MATTHEW 13
13
Bijon Hisai Diya Laga Dristanto
1Heitu din te Jisu he ghor pora ulai jai kene samundor laga kinar te bohise. 2Aru besi manuh Tar usor te jama kora nimite Tar ekta nao te uthi kene bohise; aru jama kori thaka manuh khan sob samundor kinar te khara kori thakise. 3Aru dristanto loi kene, besi kotha Tar pora taikhan ke koise: “Hunibi! Kheti kora manuh ekjon he bijon hisibole jaise. 4Aru tar pora bijon hisa homoi te, konuba bijon khuj raasta te girise, aru chiriya khan ahhi kene khai dise. 5Konuba bijon bhall maati nathaka pathor jaga te girise, aru eitu bijon joldi pata ulaise, kilemane tate maati besi nai, 6kintu ketiya Surjyo uthise aru dhup marise; hipa thik nathaka pora, eitu sukhi jaise. 7Dusera konuba bijon katta thaka ghans majot te girise, aru katta thaka ghans uthi kene bijon tu dhaki dise. 8Dusera konuba bijon bhall maati te girise aru ekso guna, saathi guna aru tris guna eneka dhan dhorise. 9Kon he hunibole kan ase tar pora hunibi!”
Dristanto Laga Udeshyo
10Tetiya chella khan ahhi kene Tar ke koise, “Kile taikhan logot te dristanto di kene he apuni kotha koi?” 11Aru Tar he uttar dise, “Sorgo rajyo laga gupon kotha janibole tumikhan ke di kene ase, kintu taikhan nimit te hole eitu diya nai. 12Kilemane kon ase, tar ke arubhi dibo, tetiya tar besi hobo; kintu kon he eku nai, tar olop thaka bhi loi jabo. 13Eitu nimite he Moi taikhan logot te dristanto pora kotha koi, kilemane taikhan pora salebhi thik pora nadekhibo, aru hunilebhi thik pora nahunibo nahole nabujibo. 14Hosa bhi taikhan logot te Isaiah bhavobani darai ki koi rakhise eitu hidho hoise:
“‘Tumikhan pora huna tu hunibo, kintu nabujibo,
aru tumikhan pora dekha tu dekhibo, kintu thik pora najanibo.
15Kilemane eitu manuh khan laga mon budhu hoi kene dangor hoise,
aru taikhan laga kan pora konu rukum he huni ase,
aru taikhan laga soku nijor pora he bond kori loise,
nahole tu taikhan soku pora dekhibo,
aru taikhan kan pora hunibo,
aru taikhan mon te bujilobo
aru ghurai lobo, aru moi taikhan hustho kori dibo.’
16Kintu tumikhan laga soku ashish, kilemane eitu pora dekhi ase, aru tumikhan laga kan bhi ashish, kilemane eitu pora huni ase. 17Moi hosa tumikhan ke kobo, tumikhan pora ki dekhi ase eitu dekhibole bhavobadi aru dharmik manuh besi pora itcha thakile bhi dekha nai, aru tumikhan pora ki huni ase eitu hunibole itcha thakile bhi huna nai.
Bijon Hisa Dristanto Bujai Dise
18“Etiya, eitu bijon hisa manuh laga dristanto tu huni lobi. 19Ketiya sorgo rajyo laga kotha tu konuba manuh he huni loi kintu nabuje, tetiya beya ekjon tu ahhi kene, ki kotha mon te hisai dise, eitu uthai kene loi jai; eitu khuj raasta te giri thaka bijon tu ase. 20Pathor thaka jaga upor te phelai diya bijon tu eneka ase, kon pora kotha tu hunise aru loge loge khushi pora eitu mani loise; 21Kintu tar nijor hipa nathaka karne, olop homoi he thakise, aru ketiya dukh-kosto, nahole tarona Isor nam nimite ahhi jabo, eneka manuh khan tu loge loge harai jabo. 22Etiya ki bijon katta ghans majote girise, eitu ekjon, kon he Isor kotha tu huni loise, kintu eitu jugh laga bhabna aru dhon sampoti te he khushi pai eitu pora tani kene loi jai aru Isor kotha tu pahoribole dise, aru phol eku dhora nai. 23Bhall maati te phelai diya bijon tu, ekjon ase, kon pora Isor kotha tu hune, aru buji loi; tar pora hosa phol dhori loi, aru thik thaki bole pare, ekta jaga te ekso guna, dusera ekta jaga te saathi guna, aru ekta jaga te tris guna pongchi kene phol dhori loi.”
Binoibon Bijon Laga Dristanto
24Jisu he aru ekta dristanto loi kene, taikhan logot te koise, “Sorgo rajyo tu ekjon manuh, kon he nijor kheti te bhall bijon phelaise eitu logot te tulona kori sabo pare, 25kintu manuh khan sob ghumai thaka homoi te, dushman ekjon he ahhi kene ghehu dhan majot te binoibon laga bijon phelai dise, aru jaise. 26Teneka, ketiya dhan tu uthise aru gutti dhorise, tetiya binoibon bhi logot te uthise. 27Aru ghor te thaka nokor khan ahhe kene Tar ke koise, ‘Guru, apuni laga kheti te bijon bhall he phelai diya nai neki? Tenehole eitu binoibon kot pora ulaise?’ 28Tar he taikhan ke jawab dise, ‘Dushman ekjon pora eitu kam korise.’ Nokor khan pora tar logot te koise, ‘Tenehole amikhan jai kene eitu binoibon tu uthai dibole apuni monjur ase na nai?’ 29Kintu Tar he jawab di kene koise, ‘Nahoi, ki jane binoibon uthai diya homoi te ghehu dhan bhi uthai dibo pare. 30Dhan kata din tak duita bhi eke logot te uthibole dibi; aru dhan kata homoi te dhan kata manuh khan logot te moi kobo, binoibon he pohila jama kori lobi aru eitu jui te jolai dibole bandhi lobi, kintu ghehu dhan sob tu bhoral te jama koribi.’”
