انجیلِ لوقا 24

زندَه وابی‌یَنِ عیسی

1مِنِه شَفَقِ روز اَوَل هفته، زَنَل سِدر و کافوری نَه که آمایَه کِردَه بییِن، بِی خِشون وَگِرُتِن وِ رَتِن وَ مقبره. 2امّا دییِن بَردِ جلو مقبره تِر دایَه وابی‌یِه اولَت. 3وختی رَتِن مِنِه مقبرَه، جنازۀ عیسیِ خداوندَ نَجُسِن. 4وَ ای اتّفاق مات وِ مَبهوت بییِن که یِه دَفَه دِتا مِرد بِی جومه‌یَلی نورانی وِیسان طِیشون. 5زَنَل وَ زَلِی سَرِشونَه بِسِن دومِن؛ امّا او دِتا مِرد وَشون گُتِن: «سیچه زِندَه نَه مِلِی مُردِه‌یَل ایجوریت؟ 6وِّ نَوِیچِنِه، بلکم زِندَه وابی‌یِه! وَ حوشِتون بیاریت اوسِه که مِنِه جلیل بی، وَتون چه گُت. 7گُت که کِرِ انسان بایِس وَ دَسِ گِناکارَل تسلیم وابو، وَ صلیب کَشییَه وابو وِ مِنِه روز سوم زِندَه وابو.» 8اوسِه زَنَل، گَپَلِ عیسی وَ حوشِشون اومَه. 9وختی وَ مقبرَه وَرگَشتِن، تَمومِ ای چییَلَه وَ او یازَه رسول وِ بقیَه گُتِن. 10زَنَلی که ای خَوَرَ دان وَ رسولَل، مریم مَجدَلیَه، یوآنّا، مریم دِی یعقوب وِ زَنَلِ باشون بییِن. 11امّا رسولَل گُتِۀ زَنَلَه کَلاپَرپَرین دونِسِن وِ گَپَلِشونَه باوَر نَکِردن. 12وا ای هَمَه، پطرس وَریسا وِ دویِس وَ طرفِ مقبرَه وِ خَل وابی سِیل کِه، امّا غیرَ کفن چیئی نَدی. پَ دَر حالی که وَ اوچیئی که اتّفاق اُفتایَه بی حیرت‌زَیَه بی، وَرگشت وَ حونَه.

مِنِه رَه عِمائوس

13مِنِه هَمو روز، دِ نفر وَ اونگَل ایرَتِن وَ دهاتی وَ نومِ عِمائوس، که وَ دِ فرسخیِ اورشلیم بی. 14اونگَل درمورد تَمومِ اتّفاقَلی که اُفتایَه بی، بِی یَک گَپ ایزَن. 15هَمیطو که مشغولِ بحث وِ گفتگو بییِن، عیسی، خُوش اومَه طِیشون وِ هُمرَشون وابی. 16امّا وِّ نَه نَشناختِن سی‌یِکِه تییَلِشون وَ یِکِه وِّ نَه بِشناسِن بَسَه وابی‌یَه بی. 17عیسی وَشون پُرسی: «مِنِه رَه، درمورد چه گَپ ایزَنیت؟» اونگَل بِی قیافِه‌یَلی غَم وَبار، بی‌صیا وِیسان. 18اوسِه یکیشون که نومِش کِلِئوپاس بی، جواب دا وَش گُت: «مَه تِ تِنا کسِ غریب مِنِه اورشلیمی که وَ چییَلی که مِنِه ای روزَل اتّفاق اُفتایِه بی‌خَوَری؟» 19عیسی وَش پُرسی: «چه چییَلی؟» اونگَل وَش گُتِن: «اوچییَلی که اومَه وَ سَرِ عیسیِ ناصری. وِّ پیغمبری بی که مِنِه پیشگاهِ خدا وِ طی تَمومِ مردم، کارَل وِ کلامِ پُرقدرتی داشت. 20وِ چطو کاهنلِ گپو وِ گَپویَلِ ایما وِّ نَه تحویل دان تا وَ مرگ محکوم وابو وُ وَ صلیبِش کِردِن. 21امّا ایما اِمید داشتیم که وِّ هَمو کسی بو که قرارِه اسرائیلَ آزاد کِنِه. غیرَیو، الان سِه رو وَ ای اتّفاقَل رَتِه. 22یِه‌پاره‌ای وَ زَنَل هم که مِلامونِن، ایما نَه حیرون کِردِنِه. اونگَل اُمرو صُبِ زی رَتِن وَ مقبرَه، 23وَختی که جنازۀ عیسی نَه نَجُسِن، اومَن، وَ ایما گُتِن فرشتِه‌یَلی نَه مِنِه رویا دینِه که وَشون گُتِنِه عیسی زندَه یَه. 24اوسِه یِه‌پاره‌ای وَ رَفیقَلِمون رَتِن وَ مقبرَه وِ اوضاع نَه هَموطوری دییِن، که زَنَل گُتَه بییِن، امّا عیسی نَه نَدییِن.» 25اوسِه عیسی وَشون گُت: «ای نایونَل که دلِ دیرفهمی سی باوَر کِردَنِ گُتِه‌یَلِ پیغمبَرَل داریت! 26مَه نیبایِس مسیحِ موعود ای عذابَلَه بِکَشِه وِ اوسِه وَ جلالِ خُوش دَرآ؟» 27اوسِه شروع کِه وَ نوشته‌یَلِ موسی وِ تَمومِ پیغمبَرَل وِ هر چیئی نَه که مِنِه تمومِ کتابَلِ مقدس درموردِ خُوش گُتَه وابی‌یَه بی، سیشون توضیح دا.

