ܣܶܦܪܳܐ ܕ݄ܒܪܺܝܬ̥ܳܐ 21
21
1ܘܡܳܪܝܳܐ ܡܰܕ̥ܟܰܪ ܠܶܗ ܠܣܰܪܳܐ ܐܟ̥ ܕܐܡ݄ܪ ܠܶܗ. ܘܡܳܪܝܳܐ ܣ݄ܡ ܠܶܗ ܠܣܰܪܳܐ ܐܟ̥ ܕ݄ܫܓ̥ܺܝܠ. 2ܘ݄ܛܥܺܝܢܳܐ ܣܰܪܳܐ ܘܡܰܘܠܰܕ ܠܰܗ ܠܰܐܒܪܳܗܳܡ ܐܰܒܪܳܐ ܒܺܗ̄ܝ ܣܳܒ̥ܽܘܬ̥ܰܝܕ̥ܶܗ، ܒܽܗ̄ܘ ܙܰܒܢܳܐ ܕ݄ܫܓ̥ܺܝܠ ܐܰܥܡܶܗ ܐܰܠܳܗܳܐ. 3ܘ݄ܩܪܶܐ ܠܶܗ ܐܰܒܪܳܗܳܡ ܐ݄ܫܡܶܗ ܕܽܗ̄ܘ ܐܰܒܪܰܝܕ̥ܶܗ ܕܡܰܘܠܰܕ ܠܰܗ ܠܶܗ ܣܰܪܳܐ ”ܐܺܝܣܚܳܩ.“ 4ܘ݄ܓܙ݄ܪ ܠܶܗ ܐܰܒܪܳܗܳܡ ܠܺܐܝܣܚܳܩ ܗ̄ܽܘ ܐܰܒܪܰܝܕ̥ܶܗ، ܘܗܺܝّܶܗ ܐܰܒܪܶܗ ܕ݄ܬܡܰܢܝܳܐ ܝܰܘܡ̈ܶܐ ܐܟ̥ ܕܽܗ̄ܘ ܦܽܘܩܕܳܢܳܐ ܕܰܐܠܳܗܳܐ. 5ܘܰܐܒܪܳܗܳܡ ܐܰܒܪܶܗ ܕܡܳܐܐ ܐ݄ܫܢ̈ܶܐ ܗ̄ܘܰܐ، ܗ̄ܺܝ ܢܰܩܠܐ ܕܡܰܘܠ݄ܕ̥ ܐܺܝܣܚܳܩ ܗ̄ܽܘ ܐܰܒܪܰܝܕ̥ܶܗ. 6ܘܐܡ݄ܪ ܠܰܗ ܣܰܪܳܐ: ”ܦܨܺܝܚܽܘܬ̥ܳܐ ܪܰܒܬ̥ܳܐ ܣ݄ܡ ܠܶܗ ܠܺܝ ܐܰܠܳܗܳܐ ܐܰܕܝܰܘܡܰܐ. ܟܘ̇ܠ ܕܫܳܡ݄ܥ ܟܡ݄ܦܨ݄ܚ ܐܰܥܡܺܝ.“ 7ܘܐܡ݄ܪ ܠܰܗ: ”ܡܰܢ ܐܳܡܰܪ ܗ̄ܘܰܐ ܕܣܰܪܳܐ ܓ݄ܕܡܰܝܢܩܳܐ ܐܰܒܢ̈ܶܐ ܠܰܐܒܪܳܗܳܡ؟ (ܥܰܡ ܗܰܘܟ̥ܰܐ) ܡܰܘܠܰܕ ܠܺܝ ܠܶܗ ܐܰܒܪܳܐ ܒܺܗ̄ܝ ܣܳܒ̥ܽܘܬ̥ܰܝܕ̥ܶܗ.“ 8ܘܝܰܪܽܒ̥ ܗ̄ܽܘ ܛܰܠܝܳܐ ܘ݄ܚܣܺܝܠ. ܘܣ݄ܡ ܠܶܗ ܐܰܒܪܳܗܳܡ ܡܰܫ݄ܬܝܳܐ ܪܰܒܳܐ ܒܽܗ̄ܘ ܝܰܘܡܳܐ ܕ݄ܚܣܺܝܠ ܐܺܝܣܚܳܩ.
