ܡܓܰܠܝܘܢ ܕܝܘܚܢܢ 14
14
ܝܶܫܽܘܥ ܝܳܐ ܗ̄ܽܘ ܕܰܪܒܳܐ ܕ݄ܟܡܰܘܒ݄ܠ ܣܽܕ̱ܘ ܐܰܒܳܐ
1”ܠܳܐ ܡ݄ܫܓ̥݄ܫ ܠܶܒܰܝܟ̥ܽܘ، ܡܗܰܝܡܶܢܽܘ ܒܰܐܠܳܗܳܐ ܘܶܐܒܺܝ ܡܗܰܝܡܶܢܽܘ. 2ܓ̥ܰܠܰܒܶܐ ܢܶܝ ܗ̄ܰܕّܽܘ̈ܟܳܬ̥ܳܐ ܒܽܗ̄ܘ ܒܰܝܬܳܐ ܕܽܗ̄ܘ ܐܰܒܰܝܕ̥ܺܝ. ܘܶܐܠܳܐ ܠܳܐ ܐܡܰܪ ܗ̄ܘܰܝ ܐ̱ܢܳܐ ܠܟ̥ܽܘ ܓܕ݄ܐܙّܺܝ ܡܛܰܝܰܒ ܐ̱ܢܳܐ ܠܟ̥ܽܘ ܐܰܬ̥ܪܳܐ. 3ܘܶܐܢ ܐ݄ܙّܺܝ ܐ̱ܢܳܐ ܓ݄ܡܛܰܝܰܒܢܰܢܟ̥ܽܘ ܐܰܬ̥ܪܳܐ ܘܕܳܥܰܪ ܐ̱ܢܳܐ ܐܳܬ̥ܶܐ ܐ̱ܢܳܐ ܘܡܳܝܰܕܢܰܢܟ̥ܽܘ ܓܰܒܺܝ، ܠܰܫܰܢ ܐܰܝܟܳܐ ܕܳܗ̄ܘܶܐ ܐ̱ܢܳܐ ܗܰܬܽܘ ܣܬܶܝ ܓܕܳܗ̄ܘܺܝܬܽܘ. 4ܘܠܰܐܝܟܳܐ ܕܟ݄ܐܙّܺܝ ܐ̱ܢܳܐ ܟ݄ܐܕ̥ܥܺܝܬܽܘ، ܘܽܗ̄ܘ ܕܰܪܒܳܐ ܟ݄ܐܕ̥ܥܺܝܬܽܘ.“ 5ܐܡ݄ܪ ܠܶܗ ܠܶܗ ܠܬܳܐܘܡܰܐ: ”ܡܳܪܰܢ، ܠ݄ܐ ܟ݄ܐܕ̥ܥܺܝܢܰܐ ܠܰܐܝܟܳܐ ܐܰܙܳܠܳܐ ܗܰܬ، ܐܰܝܕܰܪܒܳܐ ܟܺܝܒܰܢ ܕܳܐܕ̥ܥܺܝܢܰܐ ܗ̄ܽܘ ܕܰܪܒܳܐ؟“ 6ܐܡ݄ܪ ܠܶܗ ܠܶܗ ܝܶܫܽܘܥ: ”ܐܳܢܳܐ ܐ̱ܢܳܐ ܗ̄ܽܘ ܕܰܪܒܳܐ ܘܽܗ̄ܘ ܫܪܳܪܳܐ ܘܰܚّܰܝ̈ܶܐ. ܢܳܫܳܐ ܠ݄ܐ ܟܳܐܬ̥ܶܐ ܠܓܰܒ ܗ̄ܽܘ ܐܰܒܰܝܕ̥ܺܝ ܐܶܠܳܐ ܐܶܒܺܝ. 7ܐܶܢ ܐܶܠܺܝ ܕ݄ܐܕ̥ܥܺܝܬܽܘ ܗ̄ܘܰܘ̱، ܠܽܗ̄ܘ ܐܰܒܰܝܕ̥ܺܝ ܣܬܶܝ ܐ݄ܕ̥ܥܺܝܬܽܘ ܗ̄ܘܰܘ̱. ܘܡܳܐܥܕܳܐ ܟ݄ܐܕ̥ܥܺܝܬܽܘ ܠܶܗ، ܘ݄ܚܙܰܠܟ̥ܽܘ.“ 8ܘܐܡ݄ܪ ܠܶܗ ܠܶܗ ܦܺܝܠܺܝܦܳܘܣ: ”ܡܳܪܰܢ: ܡܰܚܘܰܝ ܠܰܢ ܗ̄ܽܘ ܐܰܒܳܐ ܘܒܰܣ ܝܳܐ ܐܶܠܰܢ!