Jang 5
5
Brah Jê-sus tu poh Jê-ru-sa-lem. – Brah tơmbah a tơrlung Bê-têt-đa
1Kơi nei, laap di nar ryơơng raih Jo-thai ri, Brah Jê-sus han hao poh Jê-ru-sa-lem. 2Tu Jê-ru-sa-lem, dơơh lpôông Bưr, geh di tơrlung daak, baak Hê-bơ-rơ chôôl laa Bê-têt-đa.#5:2 Bê-têt-đa: Knông m'baak plơơp 'bian ti laa Bêt-sai-đa, paich laa Bêt-sa-tha. Tơrlung geh pram lpôông dring. 3Ơk đat bnih tanh ji, têch tiah, chook trei, awiêl bêch tu nei. [Bu kơp tơt daak lhơn, 4đươm rwaq rwai geh mbu lênh Brah ri kjưr u tơrlung, lơh aan daak lhơn. Plah daak lhơn, 'bơơn jưr u tơrlung noor, nei paich geh pơrtanh ơơn kot kươt baaq.]#5:3-4 [Bu... baaq.]: Knông m'baak plơơp 'bian ti 'bưn geh ndroong pal sêr au. 5Geh mbu bnih pơrtanh ja pei jơt phaam snam hôm. 6Brah Jê-sus sau bnih au bêch nei u gưt dol pơrtanh u jook mơ ôp: “'Bei geh êch kươt baaq đêêl?” 7Bnih pơrtanh ơh: “Ơi ay, 'bưn geh 'bơơn jraih jang hei jroh u tơrlung daak plah rpôh, tơt hei lôh nei bu nday ja jưr noor hei hơơi.” 8Brah Jê-sus maanh: “Phrui ta yoong, tung ndơl 'bei u han.” 9Bnih nei kơndaal kươt baaq pơrtanh, tung ndơl u han. Nar nei laa nar sa-'bat.
Raih Jo-thai pnđing Brah Jê-sus lơh tih nar sa-'bat
10Bơl bnih Jo-thai mor n'hai bnih kươt tơmbah: “Nar au laa nar sa-'bat, 'bei 'bưn kươt ch'bap tung ndơl.” 11Dôh bu nei ơh: “Bnih ja tơmbah aan hei maanh hei: ‘Phrui tung ndơl 'bei u han.’” 12Bu ôp: “'Bơơn laa bnih maanh ay: ‘Phrui tung ndơl u han’?” 13Dôh bnih kươt tơmbah 'bưn gưt laa 'bơơn, đươm Brah Jê-sus chhiat mưt n'hai phung ơk tu nei. 14Kơi nei, Brah Jê-sus a mơp bnih au knông nhi r'bưn nei mor n'hai bu nei: “Au, 'bei ja kươt baaq pơrtanh hơơi, khơơm lơh dôih hôm, ach geh ntil jrơơk huôih lôh tơt aan 'bei pan.” 15Bnih au han mor n'hai bơl bnih Jo-thai laah Brah Jê-sus laa bnih ja tơmbah pơrtanh aan bơn. 16Đươm nei, bnih Jo-thai nhôp kơt Brah Jê-sus, đươm Pang lơh pal kaar au knông nar sa-'bat. 17Dôh Pang lah n'hai bu: “Bươp Hei nha lơh kaar aan tơt bei au, Hei kot lơh kaar bei nei.” 18Nei mơ, bnih Jo-thai wơng ndroong jah lưm Pang, đươm Pang 'bưn dơơn km'bach ch'bap nar sa-'bat baah nha khuôl Brah Ưn laa Bươp, aan nơơm bơn ta drơơl n'hai Brah Ưn.
