Lu-ka 23
23
Brah Jê-sus di mat Phi-lat u Hê-rôt
(Ma-thi-ơ 27:1,2,11-14; Mak 15:1-5; Jang 18:28-38)
1Leq Phung jưm mlưm ta yoong jưn Pang tơt bôôk mat Phi-lat. 2Bu lap pnđing Pang laah: “Bơl hei ja sau bnih au nôôl phung raih tameh tawal, pơrkhang bơl hei ndơơp wal suai aan Sê-sa, u sơm nơơm laa Yaang Krist, lah snđach.” 3Phi-lat draang ôp Pang: “'Bei geh dip laa snđach raih Jo-thai 'bưn?” Brah Jê-sus ơh: “Nơơm 'bei ja lah bei nei.” 4Phi-lat mor teq u bơl yau thwaai ndap ttơơm n'hai phung raih: “Hei 'bưn sau bnih au geh dôih ơơn.” 5Dôh bu khang lah dhaap: “Bnih au trôt phung raih, chhuôr kne rlum kwaal Ju-đê, lap a kwaal Ga-li-lê aan tơt ktôk au.” 6Tơt ttang ntil nei, Phi-lat ôp mơq Pang geh ngan laa bnih Ga-li-lê pan. 7Tơt gưt kươt Pang thap ch'bap kmheng Hê-rôt ri, Phi-lat aan jưn Pang tơt Hê-rôt, jơl nei plah geh mat tu poh Jê-ru-sa-lem. 8Hê-rôt sau Brah Jê-sus nei broh đat, đươm n'au 'bau snđach ja ttang lah n'hai Pang u ndưng a mơp Pang n'hai kmbưng kươt mơq Pang lơh chmlih chmleek. 9Nei mơ, snđach draang ôp Pang ơk ndroong, dôh Pang 'bưn ơh ơơn leq. 10Bơl yau thwaai ndap ttơơm u bơl yau gưt jhai ta yoong dơơh nei pnđing Pang đat đuôt. 11Hê-rôt u bơl lênh jam joot n'hai đam điêl Pang, aan Pang dook mlơm ao ndraang ja nei jưn ndơơp Pang aan Phi-lat. 12Noor nei, Phi-lat u Hê-rôt ta kmang, dôh knông nar nei bu but gnasaal.
13Phi-lat pơrgum bơl yau thwaai ndap ttơơm, bơl bnih liêu troong u phung raih kươi baah mor laah: 14“Bơl ay ja liêu ndơơp bnih au aan hei teq u dôih chhôch raih tameh tawal; dôh hei ja ôp di mat bơl ay, nei 'bưn sau bnih au geh di dôih ơơn pa bơl ay ja pnđing. 15Hê-rôt kot sau bei nei, đươm ja ndơơp kươi bnih au aan hei. Bei nei, bnih au ja 'bưn lơh ntil ơơn dip jah chhưt 16mơ hei a kươi pơm sơmboong ja nei krôih sot.” 17[Tênh rnđơơih, laap nar ryơơng, kan ttih phrui krôih mbu bnih khaam aan phung raih.]#23:17 Knông m'baak plơơp 'bian ti laa 'bưn geh ndroong 17.
18Bu ta pôl hao khuôl: “Phrui lưm bnih au ơơi u krôih Ba-ra-ba aan bơl hei!” 19Ba-ra-ba dol gôq khaam đươm dôih lơh tameh tawal knông poh u lưm bnih. 20Phi-lat êch krôih Brah Jê-sus mơ ndih mor ndit phung raih. 21Dôh bu hao khuôl: “Pơng đênh bu lơ tơơm chhư rglaang! Pơng đênh bu lơ tơơm chhư rglaang!” 22Phi-lat kươi mor n'hai bu tơt wưt pei: “Bnih au ja lơh ntil đơơk ơơn? Hei 'bưn wơng sau bu geh dôih ơơn dip jah chhưt. Nei mơ, hei a kươi pơm sơmboong bu ja nei krôih.” 23Dôh bu dươn troh mơh huôih, dan phrui pơng đênh Pang teq u tơơm chhư rglaang; u baak troh gmhaar bu ri ja jn'ah. 24Bei nei Phi-lat pơrkat tênh baak drơnan bu ri. 25Bu krôih bah khaam pa bu ja dan, laa bah pơrsup u lưm bnih, ja nei ndơơp Brah Jê-sus aan bu tênh rnđêch bu.