“ 9ܐܡ݄ܪ ܠܶܗ ܠܶܗ ܝܶܫܽܘܥ: ”ܗ̄ܽܘ ܙܰܒܢܰܢܳܐ ܟܽܘܠܶܗ ܐܰܥܡܰܝܟ̥ܽܘ ܐ̱ܢܳܐ ܘܠܰܐ ܐܕ̥ܺܝܥܰܬ ܠܺܝ، ܝܰܐ ܦܺܝܠܺܝܦܶܐ! ܡܰܢ ܕܚܳܙܶܐ ܠܺܝ، ܚܙܶܐ ܠܶܗ ܗ̄ܽܘ ܐܰܒܳܐ، ܘܰܐܝܕܰܪܒܳܐ ܗܰܬ ܟ݄ܐܡّܰܪ̱ܬ: ܡܰܚܘܰܝ ܠܰܢ ܗ̄ܽܘ ܐܰܒܳܐ. 10ܠ݄ܐ ܟ݄ܡܗܰܝܡܢܰܬ ܕܳܐܢܳܐ ܒܽܗ̄ܘ ܐܰܒܰܝܕ̥ܺܝ ܐ̱ܢܳܐ ܘܽܗ̄ܘ ܐܰܒܰܝܕ̥ܺܝ ܐܶܒܺܝ ܝܳܐ؟ ܗ̄ܰܡّܰܐܡܪ̈ܰܢܺܝ ܕܟܳܐܡܰܪ ܐ̱ܢܳܐ ܠܳܐ ܡܶܢ̱ ܩ݄ܕ̱ܡ ܪܽܘܚܺܝ ܟܳܐܡܰܪ ܐ̱ܢܳܐ. ܐܶܠܳܐ ܗ̄ܽܘ ܐܰܒܳܐ ܕܟܳܗ̄ܘܶܐ ܐܶܒܺܝ، ܗܺܝّܶܗ ܝܳܐ ܕ݄ܟܣܳܝ݄ܡ ܗ̄ܰܥܒܳܕ̥̈ܰܢܺܝ. 11ܡܗܰܝܡܶܢܽܘ ܕܳܐܢܳܐ ܒܽܗ̄ܘ ܐܰܒܰܝܕ̥ܺܝ ܐ̱ܢܳܐ ܘܽܗ̄ܘ ܐܰܒܰܝܕ̥ܺܝ ܐܶܒܺܝ ܝܳܐ، ܘܶܐܠܳܐ ܠܰܫܰܢ ܗ̄ܰܥܒܳܕ̥̈ܶܐ ܡܗܰܝܡܶܢܽܘ. 12ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕ݄ܡܗܰܝܡ݄ܢ ܐܶܒܺܝ، ܗ̄ܰܥܒܳܕ̥̈ܰܢܺܝ ܕܳܐܢܳܐ ܟܣܳܝܰܡ ܐ̱ܢܳܐ، ܗܺܝّܶܗ ܣܬܶܝ ܓ݄ܕܣܳܝ݄ܡ، ܘܙ݄ܕ ܡܰܗ̄ܢܺܝ ܓ݄ܕܣܳܝ݄ܡ، ܡܺܐܝܕ̥ܶܗ ܕܳܐܢܳܐ ܐܰܙܳܠܳܐ ܐ̱ܢܳܐ ܠܓܰܒ ܗ̄ܽܘ ܐܰܒܳܐ. 13ܘܽܗ̄ܘ ܡܶܕܶܐ ܕ݄ܡܫܰܐܺܠܺܝܬܽܘ ܒ݄ܐܫܡܺܝ ܟܣܳܝܰܡ ܐ̱ܢܳܐ ܠܟ̥ܽܘ ܝܳܐ ܕܡܺܝܫܰܒ݄ܚ ܗ̄ܽܘ ܐܰܒܳܐ ܒܽܗ̄ܘ ܐܰܒܪܰܝܕ̥ܶܗ. 14ܘܶܐܢ ܕ݄ܡܫܰܐܺܠܺܝܬܽܘ ܒ݄ܐܫܡܺܝ، ܟܣܳܝܰܡ ܐ̱ܢܳܐ.