Sorso Bijon Aru Khomir
31Jisu he aru ekta dristanto loi kene, taikhan logot te koise: “Sorgo rajyo tu ekta huru sorso laga bijon, manuh ekjon pora loi kene nijor kheti te rupai diya nisna ase; 32eitu gutti majot te sobse huru ase, kintu eitu sobji gos pora bhi dangor hoi jai, tetiya akash laga chiriya ahhi kene eitu laga daal te taikhan bah bona gos hoi jai, eneka ase.”
33Tar he aru dusera dristanto ekta di kene koise: “Sorgo rajyo tu mahila ekjoni atta tin-ta bhag tu khomir milai kene bhorta diya nisna ase.”
Bhavobani Aru Dristanto
34Jisu he eitu kotha sob tu dristanto di kene he koise; aru dristanto nadi kene taikhan ke eku kotha kua nai. 35Eitu kotha bhavobadi pora ki kotha koi kene rakhise eitu pura hobo nimite hoise:
“Dristanto di kene he moi laga mukh khulibo;
Prithibi shristi din pora, ki kotha lukai kene thakise, eitu janai dibo.”
Binoibon Laga Dristanto Bujai Dise
36Tetiya Jisu he jama kori thaka manuh khan shari kene ghor te jaise. Aru chella khan tar logot te ahhise, aru koise, “Amikhan ke kheti te binoibon laga dristanto tu bujai dibi.” 37Tar he jawab dise, “Kon he bhall bijon phelai dise eitu Manuh laga Putro ase; 38aru kheti tu jogot ase, aru bhall bijon tu sorgo rajyo laga putro khan ase; aru binoibon tu beya ekjon laga bacha khan ase, 39aru dushman, kon he eitu hisai dise eitu saitan ase; aru kheti kata din tu jugh hekh din ase, aru kheti kata khan tu sorgo dut khan ase. 40Eitu karne keneka binoibon jama kori kene jui te jolai diye, eitu nisna eitu jugh hekh din te bhi eneka hobo. 41Manuh laga Putro he Tar laga sorgo dut khan pathabo, aru ki pora paap koribole diye, aru kanoon bhangai diye eitu sob Tar laga rajyo pora jama kori kene ulai dibo, 42aru dangor jui jolai thaka jaga te phelai dibo. Tate manuh khan kandibo aru dant korsin hobo. 43Tetiya dharmik manuh khan, Pitri laga rajyo te surjyo nisna ujala hoi thakibo. Kon he kan ase, tar pora huni lobi.
Lukai Rakha Sampoti Dristanto
44“Sorgo rajyo tu kheti ekta te sampoti lukai kene rakhi thaka nisna ase, kon tu manuh ekjon pora dekhise, aru bond kori rakhise; eitu pasote khushi pora tar laga sampoti sob bikiri kori kene eitu kheti tu kini loise.
Besi Dam Laga Moti Dristanto
45“Arubhi, sorgo rajyo tu dam laga moti bisara bepari manuh ekjon nisna ase, 46kon he, eitu dam laga moti tu pai kene, tar laga sampoti sob tu bikiri korise aru eitu kini loise.
Jal Laga Dristanto
47“Arubhi, sorgo rajyo tu samundor te bhasi jal phelai kene kisim-kisim maas dhora nisna ase; 48Ketiya jal tu bhorta hoise, manuh khan he samundor kinar te uthaise, aru bohi kene bhall maas khan basi kene tukuri te rakhise, kintu beya tu phelai dise. 49Eitu nisna eitu jugh hekh din te bhi hobo. Sorgo dut khan ulai ahhibo aru dharmik manuh khan majot pora paapi manuh khan alag koribo, 50aru hodai namora jui jola jaga te taikhan ke phelai dibo; eitu jaga te manuh khan kanda aru dant korsin hobo.
Notun Aru Purana Sampoti
51“Tumi khan pora eitu kotha sob tu bujise na?” Taikhan he Tar logot te koise, “Hoi.” 52Aru Jisu he taikhan ke koise, “Eitu nimite pondit khan, kon sorgo rajyo laga jani kene ase, tarkhan tu ekta ghor te malik nisna hobo, kon pora nijor laga sampoti ki ase, tate pora notun aru purana ulai ana nisna ase.”
Nazareth Te Jisu Ke Oshikar
53Jisu he eitu dristanto sob kua pasot te, tate pora Tar jai jaise, 54aru Tar nijor laga nagor te ahhi kene taikhan laga girja ghor te sikhai dise, tetiya taikhan asorit lagise aru koise, “Eitu manuh tu eneka gyan aru mahan kam kora shakti kot pora paise? 55Eitu kath mistry laga putro tu nahoi neki? Tar laga amaa Mary, Aru Tar laga bhai James, Joseph, Simon aru Judas nahoi neki? 56Aru Tar laga bhoni khan sob amikhan logot te nai neki? Tenehole Tar he eitu khan sob kot pora paise?” 57Aru taikhan pora Jisu logot te beya he paise. Kintu Jisu he taikhan ke koise, “Bhavobadi ekjon tu nijor nagor aru ghor majot te he sonman napai.” 58Aru taikhan he biswas nakora karne, Tar pora dusera asorit kam tate kora nai.
Valið núna:
MATTHEW 13: NagaMe
Áherslumerki
Deildu
Afrita
Want to have your highlights saved across all your devices? Sign up or sign in
© 2014, The Bible Society of India
All rights reserved.