19Đươm bei nei, Brah Jê-sus mor n'hai bu: “Ngan, Hei maanh ngan bơl 'bei, Koon 'bưn geh lơh êêng ntil ơơn, dôh dơơn lơh ntil ơơn Koon sau Bươp lơh; đươm sơp ntil ơơn Bươp lơh, Koon kot lơh bei nei. 20Đươm Bươp srlanh Koon u tơrsau aan Koon jôm ntil Bươp lơh. Bươp nha tơrsau aan Koon a kơơi pal kaar ttih huôih pal kaar au nha jah bơl 'bei phrui êêng aang. 21Bei Bươp ja tak lơh bơl bnih chhưt rêh kươi bei êch nei Koon kot ươn baak rêh aan bnih Koon êch bei nei. 22Bươp kot 'bưn pơrkat 'bơơn ơơm, dôh ndơơp sơp ch'bap pơrkat aan Koon, 23jah jôm bnih kot đing Koon kot bei đing Bươp ei. 'Bơơn 'bưn đing Koon nei kot 'bưn đing Bươp laa Yaang ja maanh Koon lôh. 24Ngan, Hei maanh bơl 'bei ngan, 'bơơn iat baak Hei u jơ Yaang ja maanh Hei nei kươt baak rêh yoot yôw u 'bưn dol pơrkat, dôh chơloong rlach baak chhưt baah lap baak rêh. 25Ngan, Hei maanh bơl 'bei ngan, bêl êch dơơh lôh, u ja lôh hơơi, tơt bơl bnih chhưt a kươi ttang baak Koon Brah Ưn, u bơl bnih ttang a kươi rêh. 26Đươm bei Bươp geh baak rêh knông nơơm bơn bei êch nei Bươp kot ươn Koon baak rêh knông nơơm bơn bei nei. 27Bươp ja ndơơp ch'bap kmheng kươt lơh baak pơrkat aan Koon, đươm Koon laa Koon Bnih. 28Khơơm êêng aang u ntil au, đươm bêl êch dơơh lôh, tơt leq sêch bơl bnih gôq knông kmôôch a kươi ttang baak Pang u chwaat sot; 29'bơơn ja lơh ntil klanh nei rêh kươi jah kươt rêh, 'bơơn ja lơh ntil ap nei rêh kươi jah dol pơrkat. 30Hei 'bưn geh lơh êêng ntil ơơn; Hei pơrkat tênh ntil Hei ttang, u baak pơrkat Hei ri laa spoong, đươm Hei 'bưn wơng rnđêch êêng nơơm, dôh wơng rnđêch Yaang ja maanh Hei.
31Mơq Hei lơh ndraanh êêng aan nơơm nei baak ndraanh Hei ri 'bưn dip jah jơ. 32Geh Yaang nday lơh ndraanh aan Hei; Hei gưt baak Yaang nei lơh ndraanh teq u Hei laa a ngan. 33Bơl 'bei maanh bnih lôh n'hai Jang, u Jang ja lơh ndraanh aan song klanh.#Ja 1:19-27; 3:27-30. 34'Bưn geh Hei chkhôm u baak ndraanh koon bnih ri, dôh Hei mor pal ntil au jah bơl 'bei kươt đoh. 35Jang laa bôl đeng kkaat aang, nha bơl 'bei nei êch buônh broh knông rơn aang bu ri. 36Dôh Hei geh di baak ndraanh ttih huôih Jang ri; đươm pal kaar Bươp ndơơp aan Hei lơh sơp, đươm pal kaar Hei plah lơh tênh a au, lơh ndraanh laah Bươp ja maanh Hei. 37Nơơm Bươp, Yaang ja maanh Hei, kot lơh ndraanh aan Hei. Bơl 'bei ndah ttang baak Pang, paich sau sm'aang Pang,#Mat 3:17; Mak 1:11; Lu 3:22. 38u baak Pang kot 'bưn gôq knông bơl 'bei, đươm bơl 'bei 'bưn jơ Yaang Pang ja maanh lôh. 39Bơl 'bei mơq sơglap Sm'bưt Brah, đươm gênh laah knông nei geh baak rêh yoot yôw. Đươm Sm'bưt Brah lơh ndraanh teq u Hei, 40bei nei baah bơl 'bei 'bưn êch lôh u Hei jah kươt baak rêh yoot yôw.
41Hei 'bưn r'bon chring chraang ktôk koon bnih, 42dôh Hei gưt bơl 'bei 'bưn geh baak srlanh Brah Ưn ri gôq knông nơơm bơn. 43Hei ja tơmoh chhak Bươp baah lôh, dôh bơl 'bei 'bưn chơp wơơt Hei, mơq geh 'bơơn nday tơmoh chhak nơơm bơn baah lôh nei bơl 'bei a kươi chơp wơơt. 44Bơl 'bei nha pơih chring chraang pôl n'hai, 'bưn wơng r'bon chring chraang lôh a Brah Ưn mbu ei nei lơh bei êch bơl 'bei jơ kươt? 45Khơơm gênh laah Hei a kươi pnđing bơl 'bei di mat Bươp. Bnih a kươi pnđing bơl 'bei laa Môi-se, bnih pa bơl 'bei cham kơndưng. 46Mơq bơl 'bei jơ Môi-se nei kot jơ Hei, đươm Môi-se 'bian teq u Hei. 47Dôh mơq bơl 'bei 'bưn jơ pal baak Môi-se 'bian nei lơh bei êch bơl 'bei jơ baak Hei kươt?”
Valið núna:
Jang 5: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.