ܗ̄ܽܘ ܡܰܐܬ̥ܝܳܐ ܕܽܗ̄ܘ ܦܰܪܰܩܠܺܛܳܐ
15”ܐܶܢ ܕܪܳܚܡܺܝܬܽܘ ܠܺܝ ܢܛܰܪܽܘ ܗ̄ܰܦّܽܘܩܕ̈ܳܢܰܝܕ̥ܺܝ. 16ܘܳܐܢܳܐ ܓܕܳܐܒܰܥ ܐ̱ܢܳܐ ܡܽܗ̄ܘ ܐܰܒܰܝܕ̥ܺܝ ܕܳܗ̄ܒܰܠܟ̥ܽܘ ܦܰܪܰܩܠܺܛܳܐ (ܡܥܰܕܪܳܢܳܐ) ܚܪܶܢܳܐ ܠܰܫܰܢ ܕܳܗ̄ܘܶܐ ܐܰܥܡܰܝܟ̥ܽܘ ܗܳܠ ܥܳܠܰܡ. 17ܪܽܘܚܳܐ ܕܽܗ̄ܘ ܫܪܳܪܳܐ ܝܳܐ، ܕܽܗ̄ܘ ܥܳܠܡܳܐ ܠܰܝܒܶܗ ܡܰܩܒܶܠ ܠܶܗ ܥܰܠ ܕܠܳܐ ܚܙܶܐ ܠܶܗ ܘܠܰܐ ܐܕ̥݄ܥ ܠܶܗ. ܐܶܠܳܐ ܗܰܬܽܘ ܟ݄ܐܕ̥ܥܺܝܬܽܘ ܠܶܗ ܥܰܠ ܕܓܰܒܰܝܟ̥ܽܘ ܟܳܗ̄ܘܶܐ ܘܰܐܒܟ̥ܽܘ ܝܳܐ. 18ܠ݄ܐ ܟܛܳܪܶܢܰܢܟ̥ܽܘ ܝܰܬܽܘܡ̈ܶܐ، ܒ݄ܬ̥݄ܪ ܫܰܘܛܳܐ ܐܰܬ̥ܳܝܳܐ ܐ̱ܢܳܐ ܓܰܒܰܝܟ̥ܽܘ. 19ܘܽܗ̄ܘ ܥܳܠܡܳܐ ܠ݄ܐ ܟܚܳܙܶܐ ܠܺܝ، ܐܶܠܳܐ ܗܰܬܽܘ ܓ݄ܕܚܳܙܺܝܬܽܘ ܠܺܝ؛ ܥܰܠ ܕܟ݄ܬ ܐ̱ܢܳܐ ܚܰܝܳܐ ܗܰܬܽܘ ܣܬܶܝ ܓܕܳܗ̄ܘܰܠܟ̥ܽܘ ܚܰܝ̈ܶܐ. 20ܒܽܗ̄ܘ ܝܰܘܡܰܘܳܐ ܓܕ݄ܐܕ̥ܥܺܝܬܽܘ ܕܳܐܢܳܐ ܒܽܗ̄ܘ ܐܰܒܰܝܕ̥ܺܝ ܐ̱ܢܳܐ ܘܗܰܬܽܘ ܐܶܒܺܝ ܗܰܬܽܘ ܘܳܐܢܳܐ ܐܰܒܟ̥ܽܘ ܐ̱ܢܳܐ.
