Iŋɛ́nínɛ yi Isáaŋ 9
9
Insɛ́p ikátáanuɛ
1Éŋele ukátáanuɛ wɔɔtɔ́ŋɛt insɛ́p yɛɛyɛ́. Yɛɛ́n yoótíótio ímɛɛ́fɔ́k mɛnɛ́mɛnɛ́ɛ yáakua e kúúsí; péékeeki yɛ́ɛ itipek í eŋulúm. 2Yoótíótio ikáánɛ́ yéefuun eŋulúm, onyóki wáakaám, ɛlɛɛ́ onyóki ú kikɔny kí yiik. Onyóki ukáánɛ́ wéénepi ɔɔ́ny ne emfún. 3Pitandá píakaám kó onyóki úmaámán ké eŋulúm, píasak kúúsí. Péékeeki pɛ́ɛ pukaaka pú iŋiŋɛ́ sí kúúsí. 4Páakaákɛn pɛ́ɛ kikotí ɛ́ɛ́ pítipíkíík pikuti pínyɛɛ́ e kúúsí, na matɛ́ na tunyimak; yá pɛɛnd epé pátíányípá ne pulinsí pú Támbák á nupɔl. 5Péekeeki pɛ́ɛ pukaaka, pútipá pú kuɔ́nɔ pɔ́, maná yá pú kuénesi pɔ́ iŋɛ́n ó siólí ítáan. Kutɛ́ɛ́ ekú kúɛlɛnɛ́ɛ mɔɔnd aká kitandá mányisíkɛ́t wɔ́ nyɛ ɛlɛɛ́ kutɛ́ɛ́ ekú kúɛlɛnɛ́ɛ mɔɔnd aká iŋiŋɛ́ mányisíkɛ́t mɔɔnd. 6Ó siólí itáan sikáánɛ́, pɛɛnd áányáamba nikú, pɛ́tiɛ́n nɛ́ɛ; páányáamba ɛ́ɛ́ pékúén, maná nikú ɔ́ɔ́nyípínɔn pɔ́. 7Pitandá pikáánɛ́ mapá ɛlɛɛ́ pikapilɛ́ pilɛŋɛ́ ó pusíó pu pitíí. Pámaákán pɛ́ɛ kí itúɛ maandá ɛlɛɛ́ indanyáa, situánán no kóol, mosíó mɔ́ɔ́p ɛlɛɛ́ mɛ́ pɛɛnd. 8Pitandá piɛ́tɛ mapá ne tuúnye ɛlɛɛ́ tuúnye tú akáandɔ́, eŋíny yɔ́ɔ́p ɛlɛɛ́ eŋíny ya aŋualí. 9Pisas píɔ́p mapá ɛlɛɛ́ pínyɛ pilindíkén ni ipɛnɛ́ í núɛ́yɛ, kiyɔkɔt ekí pipapɔ́ píɔ́p mɛɛ́lɛ́ mapá ɛlɛɛ́ kiyɔkɔt kí pikálɛ́t pikapilɛ́ kutek kɔ́ɔ́kɔnɛ́ɛ aká píyuukanɛ́ɛ é pitíí. 10Ikɛ́n síɔ́p mapián á nimanɛ́n ɛnsɛ́ndí ɛlɛɛ́ ú iŋiŋɛ́, kɔ́ɔ́kɔ́ pukaaka puɔ́p nyɛɛ́ é kuséésenyi pɛɛnd ó sióli itáánɔ. 11Ɔkɔ́n ú pitandá wɔ́ unyɛɛ́ Éŋele u eŋulúm; kisiɛ́n kíɛ́yɛ́ na nuyúútɛnɛ nyɛ ɛ́ɛ́ Apatɔ́ŋɛ, nɛ nukilɛ́kɛ: Apoliɔ́ŋɛ, anakáánɛ́ kunyɛɛ́ ɛ́ɛ́ Íkátakata. 12Muyú múkutúan mátápɔ́k; múándɛ́ ɔ́ɔkɔŋɔn. 