लूका 3
3
बतिस्मो देवणवाळा यूहन्ना रौ परचार
(मती 3:1–12; मरकुस 1:1–8; यूहन्ना 1:19–28)
1आ बात तिबिरियुस महाराजा रै राज रा पनरवा साल री है, जद पुन्तियुस पिलातुस यहूदिया रौ हाकिम हो, हेरोदेस गलील रौ राजा हो, अर उणरौ भाई फिलिप्पुस इतूरैया अर त्रखोनीतिस रौ राजा हो, अर लियानियास अबिलेने रौ राजा हो। 2जद हन्ना अर कैफा महायाजक रा पद माथै हा। उण वगत परमेसर रौ वचन रिंदरोही मे जकरयाह रै बेटे यूहन्ना खनै पोचियो। 3यूहन्ना यरदन नदी रै आड़ै पाड़ै रा सगळी जगा माथै पाप री माफी खातर मन फिराओ रौ बतिस्मो लेवणा रौ परचार करतौ हो। 4ज्यूं परमेसर रै भविसयदाता यसायाह री किताब में लिख्योड़ौ है,
“रिंदरोही मे एक हेलौ करणैवाळै रौ हेलौ सुणीजै है,
परभु रै वास्तै मारग तैयार करौ अर उणरै मारग सीधौ करौ।
5हरैक घाटी भर दी जावैला,
अर हरैक भाखर अर धौरा नीचा किया जावैला।
अर जिकौ टेडा है सीधा,
अर जिकौ ऊंचा नीचा है वो चौरस मारग बणैला।
6तो हरैक प्राणी परमेसर रै उद्धार नै देखेला।”
7 #
मत 12:34; 23:33 लोगां री भीड़ यूहन्ना रै खनै बतिस्मो लेवण आवण लागी, अर वो लोगां नै एक ही बात केवतो हो, “हे साप रै बिचियो, आवणवाळै कोप ऊं बचनै वास्तै थांनै कुण सावचेत कर दिया। 8#यूह 8:33इण वास्तै अबै ऊं थै कांम ऊं ओ लागणो चाहीजै, की थै पाप नै छोड़ दियौ हो। अर आपरै मूंडै ऊं मत कैवौ, ‘अबराहम म्हौरौ पिता है।’ म्हैं थौरे ऊं कैवूं हूं, की परमेसर इण भाठै ऊं अबराहम रै वास्तै औळाद पैदा कर सकै है। 9#मत 7:19रुंखड़ै री जड़ो माथै कवाड़ियो तैयार है, अर हरैक उण रूंखड़ै नै जिकौ बड़िया फळ नीं लावै, वो काट दियौ जावैला, अर लाय में नोख दियौ जावैला।”
10लोग यूहन्ना नै पूछयौ, “तो म्हैं कांई करौ?”
11तो यूहन्ना उणौनै जबाब दियौ, “जिणरै खनै दो कुड़ता है, वो एक उणनै दैय दे जिणरै खनै एक ही कोनीं। अर जिणरै खनै खाणौ है, वो भी यूं ही करै।”
12 #
लूक 7:29
अर चुंगी लेवणवाळा भी बतिस्मो लेवण यूहन्ना रै खनै आयनै पूछयौ, “हे गुरु, म्हौ कांई करौ?”
13यूहन्ना उणौनै जबाब दियौ, “जिती चुंगी तैह है, उण ऊं घणी मत लेजो।”
14अर कीं सिपाई भी यूहन्ना ऊं ओ पूछयौ, “म्हौ कांई करौ?”