21”ܡܰܢ ܕܟ݄ܬ ܠܶܗ ܗ̄ܰܦّܽܘܩܕ̈ܳܢܰܝܕ̥ܺܝ ܘܢܳܛܰܪّܶܗ، ܗܰܢܳܐ ܝܳܐ ܕ݄ܟܪܳܚܰܡ ܠܺܝ، ܘܗܰܘܳܐ ܕ݄ܟܪܳܚܰܡ ܠܺܝ ܓ݄ܕܡ݄ܪܚ݄ܡ ܡܽܗ̄ܘ ܐܰܒܰܝܕ̥ܺܝ، ܘܳܐܢܳܐ ܟܪܳܚܰܡܢܶܗ ܘ݄ܟܡܰܚܘܶܢܶܗ ܪܽܘܚܺܝ.“ 22ܘܐܡ݄ܪ ܠܶܗ ܠܶܗ ܝܺܗܽܘܕ̥ܳܐ، ܠܳܐ ܗ̄ܽܘ ܣܟ̥ܰܪܝܽܘܛܳܐ: ”ܡܳܪܝ، ܩܰܝ ܐܶܠܰܢ ܓ݄ܕܡܰܚܘܰܬ ܪܽܘܚܳܟ̥ ܘܠܳܐ ܠܽܗ̄ܘ ܥܳܠܡܳܐ؟“ 23ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܡܰܢ ܕܪܳܚܰܡ ܠܺܝ ܟܢܳܛ݄ܪ ܗ̄ܽܘ ܡܰܐܡܪܰܝܕ̥ܺܝ، ܘܽܗ̄ܘ ܐܰܒܰܝܕ̥ܺܝ ܓܪܳܚܰܡ ܠܶܗ، ܘܟܳܐܬ̥ܺܝܢܰܐ ܓܰܒܶܗ، ܘܓܰܒܶܗ ܒܰܝܬܳܐ ܟܣܰܝܡܺܝܢܰܐ. 24ܘܗܰܘܳܐ ܕܠ݄ܐ ܟܪܳܚܰܡ ܠܺܝ ܠ݄ܐ ܟܢܳܛ݄ܪ ܗ̄ܽܘ ܡܰܐܡܪܰܝܕ̥ܺܝ. ܗ̄ܽܘ ܡܰܐܡܪܰܢܳܐ ܕܟܳܫܳܡܥܺܝܬܽܘ ܠܰܝ̱ܬ ܝܳܐ ܕܺܝܕ̥ܺܝ، ܐܶܠܳܐ ܕܽܗ̄ܘ ܐܰܒܳܐ ܕ݄ܡܫܰܕܰܪ ܠܶܗ ܠܺܝ. 25ܗܰܢܺܝ ܐܡ݄ܪ ܠܺܝ ܠܟ̥ܽܘ ܘܳܐܢܳܐ ܓܰܒܰܝܟ̥ܽܘ ܐ̱ܢܳܐ. 26ܐܶܠܳܐ ܗ̄ܽܘ ܦܰܪܰܩܠܺܛܳܐ (ܡܥܰܕܪܳܢܳܐ)، ܪܽܘܚܳܐ ܕܩܽܘܕܫܳܐ ܗܰܘܳܐ ܕ݄ܡܫܰܕܰܪ ܠܶܗ ܗ̄ܽܘ ܐܰܒܰܝܕ̥ܺܝ ܒ݄ܐܫܡܺܝ، ܗܺܝّܶܗ ܓܡܰܘܠܰܦܟ̥ܽܘ ܟܽܘܠ ܡܶܕܶܐ، ܘܗܺܝّܶܗ ܓܡܰܡܛܶܐ ܠܒܳܠܰܝܟ̥ܽܘ ܗ̄ܽܘ ܡܶܕܶܐ ܕܟܳܐܡܰܪ ܐ̱ܢܳܐ ܠܟ̥ܽܘ. 