9ܘ݄ܚܙܶܐ ܠܰܗ ܣܰܪܳܐ ܠܽܗ̄ܘ ܐܰܒܪܳܐ ܕܗܳܓܳܪ ܗ̄ܺܝ ܡܶܨܪܰܝܬܳܐ ܕܡܰܘܠܰܕ ܠܰܗ ܠܰܐܒܪܳܗܳܡ ܟܳܡܰܓܚ݄ܟ̥. 10ܘܐܡ݄ܪ ܠܰܗ ܠܰܐܒܪܳܗܳܡ: ”ܡܰܘܦ݄ܩ ܠܺܗ̄ܝ ܓܪܰܥܬܰܬ̥ܶܐ ܘܠܽܗ̄ܘ ܐܰܒܪܰܝܕ̥ܰܗ، ܠܰܫܰܢ ܕܠܳܐ ܝܳܪ݄ܬ̥ ܗ̄ܽܘ ܐܰܒܪܰܢܳܐ ܕܺܗ̄ܝ ܓܪܰܥܬܳܐ ܥܰܡ ܗ̄ܽܘ ܐܰܒܪܰܝܕ̥ܺܝ ܐܺܝܣܚܳܩ.“ 11ܘܰܐܒܪܳܗܳܡ ܓ̥ܰܠܰܒܶܐ ܥܰܝ݄ܩ ܠܶܗ ܡܽܗ̄ܘ ܠܳܐ ܡܰܐܡܪܰܢܳܐ ܥܰܠ ܗ̄ܽܘ ܐܰܒܪܰܝܕ̥ܶܗ. 12ܘܐܡ݄ܪ ܠܶܗ ܐܰܠܳܗܳܐ ܠܰܐܒܪܳܗܳܡ: ”ܛܪܳܐ ܠܳܐ ܥܳܝܰܩ ܠܳܟ̥ ܠܰܫܰܢ ܗ̄ܽܘ ܛܰܠܝܳܐ ܘܺܗ̄ܝ ܓܪܰܥܬܰܝܕ̥ܳܟ̥. ܟܘ̇ܠ ܡܶܕܶܐ ܕ݄ܐܡّܳܪ̱ܐ ܠܳܟ̥ ܣܰܪܳܐ، ܫܡܰܥ ܗ̄ܽܘ ܡܰܐܡܪܰܝܕ̥ܰܗ، ܡܺܐܝܕ̥ܶܗ ܕܒܺܐܝܣܚܳܩ ܓܡ݄ܩܪܶܐ ܠܳܟ̥ ܙܰܪܥܳܐ. 13ܘܽܗ̄ܘ ܐܰܒܪܳܐ ܕܺܗ̄ܝ ܓܪܰܥܬܳܐ ܣܬܶܝ ܓܣܳܝܰܡ ܐ̱ܢܳܐ ܠܶܗ ܠܥܰܡܳܐ ܪܰܒܳܐ، ܡܺܐܝܕ̥ܶܗ ܕܡܽܗ̄ܘ ܙܰܪܥܰܝܕ̥ܳܟ̥ ܝܳܐ.“
14ܘ݄ܒܩܶܕܰܡܬܳܐ ܩܰܝ݄ܡ ܐܰܒܪܳܗܳܡ، ܘܡ݄ܕ ܠܶܗ ܠܰܚܡܳܐ ܘܩܰܪܒܳܐ ܕܡܰܝ̈ܶܐ، ܘܗܺܝܒ̥ܺܝ ܠܶܗ ܠܗܳܓܳܪ، ܘܡܰܚ݄ܬ ܠܶܗ ܥܰܠ ܟܰܬܦܰܗ ܗ̄ܽܘ ܛܰܠܝܳܐ ܘ݄ܡܫܰܕܪܳܐ ܠܶܗ، ܘܰܐܙّܰܗ، ܘ݄ܡܣܰܟܪܳܐ ܒܽܗ̄ܘ ܡܰܕ̥݄ܒܪܳܐ ܕܒܺܪܫܒܰܥ. 15ܘܬܰܝܺܝܡܺܝ ܗ̄ܰܡّܰܝ̈ܶܐ ܕܽܗ̄ܘ ܩܰܪܒܳܐ، ܘܡܰܚܰܬ ܠܰܗ ܗ̄ܽܘ ܛܰܠܝܳܐ ܬܰܚܬܶܗ ܕܚܰܕ̱ ܛܰܪܳܫܳܐ، 16ܘܰܐܙّܰܗ ܘܝܰܬܺܝܒ̥ܳܐ ܡܩܰܒ݄ܠ ܕܺܝܕ̥ܶܗ، ܪܰܚܽܘܩܳܐ ܐܟ̥ ܕܚܶܠܰܩܬܳܐ ܕܓܶܐܪܳܐ. ܥܰܠ ܕܐܡ݄ܪ ܠܰܗ ܕܠܳܐ ܚܳܙܝܳܐ ܐ̱ܢܳܐ ܗ̄ܽܘ ܡܰܘܬܳܐ ܕܽܗ̄ܘ ܛܰܠܝܳܐ. ܘܝܰܬܺܝܒ̥ܳܐ ܡܩܰܒ݄ܠ ܕܺܝܕ̥ܶܗ، ܘܡܰܥܠܶܐ ܠܰܗ ܩܳܠܰܗ ܘܒܰܟ̥ܝܳܐ. 17ܘܫܰܡ݄ܥ ܐܰܠܳܗܳܐ ܠܩܳܠܶܗ ܕܽܗ̄ܘ ܛܰܠܝܳܐ، ܘܽܗ̄ܘ ܡܰܠܰܐܟ̥ܳܐ ܕܰܐܠܳܗܳܐ ܩܪܶܐ ܠܶܗ ܠܗܳܓܳܪ ܡܺܗ̄ܝ ܫܡܰܝܳܐ، ܘܐܡ݄ܪ ܠܶܗ ܠܰܗ: ”ܡܳܐ ܠܰܟ̥ ܗܳܓܳܪ؟ ܠܳܐ ܙܰܝܥܰܬ، ܡܺܐܝܕ̥ܶܗ ܕܰܐܠܳܗܳܐ ܫܰܡ݄ܥ ܠܩܳܠܶܗ ܕܽܗ̄ܘ ܛܰܠܝܳܐ، ܒܽܗ̄ܘ ܐܰܬ̥ܪܳܐ ܕܟ݄ܬ ܝܳܐ. 18ܩܘ̇ܡ ܛܥܰܢ ܗ̄ܽܘ ܛܰܠܝܳܐ ܘ݄ܙܒܰܛܶܗ ܒܺܐܝܕ̥̈ܳܬ̥ܰܟ̥، ܥܰܠ ܕ݄ܓܣܳܝܰܡܢܶܗ ܠܥܰܡܳܐ ܪܰܒܳܐ.“ 19ܘ݄ܦܬ݄ܚ ܠܶܗ ܐܰܠܳܗܳܐ ܥܰܝܢ̈ܳܬ̥ܰܗ، ܘ݄ܚܙܶܐ ܠܰܗ ܒܺܐܪܳܐ ܕܡܰܝ̈ܶܐ. ܘܰܐܙّܰܗ ܘ݄ܡܠܶܐ ܠܰܗ ܗ̄ܺܝ ܩܰܪܒܳܐ ܡܰܝ̈ܶܐ، ܘܡܰܫܬܶܐ ܠܰܗ ܠܽܗ̄ܘ ܛܰܠܝܳܐ. 20ܘܗܰܘܺܝ ܐܰܠܳܗܳܐ ܥܰܡ ܗ̄ܽܘ ܛܰܠܝܳܐ. ܘܝܰܪܽܒ̥ ܘܝܰܬܽܒ̥ ܒܽܗ̄ܘ ܡܰܕ̥݄ܒܪܳܐ ܕܦܳܪܳܢ. ܘܝܳܠܰܦ ܗ̄ܘܰܐ ܕܡܚܳܝܳܐ ܒܩܶܫܬܳܐ ܘܓܶܐܪܳܐ 21ܒܽܗ̄ܘ ܡܰܕ̥݄ܒܪܳܐ ܕܦܳܪܳܢ. ܘܺܗ̄ܝ ܐܶܡܳܐ ܡ݄ܕ ܠܰܗ ܠܶܗ ܐܰܢ̱ܬ̥ܬܳܐ ܡܺܗ̄ܝ ܐܰܪܥܳܐ ܕܡܶܨܪܶܝܢ.