तो यूहन्ना उणौनै कयौ, “किणी ऊं दबाव देयनै रूपिया मत लौ। किणी माथै झूठौ दोस मत लगाओ अर अपणी तनखा ऊं खुस रैवौ।”
15लोग आवण वाळा मसीह री आस लगायोड़ा हा, अर आपो आपरै मन में सोचता हा, की यूहन्ना तो मसीह कोनीं है। 16तो यूहन्ना उणौनै कयौ, “म्हैं तो थांनै पांणी ऊं बतिस्मो देवूं हूं। पण म्हारै पछै जिकौ आवणवाळौ है, वो म्हारै ऊं घणौ ताकतवर है। म्हैं तो इण लायक भी कोनीं, की उणरै पगरखो री डोरी खोल सकूं, वो थांनै परमेसर री पवितर आतमा अर अग्नि ऊं बतिस्मो देवेला। 17उणरौ सूपड़ो उणरै हाथ मे है अर वो आपरै खेत नै साफ करैला। अर धान नै भंडार मे भरेला, पण वो डूरै नै ऐड़ी लाय में नोखेला जिकौ कदैई नीं बुझेला।” 18दूजी घणी बातां सुणायनै यूहन्ना उणौनै सुभ संदेस सुणातौ हो।
19 #
मत 14:3,4; मरकु 6:17,18 पण यूहन्ना, राजा हेरोदेस नै उणरा भाई फिलिप्पुस री लुगाई नै आपरै घर में घालणै रै कारण अर उणरै दूजै भूंडै कांमां रै कारण फटकार लगाई, 20तो राजा सगळौ ऊं भूंडौ ओ कांम करयौ, की यूहन्ना नै जेळ मे घाल दियौ।
यीसु रौ बतिस्मो
(मती 3:13–17; मरकुस 1:9–11)
21यूहन्ना नै जेळ मे बंद करणै ऊं पैला जद सगळा लोग बतिस्मो ले रिया हा, तो यीसु भी बतिस्मो लियौ। अर जद यीसु पराथना कर रिया हा, तद आभौ खुल गियो। 22#मत 3:17; मरकु 1:11; लूक 9:35पवितर आतमा खुद कबूड़ै रै ज्यूं उण माथै उतरी अर आ आकासवाणी होई, “थूं म्हारौ लाडलौ बेटौ है, म्हैं थारै ऊं घणौ राजी हूं।”
यीसु रा वडेरा
(मती 1:1–17)
23यीसु जद उपदेस देवण लागा, उण वगत वे लगोलग तीस साल रा हा। अर लोग ओ समझता हा, की वो यूसुफ रौ बेटौ है, अर यूसुफ जिकौ एली रौ बेटौ है, 24अर एली मतात रौ, अर मतात लेवी रौ, अर लेवी मलकी रौ, अर मलकी यन्ना रौ, अर यन्ना यूसुफ रौ। 25अर वो मत्तित्याह रौ, अर वो आमोस रौ, अर वो नहूंम रौ, अर वो असल्याह रौ, अर वो नोगह रौ। 26अर वो मात रौ, अर वो मत्तित्याह रौ, अर वो सिमी रौ, अर वो योसेख रौ, अर वो योदाह रौ। 27अर वो योनान रौ, अर वो रैसा रौ, अर वो जरुब्बाबिल रौ, अर वो सलतियेल रौ, अर वो नेरी रौ। 28अर वो मलकी रौ, अर वो अद्दी रौ, अर वो कोसाम रौ, अर वो इलमोदाम रौ, अर वो ऐर रौ। 29अर वो यहोसू रौ, अर वो इलाजार रौ, अर वो योरीम रौ, अर वो मतात रौ, अर वो लेवी रौ। 30अर वो समौन रौ, अर वो यहूदाह रौ, अर वो यूसुफ रौ, अर वो योनान रौ, अर वो इलयाकीम रौ। 31अर वो मलेआह रौ, अर वो मिन्नाह रौ, अर वो मतता रौ, अर वो नातान रौ, अर वो दाऊद रौ। 32अर वो यिसै रौ, अर वो ओबेद रौ, अर वो बोअज रौ, अर वो सलमोन रौ, अर वो नहसोन रौ। 33अर वो अम्मीनादाब रौ, अर वो अरनी रौ, अर वो हिसरोन रौ, अर वो फिरिस रौ, अर वो यहूदाह रौ। 34अर वो याकूब रौ, अर वो इसहाक रौ, अर वो अबराहम रौ, अर वो तिरह रौ, अर वो नाहोर रौ। 35अर वो सरूग रौ, अर वो रऊ रौ, अर वो फिलिग रौ, अर वो एबिर रौ, अर वो सिलह रौ। 36अर वो केनान रौ, अर वो अरपसद रौ, अर वो सेम रौ, अर वो नूह रौ, अर वो लिमिक रौ। 37अर वो मथूसिलह रौ, अर वो हनोक रौ, अर वो यिरिद रौ, अर वो महललेल रौ, अर वो केनान रौ। 38अर वो इनोस रौ, अर वो सेत रौ, अर वो आदम जिणनै परमेसर बणाया हा।
Valið núna:
लूका 3: RWR
Áherslumerki
Deildu
Afrita
Want to have your highlights saved across all your devices? Sign up or sign in
© NLCI CC BY-NC-ND 4.0