27ܫܠܳܡܳܐ ܟܛܳܪܶܐ ܐ̱ܢܳܐ ܠܟ̥ܽܘ، ܗ̄ܽܘ ܫܠܳܡܰܝܕ̥ܺܝ ܟܳܗ̄ܒܶܐ ܐ̱ܢܳܐ ܠܟ̥ܽܘ؛ ܠܳܐ ܐܟ̥ ܕܟܳܗ̄ܒܶܐ ܠܶܗ ܗ̄ܽܘ ܥܳܠܡܳܐ ܐܳܢܳܐ ܟܳܗ̄ܒܶܐ ܐ̱ܢܳܐ ܠܟ̥ܽܘ. ܛܪܳܐ ܠܳܐ ܡ݄ܫܓ̥݄ܫ ܠܶܒܰܝܟ̥ܽܘ ܘܠܳܐ ܙܳܝ݄ܥ! 28ܫܰܡܺܝܥܺܝܬܽܘ ܕܐܡ݄ܪ ܠܺܝ ܠܟ̥ܽܘ ܕ݄ܐܙّܺܝ ܐ̱ܢܳܐ، ܘܳܐܬ̥ܶܐ ܐ̱ܢܳܐ ܓܰܒܰܝܟ̥ܽܘ. ܐܶܢ ܕܪܳܚܡܺܝܬܽܘ ܠܺܝ ܟܡ݄ܦܨܳܚܺܝܬܽܘ ܕܰܐܙܳܠܳܐ ܐ̱ܢܳܐ ܓܰܒ ܗ̄ܽܘ ܐܰܒܰܝܕ̥ܺܝ، ܥܰܠ ܕܽܗ̄ܘ ܐܰܒܰܝܕ̥ܺܝ ܪܰܒ ܝܳܐ ܡܶܢܺܝ. 29ܘܟܰܐܠܺܝ ܐܳܥܕܳܐ ܐܡ݄ܪ ܠܺܝ ܠܟ̥ܽܘ ܡܶܩ݄ܕ̱ܡ ܕܳܗ̄ܘܶܐ، ܕܺܗ̄ܝ ܢܰܩܠܐ ܕܗܳܘܶܐ ܓ݄ܡܗܰܝܡܢܺܝܬܽܘ. 30ܡܳܐܥܕܳܐ ܘܰܐܙܳܠܳܐ ܠܳܐ ܓ̥ܰܠܰܒܶܐ ܓܡ݄ܫܓ̥ܰܠ ܐ̱ܢܳܐ ܐܰܥܡܰܝܟ̥ܽܘ، ܥܰܠ ܓܕܳܐܬ̥ܶܐ ܗ̄ܽܘ ܪܺܝܫܳܐ ܕܽܗ̄ܘ ܥܳܠܡܰܢܳܐ، ܘܶܐܒܺܝ ܠܰܝ̱ܬ ܠܶܗ ܡܶܕܶܐ، 31ܐܶܠܳܐ ܕܳܐܕ̥݄ܥ ܗ̄ܽܘ ܥܳܠܡܳܐ ܕܳܐܢܳܐ ܟܪܳܚܰܡ ܐ̱ܢܳܐ ܗ̄ܽܘ ܐܰܒܰܝܕ̥ܺܝ. ܘܒܶܗ ܐܰܝܕܰܪܒܳܐ ܗ̄ܽܘ ܐܰܒܰܝܕ̥ܺܝ ܗܽܒ̥ ܠܶܗ ܠܺܝ ܦܽܘܩܕܳܢܳܐ ܗܰܘܟ̥ܰܐ ܟܣܳܝܰܡ ܐ̱ܢܳܐ. ܩܽܘܡܽܘ ܕ݄ܐܙّܰܢ ܡܰܗ̄ܪܟܶܐ.“
Valið núna:
ܡܓܰܠܝܘܢ ܕܝܘܚܢܢ 14: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation