matiyu 24
24
Yesɔ nwanya aruu jaa Ɗa zɨɨlinɛ
1Yesɔ yaa jaa Ɗa rɛ a riinɔɔ akawɔɔ u ɗɔɔ yɛnɛ u jadɔyi, i au ɗɔbii i kpariu sisɨn aruu jaa Ɗa gbete shɔ maayɛ. 2Yesɔ shanɛ,<<Nn, ɔ zɛ ɗɔgbete shɔ maa ɓantɛ piti kpai. N gelɔɔtɛ, tari gbete wɔɔ shɔ yɛ yau ɓa ayuu zɔ aɗɔn niɓa; kopi shɔpiya shɔ yɛ zɨn atipi.>>
Yukɔnɛ a ratasinɛ
3Aɗagbete Yesɔ u ɗɔɔ ɔ̃nɛ ayuu kɔpɔ zeetung yɛ, u jaɗɔyi i yɛu ɗɔbii kaali aruu seti. I hɨunɛ, << Geliu pɛ, vim yɛ gaa pi ɗaviya, ivi yɛ tasirɛ nɛ a ɗaa anɛ pɛlitɛ viya wɔsɔ̃n ivi yɛ tasirɛ nɛ koo yisi nya tɛ viya? >>
4Yesɔ kasi nya nɛː <<Ɔ kn nɔɔ tɔ̃vɨng ɔkɔɔ yaa shɔne shɔwɔɔ ɗakkɔɔ rɛ.>> 5Shɔzɛ waanɛ iyɛ a ang nii, iyɛ yee nya nɛ, <<N kɔ pɛ kirisi, i yɛ ɗakki shɔ waanɛ ang nii.>> 6Ɔ yɛ ntaa ruu sɨng aɗɔ māāni a ɗɔɔ kpɛlɛ ni, ama ɔkɔɔ nta setinɛ. yukɔnɛm piti kpai yɛ ɔ̃tɔ, ama ji tasiɓa nɛ koou sɔ̃ɔ̃ nya tɛ gboti ɓa. 7Shɔgbete i a tipi wɔɔ iyɛ waa ɓaa a shɔ tipi wɔɔ, shɔgbete i kpati wɔɔ tipi i yɛ waa baa bɛzɔɔ kpati wɔɔ shɔ dɔlaa. Shɔzɛ waanɛ i vɔli waanɛ aruu wɔ̃ɔ̃. 8Vimkɔ yɛ ɔ̃ naa jaa yeene gbete gaa shɔ kɔnɛ yɛ.
9Kɛɗɔn shɔ yɛ sãwɔrɛ a ãwɔ shɔ -shɔ raa tasinɛyi anaa i nyo ɔ vɔrɔ, kopiya kpai iyɛ ɓɛ̃ɛ̃ ɔ ruubii ang yuu. 10Shɔzɛ waanɛ i yɛ yaa sisɨn ãnetɔ aɗawuni, i yɛ mɛli zɔ̃tɔ a bɛ̃ɛ̃ zɔ̃rɛ. 11Ɗa jashonɛ nya yeenɛyi waanɛ, i arɛ i ɗaki shɔzɛ waanɛ. 12Aruumkɔ ruu kɔ̃linɛ yɛ sãti koo waanɛ gbete yɛ pɔ̃ shɔzɛ waanɛ i ɓɛzɔɔ ruubii ɔrinɛ rɛ. 13Ama shɔgbete kɛ shinɛ dɔɔ ka ziti yɛnɛ lee nya sɔ̃nɛ yɛ raa naa tɔ. 14Shɔyɛ nwa Ɗalapa nya ruu bii piti kpai akoo aruu Ɗa kpati roone, aruu shɔ shinɛ laduru piti kpai, kɛdɔn koo yɛ yisi nya kɛkn.
