Yokaana 13
13
OYesu akunaabya amagulu gʼabeegesebwa baamwe
1Enceege nga bwabba Bugenyi bwa Kwakalibwaku, oYesu ni yeeteja nti ekiseera kiikire ye okuzwa omu nsi gini okwirayo e wa Ite waamwe. Olwakubba yayendyanga abasengeerya baamwe abaali omu nsi, awo nʼabalanga okwendya kwamwe kwona kwona. 2Nibaali bakulya ekyaigolo, osetaani yaali amaare okwingirya omu mutima gwa Yuda, omutaani wa Simooni Isikariyooti, ekirowoozo kya kuliirana oYesu. 3OYesu yaali namaite nti oIte waamwe yaali namuwaire obuyinza oku buli kintu era nti yazwire wa Kanca era eyo nigyo yaali akwira. 4Olwʼekyo nʼaliga oku kiibulo ni yeeyambula omwenagiro gwamwe ni yeebbwa etawulo omu nkende, 5nʼasensa amaizi omu bbensani. Awo nʼatandika okunaabya amagulu gʼabeegesebwa nʼokugasusuulisya etawulo gyeyaali yeebbwere. 6Niyaikire oku Simooni Peetero, oPeetero nʼamukoba ati, “Mukama niiwe okwaba okunnaabya amagulu?” 7OYesu nʼamwiramu ati, “Kyenkukola ati tokukyeteja, baitu egyebukwiza eyo okwiza kukyeteja.”
8OPeetero nʼakoba ati, “Bbe, tolinaabya magulu gange!” OYesu nʼairamu ati, “Nintakunaabye nga toli bumwei nanje.”
9OSimooni Peetero nʼairamu ati, “Atini Mukama otannaabya magulu gonkai; nnaabirya kimwei emikono nʼomutwe!” 10OYesu nʼairamu ati, “Omuntu anaabire yeetaaga kunaaba magulu gaamwe gonkai kubba omubiri gwamwe gwona gwona gubba gukwera. Naanywe mukwera baitu ti nywena nywena.” 11OYesu yakobere nti, “Ti nywena nywena abakwera,” kubba yamaite eyaali akwaba okumuliirana. 12Niyaali namaare okunaabya amagulu gaabwe, ni yeiryaku omwenagiro gwamwe nʼairayo omu kifo kyamwe nʼababuulya ati, “Mwetejerye kyembakoore? 13Munyeeta mwegesya era mukama, mubaza ekiikire kubba ebyo nibyo ndi. 14Ati nje oMukama waanywe era oMwegesya waanywe nka nimbanaabirye amagulu musaine okunaabyangananga amagulu. 15Mbawaire ekyakuboneraku; musaine okukolanga nka nimbakoore. 16Kambakobere amananu, ndoowo muweereza abba mukulu okukira omukama waamwe nʼomukwenda tabba mukulu kukira oyo eyamutumire. 17Ati nka nimumaite ebintu bini, oKanca akwiza okubaweerya omukisa nimwabikooraku.”
18OYesu ni yeeyongera nʼakoba ati, “Tinkukoba nti nywena nywena oKanca yabaweerya omukisa, nabakomerye ninkubamanya. Omuliirani yeena namukomerye ekyawandiikiibwe leke kiikiire ekikoba kiti, ‘Akulya nanje anyeyinduliire.’#Zab 41:9”
19OYesu ni yeeyongera nʼakoba ati, “Kini nkibakobeire kitakabbairewo, nikyalimala kiizire, leke mwikirize nti niye Nje. 20Kambakobere amananu, buli aikiriza gwentumire abba aikiriize ninje era buli aikiriza nje abba aikiriize oyo eyantumire.”
OYesu akulanga okuliiranwa kwamwe
(Mat 26:20-25; Mak 14:17-21; Luk 22:21-23)
21OYesu niyamaare okubaza kini, nʼakwatwa enaku nʼakoba ati, “Kambakobere amananu, omwei oku nywe yandiirana!” 22Abeegesebwa baamwe ni barolanganaku nibatakumanya gweyaali akubazaku. 23Omwei oku bo oYesu gweyayendyanga omuno yaali namwerereire oku kiibulo. 24OSimooni Peetero nʼamusumirya nʼamukoba ati, “Mubuulye gwakubazaku.” 25Omwegesebwa oyo nʼainamira ewa Yesu nʼamubuulya ati, “Mukama, naani oyo?”
26OYesu nʼairamu ati, “Ogwenakozera ekimego ni nkimuweerya yaabba niye oyo.” Awo nakoza ekimego nʼakiweerya oYuda omutaani wa Simooni Isikariyooti. 27OYuda niyamaare okulya ekimego, oSetaani nʼamwingiramu.