22ܘܗܰܘܺܝ ܒܽܗ̄ܘ ܙܰܒܢܰܘܳܐ، ܘܐܡ݄ܪ ܠܶܗ ܐܰܒܺܝܡܰܠ݄ܟ ܘܦܺܝܟ̥ܶܠ ܗ̄ܽܘ ܪܰܒܳܐ ܕܽܗ̄ܘ ܚܰܝܠܰܝܕ̥ܶܗ ܠܰܐܒܪܳܗܳܡ: ”ܐܰܠܳܗܳܐ ܐܰܥܡܳܟ̥ ܝܳܐ ܒܟܘ̇ܠ ܕܟܳܣܰܝܡܰܬ. 23ܘܳܐܥܕܳܐ ܝܺܡܰܝ ܠܺܝ ܒܰܐܠܳܗܳܐ ܗܰܪܟܶܐ ܕܠܳܐ ܡܕܰܓܠܰܬ ܐܰܥܠܺܝ ܘܥܰܠ ܗ̄ܽܘ ܓܶܢܣܰܝܕ̥ܺܝ ܘܥܰܠ ܗ̄ܺܝ ܫܰܪܒܬ̥ܰܝܕ̥ܺܝ. ܘ݄ܐܟ̥ ܕܺܗ̄ܝ ܛܰܝܒܽܘܬ̥ܳܐ ܕܣ݄ܡ ܠܺܝ ܐܰܥܡܳܟ̥، ܣܘ̇ܡ ܐܰܥܡܺܝ، ܘܥܰܡ ܗ̄ܺܝ ܐܰܪܥܳܐ ܕܥܰܡܺܝܪܰܬ ܐܶܒܰܗ.“ 24ܘܐܡ݄ܪ ܠܶܗ ܐܰܒܪܳܗܳܡ: ”ܐܳܢܳܐ ܓܝܳܡܶܐ ܐ̱ܢܳܐ.“ 25ܘ݄ܬܒ̥݄ܪ ܠܶܗ ܐܰܒܪܳܗܳܡ ܠܰܐܒܺܝܡܰܠ݄ܟ ܥܰܠ ܗ̄ܽܘ ܩܰܛܪܳܐ ܕܺܗ̄ܝ ܒܺܐܪܳܐ ܕܰܡّܰܝ̈ܶܐ ܕ݄ܚܦ݄ܪّܶܗ ܗ̄ܰܓܪ̈ܶܝܥܶܐ ܕܰܐܒܪܳܗܳܡ، ܘܡܺܝܕܰܠّܶܗ ܗ̄ܰܓܪ̈ܶܝܥܶܐ ܕܰܐܒܺܝܡܰܠ݄ܟ. 26ܘܐܡ݄ܪ ܠܶܗ ܐܰܒܺܝܡܰܠ݄ܟ: ”ܠܰܐ ܐܕ̥݄ܥ ܐ̱ܢܳܐ ܡܰܢ ܣ݄ܡ ܠܶܗ ܗ̄ܽܘ ܡܶܕܰܢܳܐ. ܘܗܰܬ ܣܬܶܝ ܠܳܐ ܡܰܘܕ̥ܰܥ ܠܳܟ̥ ܠܺܝ، ܘܳܐܢܳܐ ܣܬܶܝ ܠܳܐ ܫܰܡ݄ܥ ܐ̱ܢܳܐ ܐܶܠܳܐ ܐܰܕܝܰܘܡܰܐ.