Lu-ka 21
21
Mei pndrau ndơơp piyơ
(Mak 12:41-44)
1Brah Jê-sus nggơơr mat, sau bơl bnih khunh plah teq prak piyơ bu ri teq u pi thông r'bưn. 2Pang kot sau mbu mei pndrau l'ơơi piyơ baar slưng prak. 3Pang lah: “Ngan, Hei lah bơl 'bei, mei pndrau l'ơơi au ja piyơ ơk huôih leq sêch bơl bnih nday. 4Đươm jôm bnih kot pơih griêng ngroh baah piyơ; nha mei pndrau au l'ơơi pngot đat, dôh ja piyơ leq sêch ntil ơơn mei nei geh jah siêm rêh nơơm.”
Brah Jê-sus tơmbơh noor teq u baak lơh rlơm poh Jê-ru-sa-lem n'hai Nar Brah plơq kươi
(Ma-thi-ơ 24:1-51; Mak 13:1-37)
5Khal geh pal du mor teq u kaar nhi r'bưn kươt ei mon u tmau klanh n'hai til griêng, Brah Jê-sus lah: 6“A kươi geh nar leq sêch ntil ơơn bơl 'bei sau au a kươi a rlơm leq, 'bưn geh di rklôw tmau êch nha kơơl lơ rklôw tmau nday.” 7Bu ôp Pang: “Ơi Yau, khal êch pal kaar au a kươi lôh tơt, u geh mbich mbơơi ơơn aan gưt pal kaar nei êch dơơh lôh tơt?” 8Pang ơh: “Phrui nhjrang, khơơm teq 'bơơn kơhok lhiat bơl 'bei, đươm geh ơk bnih a kươi lhiat saak Hei lôh baah mor laah: ‘Nơơm hei laa yaang nei u tơt jơl êch dơơh tơt hôm!’ Bơl 'bei khơơm tênh bu. 9Tơt bơl 'bei ttang mor teq u talơh tapanh, tơrlêêng tơrlai nei khơơm hơt mrơt; đươm pal kaar au phrui lôh tơt, dôh ndah phrui laa ptut drơh laang.”
10Ja nei Pang lah ndih: “Raih au a kươi kn'hao kmang n'hai raih nday, daak ti ta wal kươi daak su; 11a kươi geh pal rlơm teh ttih, nh'hit pngot n'hai pơrtanh praach a ơk ktôk; a kươi geh pal kaar ring sm'baang u chmlih chmleek ttih a lơ trôôk. 12Dôh di mat pal ntil nei lôh tơt, bơl 'bei a kươi đươm saak Hei baah dol bu nday nhôp kơt, bu jưn ndơơp bơl 'bei aan nhi pơrgum u druung khaam; bơl 'bei a kươi dol têêk tơt di mat bơl snđach u yau tông. 13Au laa phrui jah bơl 'bei lơh ndraanh. 14Bei nei bơl 'bei phrui gênh srlah knông bôôk, khơơm a gênh noor phrui koh roong nơơm bei êch,#Lu 12:11-12. 15đươm Hei a kươi ươn bơl 'bei baak mor u baak gưt jhai baah 'bưn bah kmang êch awap ta wal u ndun pơrlơt kươt. 16Bơl 'bei a kươi dol mei bươp, oh bi, phung mbaang, gnasaal nơơm nhôp ndơơp, u bu a kươi lưm pal du knông bơl 'bei. 17Bơl 'bei a kươi dol jôm bnih kiêr đươm saak Hei. 18Dôh di kong chhok lơ bôôk bơl 'bei kot 'bưn saap ơơm. 19Chkhưm baak pơrkhom baah bơl 'bei prap kươt wêêng yaang nơơm.
20Tơt bơl 'bei sau poh Jê-ru-sa-lem dol bơl lênh kum rlum nei gưt laah baak lơh rlơm poh nei êch dơơh tơt. 21Plah nei, 'bơơn gôq knông kwaal Ju-đê phrui kup lơ bnơm; 'bơơn gôq knông poh, phrui han sot gaaih; 'bơơn gôq a srei, khơơm plơq teq u poh. 22Đươm nei laa pal nar ta taang, jah aan jôm baak ja 'bian kươt dip plak. 23Knông pal nar nei, ji rngiêl aan dơur mbưn u bơl mei nha aan koon oq! Đươm A kươi geh r'baak ttih a swich teh u baak hao nuih jưr lơ raih au. 24Bu a kươi a kơq a teh pla pêh u a kươi dol liêu lơh dêch klung pal daak. Poh Jê-ru-sa-lem a kươi dol raih agaih jaq tơl aan tơt khal bơl raih agaih kươt sơp. 25A kươi geh pal mbich mbơơi êêng lơ mat nar, mat khay u pal smanh; nha a teh, bơl raih rmlơng gênh lhit lhaat di mat daak rmưt rlai kmbuôl rpuh.#Pơơk 6:12-13. 26Bu nday han lơbai đươm hơt mrơt jơl knông cham ntil ơơn êch dơơh lôh tơt aan play teh au đươm pal kmheng lơ trôôk a kươi dol luônh lơgơh. 27Bei au swich teh a kươi sau Koon Bnih pơih kmheng ttih a sroh ttih baah gôq lơ lwah nduq.#Pơơk 1:7. 28Khal êch pal kaar nei ptơơm lôh tơt, phrui ta yoong song, ngơơk bôôk, đươm baak đoh kwaai bơl 'bei plah lôh dơơh.”
29Pang krơơ aan bu di pn'geh ruk: “Phrui mơq tơơm lwi tôw u leq pal tơơm nday. 30Tơt bu mhei kmuôn, bơl 'bei sau nei gưt laah khal waai êch dơơh lôh. 31Kot bei nei, tơt bơl 'bei sau pal ntil baak nei lôh tơt nei gưt nggoor Brah Ưn ja êch dơơh. 32Ngan, Hei lah bơl 'bei, klap au a kươi 'bưn han rlach aan tơt khal jôm baak tôw lôh tơt. 33Teh trôôk a kươi han rlach, dôh baak Hei mor a kươi 'bưn geh khal êch rlach laang.
34Bei nei, phrui njrang! Ach laah đươm baak sôông sa ha rơk ir, bnhưl bnhoq u baak a gênh klap au lơh aan chưt bơl 'bei rwêch rwưl pan; u Nar nei lôh a drot bei dak rlêh lơ bơl 'bei, 35kot bei leq sêch jôm bnih gôq rlum play teh. 36Bei nei, phrui kah rngeh yoot nggan u r'bon dan jah bơl 'bei sơp kmlang het rlach jôm ntil a kươi lôh tơt, u ta yoong di mat Koon Bnih.”
37Nar, Brah Jê-sus kne knông nhi r'bưn, nha tơt jơ ngôw Pang han sot u gôq rlach mang lơ bnơm Ô-liu.#Lu 19:47. 38Aang ôi, leq phung raih lôh u Pang knông nhi r'bưn jah iat Pang chhuôr kne.
Valið núna:
Lu-ka 21: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.