13Éŋele ukátíndátúɛ wɔɔtɔ́ŋɛt insɛ́p yɛɛyɛ́. Yɔɔ́p ekelú wóólinon ɔ́ mulɔŋ múni mú niwáánɛ́n ní pifunɔ́ pí Támbák nínyɛɛ́ kɛ́ɛ́yɛ́ ó pusíó, nituánán no kóol. 14Ekelú ukáánɛ́ ɛ́ɛ́pí ké Éŋele ukátíndátúɛ umaápá ni insɛ́p kɔ́ ɔmbɔ́k: «Olún Peéŋele epe péni pɛ́nyɛɛ́ pakútá á masiá má awaŋ wɔɔkɔ́n únyɛɛ́ kisiɛ́n ɛ́ɛ́ Efalátɛ.» 15Póokolun Peéŋele pakáánɛ́ péni yá á kisikɛl kikáánɛ, kí puɔ́s pukaánɛ́, oólí ukáánɛ́ nɔ yɔɔŋ ikáánɛ́ pɛ́mɛɛ́píɛ́ŋɛ́lɛ́ ɛ́ɛ́ pɔ́ɔ́n niap nímoómí ká aŋap átátɔ́ yɛ́ pɛɛnd pé kúúsí. 16Pɔ́ɔkiŋɔyitɛn kitáám kí pisimb píɔ́p pímaápá á pikapilɛ́: pímapá imbak íyáandɛ́ sí pemiliyɔ́ɔŋ. 17Káámɛ kí iŋɛ́nɛ́n, yá anɛ na pikapilɛ́ nɛ pɛɛnd pámaápá pamákátán á pɛ́ɛ moóyoosonin: pányɛ na pilaá pí núɛ́yɛ́ á kisas, tupilitupilɛ ɛlɛɛ́ yiik, pulúmúpulúmé ɛlɛɛ́ mɛnɛ́mɛnɛ́ɛ aká kilɔndɔ́ tiányípá, esúpésúpé ɛlɛɛ́ indusú. Itúɛ sí pikapilɛ́ mapá ɛlɛɛ́ ɛtɔ́ ú aŋuali; yiik ni inyóki ni indusú ááman kɔ́ɔ́p ké eŋít. 18Muyú emue mútát: yiik ni inyóki ni indusú múmaámán ké eŋít yá pikapilɛ́ múɔkɔɔ́n niap nímoómí ká aŋap átátɔ́ yɛ́ pɛɛnd pé kúúsí. 19Pukaaka pú pikapilɛ́ pikáánɛ́ nyɛ kɔ́ɔ́p ké eŋít ni ikɛ́n síɔ́p. Púnyɛ ɛ́ɛ́ ikɛ́n síɔ́p nyɛ ɛlɛɛ́ inyɔ́k; sínyɛ ni itúɛ́, ni itúɛ́ sikáánɛ́ kɔ́ɔ́p kí ikɛ́n pikapilɛ́ séésenyé pɛɛnd kɔ́ɔk. 20Pɛɛnd epé yiik ni inyóki ni indusú símaáman ké eŋít yá pikapilɛ́ mɛɛ́lɛ́ sítiɔ́n, tɛ ɛ́ɛ́ pɔ́píkɔt, pápíátɔn nɔ kilɔk kíɔ́p kí kusɔ́t; páayɔɔk no pusíó ó kuómókósí pilɔk pí piliínditíe, pifɛ́lɛ pí kóol púnyáanɛ pí muenyí, pí nuɛyɛ, pí atányí púnyáanɛ pí putɛ́, pítiányípá píɛ́nɛn, píɔ́pɔn, píkuɛndɛt. 21Péeken kupíkɔt nuɔ́nɔnɔ, maanyɛ́, ɛŋɛnd ú musɔm ne puépi.
© 2026, CABTAL