OYesu nʼamukoba ati, “Labukyaku kyokwaba okukola.” 28Baitu ndoowo oku baali oku kiibulo eyeetejerye oYesu ekyamubazisirye kini. 29Olwakubba oYuda niye yaali akujunaanizibwa oku bya mpiiya, abamwei baalowoize nti oYesu akumukoba kwaba kugula bintu ebikwetaagibwa oku Bugenyi, oba okuweeryayo abaseege akantu. 30OYuda niyakamaarembe okulya ekimego, nʼawuluka esaawa eza bwire.
OYesu akulanga nti oPeetero yamwegaana
(Mat 26:31-35; Mak 14:27-31; Luk 22:31-34)
31OYuda niyawulukire enzai, oYesu nʼakoba ati, “Ati ekiseera kiikire oMwana wa Muntu okuweebwa ekitiinisya nʼoKanca aweebwe ekitiinisya oku lwamwe. 32Ekitiinisya kya Kanca nikyabba kibonekera mu Mwana, nʼoKanca alyolekerawo omu ye omwenyenere ekitiinisya kya Mwana.” 33OYesu ni yeeyongera nʼakoba ati, “Baana bange, wasigaire akaseera kadooli nincaali naanywe. Mukwiza kuntoolya, baitu nka ninkobere aBayudaaya, naanywe nimwo nkubakoba nti egyenkwaba timusobola kwizayo. 34Nʼolwʼekyo ati nkubaweerya ekiragiro ekiyaaka: Mwendyenganenge. Nka nje nimbenderye, nywena mwendyenganenge. 35Nimwakwendyangananga, obwo buli muntu akwiza kumanyanga nti muli beegesebwa bange.”
36OSimooni Peetero nʼabuulya ati, “Mukama, okwaba ayi?”
OYesu nʼairamu ati, “Ati tokusobola kwaba nanje gyenkwaba baitu oliiza bundi.” 37OPeetero nʼabuulya ati, “Mukama, lwaki ntayabire naawe ati, nje neeteekaniize nʼokufa oku lwamu.”
38OYesu nʼairamu ati, “Mananu weeteekaniize nʼokufa oku lwange? Kankukobere amananu; onkoko atakakookere waneegaana emirundi esatu.
Valið núna:
Yokaana 13: RUULI-NYALA
Áherslumerki
Deildu
Afrita
Want to have your highlights saved across all your devices? Sign up or sign in
Yokaana 13
13
OYesu akunaabya amagulu gʼabeegesebwa baamwe
1Enceege nga bwabba Bugenyi bwa Kwakalibwaku, oYesu ni yeeteja nti ekiseera kiikire ye okuzwa omu nsi gini okwirayo e wa Ite waamwe. Olwakubba yayendyanga abasengeerya baamwe abaali omu nsi, awo nʼabalanga okwendya kwamwe kwona kwona. 2Nibaali bakulya ekyaigolo, osetaani yaali amaare okwingirya omu mutima gwa Yuda, omutaani wa Simooni Isikariyooti, ekirowoozo kya kuliirana oYesu. 3OYesu yaali namaite nti oIte waamwe yaali namuwaire obuyinza oku buli kintu era nti yazwire wa Kanca era eyo nigyo yaali akwira. 4Olwʼekyo nʼaliga oku kiibulo ni yeeyambula omwenagiro gwamwe ni yeebbwa etawulo omu nkende, 5nʼasensa amaizi omu bbensani. Awo nʼatandika okunaabya amagulu gʼabeegesebwa nʼokugasusuulisya etawulo gyeyaali yeebbwere. 6Niyaikire oku Simooni Peetero, oPeetero nʼamukoba ati, “Mukama niiwe okwaba okunnaabya amagulu?” 7OYesu nʼamwiramu ati, “Kyenkukola ati tokukyeteja, baitu egyebukwiza eyo okwiza kukyeteja.”
8OPeetero nʼakoba ati, “Bbe, tolinaabya magulu gange!” OYesu nʼairamu ati, “Nintakunaabye nga toli bumwei nanje.”
9OSimooni Peetero nʼairamu ati, “Atini Mukama otannaabya magulu gonkai; nnaabirya kimwei emikono nʼomutwe!” 10OYesu nʼairamu ati, “Omuntu anaabire yeetaaga kunaaba magulu gaamwe gonkai kubba omubiri gwamwe gwona gwona gubba gukwera. Naanywe mukwera baitu ti nywena nywena.” 11OYesu yakobere nti, “Ti nywena nywena abakwera,” kubba yamaite eyaali akwaba okumuliirana. 12Niyaali namaare okunaabya amagulu gaabwe, ni yeiryaku omwenagiro gwamwe nʼairayo omu kifo kyamwe nʼababuulya ati, “Mwetejerye kyembakoore? 13Munyeeta mwegesya era mukama, mubaza ekiikire kubba ebyo nibyo ndi. 14Ati nje oMukama waanywe era oMwegesya waanywe nka nimbanaabirye amagulu musaine okunaabyangananga amagulu. 15Mbawaire ekyakuboneraku; musaine okukolanga nka nimbakoore. 16Kambakobere amananu, ndoowo muweereza abba mukulu okukira omukama waamwe nʼomukwenda tabba mukulu kukira oyo eyamutumire. 17Ati nka nimumaite ebintu bini, oKanca akwiza okubaweerya omukisa nimwabikooraku.”
