Jang 20
20
Baak rêh kươi Brah Jê-sus ri
(Ma-thi-ơ 28:1-8; Mak 16:1-8; Lu-ka 24:1-12)
1Aang ôi nar muôi knông rthôl, trôôk plah nha jơ ngôw, Ma-ri Ma-đơ-len han tơt kmôôch, sau tmau ja kươt ndêch rlach kmôôch. 2Bei nei, mei ta prang lôh u Si-môn Phi-e-rơ u jơrnơ nday, laa bnih Brah Jê-sus srlanh, u mor: “Bu nday ja ndêch Brah rlach kmôôch, bơl hei 'bưn gưt bu teq Pang a êch?” 3Phi-e-rơ n'hai jơrnơ tôw chwaat sot, han tơt kmôôch. 4Leq baar du ta prang pôl, dôh jơrnơ tôw ta prang rong huôih Phi-e-rơ u tơt kmôôch noor. 5Bu kun u teh mơq u kluung, sau knat nhop tu nei, dôh 'bưn mưt. 6Si-môn Phi-e-rơ tênh tơt nei, chwaat mưt u knông kmôôch, sau knat nhop tu nei ei, 7nha kma krup bôôk Brah Jê-sus nei 'bưn gôq pôl n'hai knat, dôh lnôn leet teq êêng a gêêng di ktôk. 8Plah nei, jơrnơ tôw ja tơt kmôôch noor, kot chwaat u kluung, sau u jơ. 9Dôh bu nha ndah gưt baak Sm'bưt Brah ja 'bian laah Pang phrui a ktôk chhưt rêh kươi. 10Ja nei bơl jơrnơ plơq siq nhi.
11Ma-ri ta yoong a gaaih kmôôch baah nhim. Mei đah nhim đah kun u teh mơq knông kmôôch, 12sau baar du lênh brah dook ao book gôq tu ktôk ja teq kơmôich Brah Jê-sus ri, di mbu gôq a bôôk, di mbu gôq a jơng. 13Baar lênh brah ôp: “Ơi ay, a hay ay nhim?” Ma-ri ơh: “Đươm bu nday ja ndêch Brah hei han, hei 'bưn gưt bu teq Pang a êch!” 14Mhei lơơi mor, mei wih kơơi, sau Brah Jê-sus plah ta yoong, dôh mei 'bưn gưt nei laa Brah Jê-sus. 15Brah Jê-sus ôp mei: “Ơi ay, a hay ay nhim? Ay wơng 'bơơn?” N'ơơn laah nei laa bnih lơh mir, mơ mei mor: “Ơi yau, mơq yau ndêch Brah hei, dan tơmbơh aan hei gưt yau ja teq Brah a êch jah hei a kươi lôh liêu siq.” 16Brah Jê-sus khuôl: “Ma-ri!” Mei wih kơơi nhôq baak Hê-bơ-rơ ơh laah: “Ra-bu-ni!” (rơih laa Yau). 17Brah Jê-sus maanh: “Khơơm pưt tơt Hei, đươm Hei ndah hao n'hai Bươp! Dôh phrui han tơt n'hai oh bi Hei, maanh bu laah: Hei plah hao n'hai Bươp Hei u Bươp bơl 'bei, n'hai Brah Ưn Hei u Brah Ưn bơl 'bei.” 18Ma-ri Ma-đơ-len han tơmbơh aan bơl jơrnơ laah mei ja sau Brah, u Pang ja mor aan mei pal ntil au.
Brah Jê-sus lôh sot u bnih jơrnơ
(Ma-thi-ơ 28:16-20; Mak 16:14-18; Lu-ka 24:36-49)
19Mau nar nei, nar muôi knông rthôl, lpôông ktôk bơl jơrnơ gôq kot tang đươm n'hông bnih Jo-thai. Brah Jê-sus lôh ta yoong a kluung bu u mor: “Sroong boong aan bơl 'bei!” 20Ja mor, Pang aan bu mơq ti u rpaih nơơm. Tơt sau Brah, bơl jơrnơ broh s'bai ngan. 21Pang leet mor n'hai bu: “Sroong boong aan bơl 'bei! Bei Bươp ja maanh Hei bei êch, Hei kot maanh bơl 'bei bei nei.” 22Ja mor, Pang kơsot n'hơm lơ bu u mor: “Phrui wơơt Brah Wêêng. 23Mơq bơl 'bei krôih dôih aan 'bơơn nei dôih bnih nei ri a kươi kươt krôih; mơq bơl 'bei dơp dôih 'bơơn nei dôih bnih nei ri a kươi dol dơp lơơi.”#Mat 16:19; 18:18.
24Plah Brah Jê-sus lôh nei Thô-ma chôôl laa Đi-đim, di mbu knông jmơt baar jơt jơng, 'bưn geh gôq a nei n'hai bu. 25Bơl jơrnơ nday mor n'hai bu: “Bơl hei ja sau Brah.” Dôh Thô-ma ơh: “Mơq hei 'bưn sau kn'hap đênh knông paang ti Pang, mơq hei 'bưn dơih koon dong hei teq u kn'hap đênh, u 'bưn dơih paang ti hei teq u rpaih Pang nei hei a kươi 'bưn jơ.” 26Phaam nar kơơi, bơl jơrnơ pơrgum knông nhi, Thô-ma kot geh a nei n'hai bu. Paich jum lpôông kot tang, Brah Jê-sus lôh ta yoong a kluung bu u mor: “Sroong boong aan bơl 'bei!” 27Ja nei Pang maanh Thô-ma: “Phrui dơih koon dong ti 'bei teq u đau u mơq paang ti Hei. Phrui ndơơp paang ti 'bei sot u dơih teq u rpaih Hei. Khơơm 'bưn jơ, dôh phrui jơ!” 28Thô-ma ơh laah: “Ơi Brah hei ri u Brah Ưn hei!” 29Brah Jê-sus mor: “Geh lah đươm sau Hei mơ ay jơ pan? Smlaang aan pal bnih 'bưn sau baah jơ!”
30Brah Jê-sus nha lơh ơk chmlih chmleek nday di mat bơl jơrnơ baah 'bưn 'bian knông sm'bưt au. 31Dôh pal kaar au kươt 'bian jah oh bi jơ laah Brah Jê-sus laa Yaang Krist, Koon Brah Ưn, u jah tơt oh bi jơ#20:31 jơ: Knông m'baak plơơp 'bian ti laa jơ ndih. nei chkhôm saak Pang baah kươt baak rêh.
Valið núna:
Jang 20: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.