Ma-thi-ơ 16
16
Dan chmlih chmleek a trôôk
(Mak 8:11-13; Lu-ka 12:54-57)
1Bơl bnih Pha-ri-si n'hai Sa-đu-sê lôh u Brah Jê-sus, n'hai tuul Pang drơơl troong dan Pang aan bu mơq di chmlih chmleek a trôôk.#Mat 12:38; Lu 11:16. 2Dôh Pang ơh: [“Tơt meng mau, bơl 'bei maanh: ‘Nar au a kươi trôôk klanh, đươm lơyaang trôôk pơrhei.’ 3Nha lap aang ôi, bơl 'bei lah: ‘Nar au trôôk mi rlơm, đươm lơyaang trôôk pơrhei u duh jơ ngôw.’ Bơl 'bei gưt chưrleek srlah sơmbuh trôôk baah 'bưn chưrleek kươt pal chmlih chmleek tơt jơl ri nei laang?]#16:2-3 [“Tơt... laang?]: Knông m'baak plơơp 'bian ti 'bưn geh pal sêr au. 4Klap đơơk đaak kiat mrơơ au wơng joi di chmlih chmleek; dôh a kươi 'bưn geh di chmlih chmleek êch kươt ươn aan bu di gaaih chmlih chmleek Jô-na ri.” Ja nei Pang lơơi bu baah han.#Mat 12:39; Lu 11:29.
Kenh bnih Pha-ri-si ri
(Mak 8:14-21)
5Han rlach tơt kơh mak tôw, bơl jơrnơ a wich liêu nom n'hai. 6Brah Jê-sus lah n'hai bu: “Phrui mơq nhjrang kenh bnih Pha-ri-si u Sa-đu-sê ri.”#Lu 12:1. 7Bơl jơrnơ pơrgênh ta n'hai u mor: “Đươm bơl bơn 'bưn liêu nom pôl.” 8Gưt bei nei mơ Brah Jê-sus lah: “Ơi bơl ndêq chưt jơrnơ, a hay bơl 'bei leet pơrgênh ta n'hai u kaar bơl 'bei 'bưn geh nom? 9Bơl 'bei nha ndah gưt laang? Bơl 'bei 'bưn gênh pram ơơk nom aan pram ban bnih, u bơl 'bei pơrgum kươt pal êch sah nom ngroh?#Mat 14:17-21. 10Paich poh ơơk nom aan puôn ban bnih, u bơl 'bei pơrgum kươt pal êch sah nom ngroh?#Mat 15:34-38. 11A hay bơl 'bei 'bưn gưt laah Hei 'bưn êch mor teq u nom? Phrui mơq nhjrang kenh bnih Pha-ri-si n'hai Sa-đu-sê ri.” 12Khal nei, bơl jơrnơ mơ gưt laah Pang 'bưn maanh mơq nhjrang teq u kenh lơh nom, dôh teq u baak kne Pha-ri-si ri n'hai Sa-đu-sê.
Tơmbơh baak chôôl Phi-e-rơ ri
(Mak 8:27-30; Lu-ka 9:18-21)
13Tơt mưt kwaal Sê-sa-rê Phi-lip, Brah Jê-sus ôp bơl jơrnơ laah: “Tênh baak bu nday mor nei Koon Bnih laa 'bơơn?” 14Bơl jơrnơ ơh: “M'baak bnih mor laa Jang Bap-tit, m'baak nday mor laa Ê-li, m'baak nday nha nei aan laa Jê-rê-mi paich laa di mbu knông bơl grnưt noor.”#Mat 14:1-2; Mak 6:14-15; Lu 9:7-8. 15Pang lah laah: “Nha bơl 'bei nei laa Hei laa 'bơơn?” 16Si-môn Phi-e-rơ ơh laah: “Ay laa Yaang Krist, Koon Brah Ưn rêh yoot yôw.”#Ja 6:68-69. 17Brah Jê-sus lah n'hai bu: “Ơi Si-môn, koon Jô-na, smlaang aan 'bei! Đươm 'bưn geh pai u mhaam tơrsau ntil au aan 'bei, dôh laa Bươp Hei a lơ trôôk. 18Nha Hei, Hei maanh koon laah: 'Bei laa Phi-e-rơ, Hei a kươi sun moon Phung Jrah Hei lơ tmau au, pal lpôông phaan 'bưn jn'ah kươt Phung nei. 19Hei a kươi ndơơp gơl noh#16:19 S'bt: pal gơl noh. nggoor trôôk aan koon; paich ntil ơơn 'bei kơt a teh a kươi kot dol kơt a lơ trôôk, u paich ntil ơơn 'bei pơơk a teh a kươi kot kươt pơơk a lơ trôôk.”#Mat 18:18; Ja 20:23. 20Ja nei Pang pơrkhang bơl jơrnơ mor aan 'bơơn gưt Pang laa Yaang Krist.
Brah Jê-sus mor noor teq u baak chhưt n'hai baak rêh kươi Pang ri
(Mak 8:31 – 9:1; Lu-ka 9:22-27)
21A plah nei, Brah Jê-sus ptơơm tơrsau aan bơl jơrnơ gưt laah Pang phrui han tơt poh Jê-ru-sa-lem, phrui dol ơk ji rngiêl đươm bơl raanh ttơơm, bơl yau thwaai ndap ttơơm pôl bơl yau gưt jhai, u phrui dol lưm, tơt nar pei phrui rêh kươi. 22Phi-e-rơ liêu Pang ktôk êêng u sngaanh laah: “Brah ơi, Brah Ưn ơơn lơh bei nei! Kaar au a kươi 'bưn lôh tơt aan Brah laang!” 23Dôh Pang wih kươi u lah n'hai Phi-e-rơ: “Ơi Sa-tan, phrui rônh sot mak kươi Hei! 'Bei laa di a kaang aan Hei; đươm 'bei 'bưn gênh tơt kaar Brah Ưn ri, baah dơơn gênh tơt kaar koon bnih ri.”
24Ja nei Brah Jê-sus lah n'hai bơl jơrnơ laah: “Mơq 'bơơn êch tênh Hei nei phrui dhot teq chhak nơơm, tung chhư rglaang bơn baah tênh Hei.#Mat 10:38; Lu 14:27. 25Đươm paich 'bơơn êch đoh sm'boh rêh nơơm nei a kươi saap, nha 'bơơn đươm Hei baah saap sm'boh rêh nei a kươi wơng kươi kươt.#Mat 10:39; Lu 17:33; Ja 12:25. 26Mơq bnih êch kươt leq swich teh baah saap wêêng yaang nơơm nei geh thlay ơơn? Bnih nei a kươi pơih ơơn baah gơl wêêng yaang nơơm kươi? 27Đươm Koon Bnih a kươi lôh knông chring chraang Bươp bơn ri pôl n'hai bơl lênh brah. Plah nei, Pang a kươi ươn tkôm aan mbu bnih, tênh kaar bu lơh.#Mat 25:31; Rô 2:6. 28Ngan, Hei maanh bơl 'bei, pal du plah ta yoong au a kươi 'bưn chhưt noor tơt sau Koon Bnih lôh knông nggoor Pang ri.”
Valið núna:
Ma-thi-ơ 16: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.