18OYesu ni yeeyongera nʼakoba ati, “Tinkukoba nti nywena nywena oKanca yabaweerya omukisa, nabakomerye ninkubamanya. Omuliirani yeena namukomerye ekyawandiikiibwe leke kiikiire ekikoba kiti, ‘Akulya nanje anyeyinduliire.’#Zab 41:9”
19OYesu ni yeeyongera nʼakoba ati, “Kini nkibakobeire kitakabbairewo, nikyalimala kiizire, leke mwikirize nti niye Nje. 20Kambakobere amananu, buli aikiriza gwentumire abba aikiriize ninje era buli aikiriza nje abba aikiriize oyo eyantumire.”
OYesu akulanga okuliiranwa kwamwe
(Mat 26:20-25; Mak 14:17-21; Luk 22:21-23)
21OYesu niyamaare okubaza kini, nʼakwatwa enaku nʼakoba ati, “Kambakobere amananu, omwei oku nywe yandiirana!” 22Abeegesebwa baamwe ni barolanganaku nibatakumanya gweyaali akubazaku. 23Omwei oku bo oYesu gweyayendyanga omuno yaali namwerereire oku kiibulo. 24OSimooni Peetero nʼamusumirya nʼamukoba ati, “Mubuulye gwakubazaku.” 25Omwegesebwa oyo nʼainamira ewa Yesu nʼamubuulya ati, “Mukama, naani oyo?”
26OYesu nʼairamu ati, “Ogwenakozera ekimego ni nkimuweerya yaabba niye oyo.” Awo nakoza ekimego nʼakiweerya oYuda omutaani wa Simooni Isikariyooti. 27OYuda niyamaare okulya ekimego, oSetaani nʼamwingiramu.
OYesu nʼamukoba ati, “Labukyaku kyokwaba okukola.” 28Baitu ndoowo oku baali oku kiibulo eyeetejerye oYesu ekyamubazisirye kini. 29Olwakubba oYuda niye yaali akujunaanizibwa oku bya mpiiya, abamwei baalowoize nti oYesu akumukoba kwaba kugula bintu ebikwetaagibwa oku Bugenyi, oba okuweeryayo abaseege akantu. 30OYuda niyakamaarembe okulya ekimego, nʼawuluka esaawa eza bwire.
OYesu akulanga nti oPeetero yamwegaana
(Mat 26:31-35; Mak 14:27-31; Luk 22:31-34)
31OYuda niyawulukire enzai, oYesu nʼakoba ati, “Ati ekiseera kiikire oMwana wa Muntu okuweebwa ekitiinisya nʼoKanca aweebwe ekitiinisya oku lwamwe. 32Ekitiinisya kya Kanca nikyabba kibonekera mu Mwana, nʼoKanca alyolekerawo omu ye omwenyenere ekitiinisya kya Mwana.” 33OYesu ni yeeyongera nʼakoba ati, “Baana bange, wasigaire akaseera kadooli nincaali naanywe. Mukwiza kuntoolya, baitu nka ninkobere aBayudaaya, naanywe nimwo nkubakoba nti egyenkwaba timusobola kwizayo. 34Nʼolwʼekyo ati nkubaweerya ekiragiro ekiyaaka: Mwendyenganenge. Nka nje nimbenderye, nywena mwendyenganenge. 35Nimwakwendyangananga, obwo buli muntu akwiza kumanyanga nti muli beegesebwa bange.”
36OSimooni Peetero nʼabuulya ati, “Mukama, okwaba ayi?”
OYesu nʼairamu ati, “Ati tokusobola kwaba nanje gyenkwaba baitu oliiza bundi.” 37OPeetero nʼabuulya ati, “Mukama, lwaki ntayabire naawe ati, nje neeteekaniize nʼokufa oku lwamu.”
38OYesu nʼairamu ati, “Mananu weeteekaniize nʼokufa oku lwange? Kankukobere amananu; onkoko atakakookere waneegaana emirundi esatu.
Valið núna:
:
Áherslumerki
Deildu
Afrita
Want to have your highlights saved across all your devices? Sign up or sign in