“ 27ܘܡܰܘܒܶܠ ܠܶܗ ܐܰܒܪܳܗܳܡ ܥܘܳܢ̈ܶܐ ܘܬܰܘܪ̈ܶܐ ܘܗܺܝܒ̥ܺܝ ܠܶܗ ܠܰܐܒܺܝܡܰܠ݄ܟ. ܘܡܰܩ݄ܡّܶܗ ܗ̄ܰܬܪܰܝّܶܗ ܩܝܳܡܳܐ. 28ܘܡܰܩ݄ܡ ܠܶܗ ܐܰܒܪܳܗܳܡ ܫܒ̥ܰܥ ܦܰܪ̈ܶܢܝܳܬ̥ܳܐ ܕ݄ܥܘܳܢ̈ܶܐ ܒܶܠܚܽܘܕ̥ܰܝّܶܗ. 29ܘܐܡ݄ܪ ܠܶܗ ܐܰܒܺܝܡܰܠ݄ܟ ܠܰܐܒܪܳܗܳܡ: ”ܡ݄ܢ ܢܶܝ ܗܰܢܺܝ ܗ̄ܰܫܒ̥ܰܥ ܦܰܪ̈ܶܢܝܳܬ̥ܳܐ ܕܰܥܘܳܢ̈ܶܐ ܕܡܰܩܺܝܡܺܝ ܠܳܟ̥ ܒܶܠܚܽܘܕ̥ܰܝّܶܗ؟“ 30ܘܐܡ݄ܪ ܠܶܗ ܐܰܒܪܳܗܳܡ: ”ܗ̄ܰܫܒ̥ܰܥ ܦܰܪ̈ܶܢܝܳܬ̥ܳܐ ܓܡܰܝܕܰܬ ܡܶܢ̱ ܐܺܝܕ̥̈ܳܬ̥ܺܝ ܠܰܫܰܢ ܕܗܳܘܝܳܐ ܠܺܝ ܣܳܗܕܽܘܬ̥ܳܐ ܕܳܐܢܳܐ ܚܦ݄ܪ ܠܺܝ ܗ̄ܺܝ ܒܺܐܪܰܬ̥ܶܐ.“ 31ܡܰܗ̄ܘܟ̥ܰܐ ܩܪܶܐ ܠܶܗ ܗ̄ܽܘ ܐܰܬ̥ܪܰܘܳܐ ܒܺܪܫܒܰܥ، ܥܰܠ ܕܬܰܡܳܐ ܝܺܡܰܠّܶܗ ܗ̄ܰܬܪܰܝّܶܗ.
32ܘܡܰܩ݄ܡّܶܗ ܩܝܳܡܳܐ ܒܒܺܪܫܒܰܥ. ܘܩܰܝ݄ܡ ܐܰܒܺܝܡܰܠ݄ܟ ܘܦܺܝܟ̥ܶܠ ܗ̄ܽܘ ܪܰܒܳܐ ܕܽܗ̄ܘ ܚܰܝܠܰܝܕ̥ܶܗ ܘܕܰܥܺܝܪܺܝ ܠܺܗ̄ܝ ܐܰܪܥܳܐ ܕܰܦܠܶܫܬܳܝ̈ܶܐ. 33ܘ݄ܢܨܽܒ̥ ܠܶܗ ܐܰܒܪܳܗܳܡ ܢܶܨܰܒ̥ܬܳܐ ܒܒܺܪܫܒܰܥ، ܘ݄ܩܪܶܐ ܠܶܗ ܬܰܡܳܐ ܒ݄ܐܫܡܶܗ ܕܡܳܪܝܳܐ ܐܰܠܳܗܳܐ ܕܰܥّܳܠ̈ܡܶܐ. 34ܘܥܰܡ݄ܪ ܐܰܒܪܳܗܳܡ ܒܺܗ̄ܝ ܐܰܪܥܳܐ ܕܰܦܠܶܫܬܳܝ̈ܶܐ ܝܰܘܡ̈ܳܬ̥ܳܐ ܓ̥ܰܠܰܒܶܐ.
Valið núna:
ܣܶܦܪܳܐ ܕ݄ܒܪܺܝܬ̥ܳܐ 21: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation