka he hobi ‘hoi, hole hoi; nahoi, hole nahoi;’ dusera sob tu beya atma pora ase.
Beya Ghurai Diya
38“Tumikhan pora eitu kotha koi thaka bhi hunise, ‘soku laga bodli soku, aru dant laga bodli dant.’ 39Kintu tumikhan ke moi koi ase, beya ekjon ke narukhabi. Kintu jodi konuba manuh pora tumar daina gal te thapor marile, dusera phale bhi maribole dibi; 40aru jodi konuba pora tumikhan laga upor pindha kapoor lobole monn ase, kamis bhi di dibi; 41aru jodi konuba pora tumikhan ke jobor josti ek mile jabole dile, dui mile bhi jabi. 42Jodi konuba he tumikhan pora kiba ekta lobole nibedon kore, tar ke di dibi aru dhaar koribole itcha kora manuh ke bhi nadikene napathabi.
Dushman Ke Prem Kora
43“Tumikhan pora eitu bhi koi thaka hunise, ‘tumar aspas ke prem koribi aru dushman ke ghin koribi.’ 44Kintu tumikhan ke moi koi ase, tumikhan laga dushman ke prem koribi aru kon he tumikhan ke tarona kore, tarkhan nimite prathana koridibi, 45tetiya hole he tumikhan sorgo thaka Pitri laga hontan hobole paribo; kilemane Tar pora bhi surjyo tu beya khan aru bhall khan sob uporte ulabole di ase, aru borukhun bhi dharmikota aru odharmik manuh sob uporte pathai ase. 46Kilemane jodi tumikhan ke prem kora khan he tumikhan pora bhi prem kore, tumikhan ki inam pabo? Eitu tu khajana tula paapi manuh khan pora bhi nakori neki? 47Aru jodi tumikhan pora nijor bhai bhoni ke he salam kore, dusera pora alag tumikhan pora ki korise? Porjati khan pora bhi eneka nakori neki? 48Eitu nimite, keneka tumar sorgot laga Pitri thik-thak ase tumikhan bhi eneka thik thak hobi.
Valið núna:
MATTHEW 5: NagaMe
Áherslumerki
Deildu
Afrita
Want to have your highlights saved across all your devices? Sign up or sign in
© 2014, The Bible Society of India
All rights reserved.