Brah Jê-sus dol pơng đênh lơ chhư rglaang
(Ma-thi-ơ 27:32-44; Mak 15:21-32; Jang 19:17-27)
26Tơt jưn Brah Jê-sus han, bu nhôp mbu bnih Si-ren, chhak Si-môn, a poh lôt hao, u maanh bi phrui tung tơơm chhư rglaang tênh a kươi Pang. 27Geh phung raih ơk đat han tênh Brah Jê-sus u geh ơk dơur gơk kơtoh nhim ngliêng Pang. 28Dôh Brah Jê-sus wih kươi lah n'hai bu: “Ơi koon ur Jê-ru-sa-lem, khơơm nhim u Hei, baah phrui nhim teq u chhak nơơm bơl 'bei u koon sau bơl 'bei. 29Đươm au, pal nar êch dơơh tơt, bu nday a kươi mor: ‘Smlaang aan mei dơur rnuônh, aan pưl 'bưn u ptoh 'bưn aan koon oq!’ 30Ja nei bu mor n'hai bnơm: ‘Phrui ha pling bơl 'bei!’ u mor n'hai yôh: ‘Phrui krup pôn bơl hei!’ 31Đươm mơq tơơm chhư lngut pa bu nday nha gôq dơq bei au nei tơơm chhư ranh a kươi sot bei êch?” 32Bu kot jưn baar du dôih 'baap nday jah lưm chhưt pôl n'hai Pang. 33Jơl tơt di ktôk chôôl laa Bnơm Tting bôôk, bu pơng đênh Pang teq u chhư rglaang pôl n'hai baar bah dôih 'baap: di mbu mak ma, di mbu mak giêu Pang. 34[Brah Jê-sus r'bon dan laah: “Smbah Bươp, dan krôih aan bu đươm bu 'bưn gưt nơơm bu lơh ntil ơơn.”]#23:34 [Brah... ơơn.”]: Knông m'baak plơơp 'bian ti 'bưn geh sêr au. Ja nei bu pool ta toon ao ryoq Pang ri. 35Phung raih nei ta yoong mơq, nha bơl bnih liêu troong nei đam điêl Pang laah: “Bu ja đoh bơl nday. Mơq bu ngan laa Yaang Krist, bnih kươt sach Brah Ưn ri, nei phrui aan bu đoh êêng chhak nơơm ơơi!” 36Bơl lênh kot đam điêl Pang, han dơơh ndơơp daak sraat aan Pang ôn 37u mor: “Mơq ay laa Snđach raih Jo-thai, phrui đoh êêng chhak nơơm ơơi!” 38Mak trôôk bôôk Pang geh ndroong sêr:#23:38 geh ndroong sêr: Knông m'baak plơơp 'bian ti laa geh ndroong sêr kươt 'bian dơng baak Hi-lap, La-tinh, n'hai Hê-bơ-rơ. BNIH AU LAH SNĐACH RAIH JO-THAI.
39Di mbu knông baar du dôih 'baap dol yôông kot lok laanh Pang laah: “Ay 'bưn geh laa Yaang Krist laang? Phrui đoh êêng nơơm u leq bơl hei nha!” 40Dôh bah tôw têh gmhaar bu: “May kot dol pôl mlơm phaat bei bu, nha 'bưn n'hông Brah Ưn laang? 41Bơl bơn dol phaat laa dip, đươm keep hei dol dip teq u kaar hei lơh; dôh bu au 'bưn geh lơh di ntil ơơn tih ch'bap.” 42Hươi bu nei mor: “Smbah Jê-sus, tơt Ay mưt nggoor nơơm ay hôm, dan gênh tơt hei!” 43Brah Jê-sus ơh: “Ngan, Hei maanh 'bei, nar au 'bei a kươi kươt gôq n'hai Hei knông Pa-ra-đi.”#23:43 Pa-ra-đi: Rơih lah nggoor trôôk.
Baak chhưt Brah Jê-sus ri
(Ma-thi-ơ 27:45-56; Mak 15:33-41; Jang 19:28-30)
44Bei au, jôm teh kot mang jơ ngôw a tơmlai lwah nar tam aan tơt pei bêl mau.#23:44 S'bt: Bêl ttal prau tơt ttal sưn, awap laa bêl klap prau tơt bêl klap sưn. 45Mat nar but jơ ngôw; knat m'ang knông nhi r'bưn a yah baar bôh. 46Brah Jê-sus khuôl mơh nha laah: “Smbah Bươp, Koon dan ndơơp wêêng yaang kươi knông ti Bươp!” Pang mhei mor luôih nei kơsot n'hơm ptut. 47Sau baak kaar ja lôh tơt, kan bôôk raanh tư wơơl Brah Ưn laah: “Ngan bnih au laa bnih sêch song!” 48Leq phung raih pơrgum kươi jah mơq baak kaar au; tơt sau ntil ơơn ja lôh tơt nei bu gơk kơtoh baah plơq siq. 49Leq sêch bơl bnih ta ơih Brah Jê-sus u bơl dơur tênh Pang a Ga-li-lê kot ta yoong ngngai mơq sau pal kaar nei.#Lu 8:2-3.
Baak rôôp tơơp Brah Jê-sus
(Ma-thi-ơ 27:57-61; Mak 15:42-47; Jang 19:38-42)
50Geh di mbu chhak laa Jô-sep, bnih klung kaar Phung kliêu Jưm mlưm, laa bnih klanh u sêch song, 51'bưn rgoh teq u rwach u kaar lơh bơl bnih tôw ri. Jô-sep gôq a poh A-ri-ma-thê klung kwaal Ju-đê laa bnih cham nggoor Brah Ưn. 52Bu han tơt Phi-lat dan kmôôch Brah Jê-sus ri. 53Tơt ja liêu kmôôch Pang jưr, Jô-sep nhop u knat look, ja nei dơih Pang knông rhuung tmau ja 'boh, ktôk ndah rôôp 'bơơn ơơm. 54Bei au laa nar Riêp u nar sa-'bat êch dơơh tơt. 55Bơl dơur han pôl n'hai Brah a kwaal Ga-li-lê kot han tênh jah mơq kmôôch u mơq bu rôôp tơơp Pang. Ja nei bu plơq siq, u riêp griêng chhơm n'hai pring chhơm. 56Nar sa-'bat bu rlu rlơk tênh ch'bap.
Valið núna:
Lu-ka 23: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.