Raaɓoonɛ pẽniɓa
15<< Ɔ yɛ zɛ vi sisɨn baanɛ tɔ waanɛ gbete Ɗa jashonɛ Daniyɛ shaayɛ, u ɗɔɔ shinɛ aɗɔ wɔsɔ-wɔsɔ. Shɔ laabeenɛ ɓalinɛ u zɛ tɔ.>> 16Kɛɗɔn shɔ gbete i a Yahudiya i yurɛ i gɛ̃ɛ kɛ kɔpɔ. 17Shɔ gbete kɛ ɔ̃nɛ au yuu jaa lapa ukɔno tipi nɛ, nɛ tu viwɔ ayɛti jaau ni. 18Shɔgbete kɛ ɔ̃nɛ dɔɔjaa ukɔ sɔnɛ nɛn tuu vibii kukinɛ. 19Lee yuu kɔnem yɛ ɔ̃ri sujaa yɛti kɛpi kovi a sujaa naa yini viyaǃ 20Ɔ gakki Ɗalapa tɔ leu kɔ ɔ̃ne a ɗaa sɔrɔ ko Lee Susune. 21Aɗawuni shɔyɛ ɓoo yori tɔ pɛ̃niba, yɛ ɔ̃ ɓa zaali ɓa aɗagbete shɔ pɛli koo ɓa, ane naa dɔddɔrim yɛ ɔ̃ sɔ̃n ɓa zaali ni ɓa. 22Ama aruu shɔ gbete Ɗalapa lɔi rɛɛ Ɗalapa sẽ diiu gãsi tɛ, shɔwɔ si ji raa naa ɓa, kɛ jo ruu shɔgbete shɔ lɔriyɛ. 23Aɗawuni shɔwɔ kɛ geline ne, <<kn nɔɔ pɛ, kirisi u yɛmiǃ ko, kirisi u a ɗɔwaǃ>> mɔkɔ ã tɔ̃vɨng ne ɗɔn. 24Kirisi nya yenɛyi ashɔ nya yenɛ Da jashonɛyi iyɛ arɛ pɛli vibii zaanɛ a ɗaki shɔ piti a shɔgbete shɔ lɔri yɛ ni naa shɔ si yarɛ neu ɔ̃ nankɔ yɛ. 25Zɛ pɛ, n gelɔɔ rɛ si diiu ji a ɓa.
26<< Naa shɔwɔ kɛ gelɔɔ nɛ, U yɛwa,a nya jaa laa, ɔkɔ shɛ ɓelinɛ; ko, n kɔ u yɛmi, u yeti jaa roone,>> mɔkɔ ã tɔ̃vɨng ne aɗɔn. 27Naa nɔgbete jallɛ shaa aka gnri taku yɛnɛ a paa jaa shɔzɛ ane yɛ ɔ̃ jo nankɔ. 28Aɗɔgbete vivɔrɔ kɛ ɔ̃ne aɗɔnyɛ, gãshaa vɔrɔ i ɔ̃ ji ɗɔukɔ.
Yesɔ Shɔzɛja anɛ
29Tɛ̃ɛti aknti dii yuu kɔnɛu kɔ
<< Ɗaa yɛ tɔɔɓa,
shɛlɛ yɛ tasi ɓa sɛ̃sɛ̃ niɓa;
sɛyi yɛ ɗɔli a lapa,
kakaa gbeteyi a nyasi yɛ zɨntitɔ aɗɔgbeteyi i a dɔnyɛ.>>
30Aɗawuni vigbete yɛ tasi Yesɔ shɔzɛja anɛ yɛ shɛkɛkn a nyasi, kɛɗɔn shɔ piti a koo i yɛ sɨntɔ aruu seti naa ikɛ zɛ Yesɔ shɔzɛja nɛ aɗɔɔ anɛ a sabu a nyasi lapa a kakaani wɔsɔ̃n bassinɛ kiriri. 31Ɗalapa yɛ sho Ɗa jashonɛ lapa a koo piti kpai a gãntini i geerɛ, iyɛ tɔli shɔ tɔ̃vɨngyi gbete Ɗalapa lɔyi yɛ piti kpai, yunɛ ɗɔgbete koo gaa yɛ yɛnɛ ɗɔgbete koo yisi yɛ.
Laa sɨnti u ɔ̃rɔɔ pɛ vimatinɛ
32<< Dɔddɔrim laa sɨnti u ɔ̃ pɛ vivi matinɛː Naa laa sɨnti kɛ ɔ̃nɛ naa miigappa kɛ gaa tanɛ nɛ ɗɔlikɛ gappa sɔɔ ɔ zɛtɔ nɛ ɗaa ɗɔnwanɛ atɛ māāni. >> 33Jinankɔ, ɔ kɛ zɛ vim nɛ piti kpai, ɔ yɛ zɛtɔ nɛ ɗau ɓatɛ maani, si Uɓeyelapa ɗaa anɛ atɛ maani, a nyejaa. 34N gelɔɔ tɛ ɔ kpaatɔ sisɨnǃ nɛ shɔ jakntimiyi i yɛ vɔɓa setɛ vim pɛlitɛ. 35Kolapa a koo mini yɛ tɛɛ tɔ, ama n ruu yɛ tɛɛ ɓa.
Shɔwɔ ji zɛ diiu ɓa a ɗauni ɓa
36<< Shɔwɔ ji zɛ diiu ɓa a ɗauni ɓa, ko Ɗa jashoneyi a kolapa, ko Ɗa jaa ma ji zɛ dii gbete vim yɛ pɛliyɛ ɓa, see ji Ɗalapa kɔ sheeli.>> 37Yesɔ shɔzɛja anɛ yɛ ɔ̃ naa vigbete kpaa shɔ a ɗaa Nuhu yɛ. 38Aɗagbete mii sãnɛ siji aɓayɛ, shɔ shaavitɔ a ɓonɛni, vɔshɔ a soroni i tɛ zɔtɔ, anɛ a dii gbete Nuhu to girgi yɛ; 39I nɔɔ ji ɓeli ɓa, anɛ ɗagbete mii sãnɛ arɛ a seyi piti kpai. Yɛ ɔ̃ jinankɔ ɗagbete Yesɔ shɔzɛja yɛ sɔyɛ. 40Aɗauni shɔzɛ ziti i yɛ ɔ̃ a ɗɔɔ jalanɛ; shɔ yɛ tuu gbete a yaa gbete. 41Suuyi ziti i yɛ ɔ̃ aɗɔɔ vi nannɛ, shɔ yɛ tuu gbete a yaa gbete aɗɔn.
42<<Aruumkɔ ɔ ɔ̃ nɔkãkkãri, aruugbete ɔ ji zɛ dii gbete Uɓeyelapa yɛ ayɛ ɓa.>> 43Ɔ zɛtɛ naa shɔwɛrɛ si zɛ ɗagbete ɓɔɔ yɛ tong wɛrɛ tɔ, si ɔ̃ nɔkãkkãri u zããri ɓɔɔtɔ u tou wɛrɛ ɓa. 44Aruumkɔ kopi dii shɔpiya ɔ ɔ̃ a nɔkãkãri, aruu Yesɔ shɔzɛja yɛ a ɗagbete ɔ ji pɔ̃ ɓa a sisɨn ni ɓayɛ.
Jawɛrɛ gbete nta ɓɛshɔwɛrɛ nya a jawɛrɛ gbete nta ɓɛshɔwɛrɛ nya ɓa
45<< Pi jawɛrɛ shɔpiya gbete u sẽrẽ aɗɔn au nta u shɔwɛrɛ nyatɔ yɛ, shɔ gbete u shɔwɛrɛ pɔ̃rɛ ayuu jawɛrɛ gãsiyi nɛu ãyi vishaatɔ aɗagbete i kasiyɛ.>> 46Jawɛrɛu yɛ nta bii nya tɔ̃nɛtɔ u shɔwɛrɛ kanɛ kɛ kpaunɛ aɗɔɔ vitɔ̃vɨng pɛlinɛ. 47N gelɔɔtɛ, shɔwɛrɛu yɛ pɔ̃ jawɛrɛu au yuu vi piti kpai. 48Ama naa jawɛrɛu kɛ ɔ̃nɛ shɔ kɔ̃linɛ kɛɗɔn yɛ geliu yuu nɛ, << N shɔwɛrɛ yɛ sɔɔ wɛrɛ ɓa tɛ̃ɛ̃ti ɓa,>> 49Kɛdɔn yɛ gaa u ɓɛzɔɔ jawɛrɛ gbete pɛli shonɛ wuniyɛ wāānɛ u to ɗɔɔ vishaanɛ a ɓooni a shɔ saa ɓoonɛyini aɗɔzɔɔ. 50Kɛɗɔn Jawɛrɛu u shɔwɛrɛ yɛ arɛ a dii gbete ji pɔ̃ ɓa a sisɨnni ɓa nɛn shɔwɛrɛ yɛ atɔ ɓa sɔ̃n aɗagbete ji zɛ ɓayɛ. 51U shɔwɛrɛ yɛ koliu kɛra-kɛra naa gbete shɔ pɛli shɔ-shɔ ɗakinɛyi yɛ. aɗɔwakɔ shɔ yɛ sɨnrɛ a shaa ntari shɛ̃ɛtɛ̃ɛ̃.
Valið núna:
matiyu 24: Laa
Áherslumerki
Deildu
Afrita
Want to have your highlights saved across all your devices? Sign up or sign in
The Word for the World International and The Word for the World Nigeria