28اوسِه وختی نِزِنگ وابی‌یِن وَ دهاتی که مقصدِشون بی، عیسی طوری نِشون دا، که ایخوا بِرَه وَ جِی دیرتَری. 29اونگَل اصرار کِردِن وِ گُتِن: «وِیس طی ایما، سی‌یِکِه چیئی وَ آخِرِ روز نَمُندِه وِ شو نِزِنگِه.» پَ عیسی رَت داخل تا طِیشون وِیسِه. 30وختی باشون سرِ سفره نِشَسَه بی، نونَه وَگِرُت وِ برکت دا، تِکَه تِکَه کِه وِ دا وَ اونگَل. 31مِنِه هَمو موقَع، تییَلِشون واز وابی وُ وِّ نَه اِشناختِن، امّا وِّ زی وَ وَرِ تییَشون غیب وابی. 32اوسِه اونگَل وَ یَک پُرسییِن: «مَه موقِی که مِنِه قَدِ رَه بامون گَپ ایزَه وِ کتابَلِ مقدسَه سیمون توضیح ایدا، دل مِنِه سینَمون نیزَه!» 33پَ فوراً وَریسان وِ وَرگَشتِن وَ اورشلیم. وُچه او یازَه رسولَه جُسِن که بِی رَفیقَلِشون جَم وابی‌یَه بییِن، 34وِ ایگُتِن: «بَله، وَراسی که عیسِی خداوند زِندَه وابی‌یِه، وِ خِشَه وَ شمعون نِشون دایِه.» 35اوسِه، او دِ نفر هَم گُتِن که مِنِه رَه چِه وابی‌یِه وِ چطو عیسی نَه موقِی پَرَه کِردَن نون اِشناختِنِه.

عیسی خِشَه وَ شاگردَل نِشون اییِه

36هَنی در موردِ یِه صُبَت ایکِردِن که عیسی خُوش وِیسا مِلاشون وِ گُت: «سلام وَ ایشا!» 37اونگَل زَلَه‌تَرَک وابی‌یِن وِ گَمون کِردِن که روح ایبینِن. 38عیسی وَشون گُت: «سیچِه ایطو پَریشونیت؟ سیچِه شک وُ شُبهَه وَ دِلِتون رَه ایئیت؟ 39سیلَ دَسِ پام کِنیت. خِمُم! وَم دَس بِزنیت وِ بِوینیت؛ روح گوشت وُ هَس نَیارِه، امّا هَمیطو که ایبینیت مِ دارُم!» 40یِنَه گُت وِ دَسَل وِ پایَلِشَه نِشونِشون دا. 41اونگَل ایقَزَه شای وِ حیرت‌زَیَه بییِن که نیتَرِسِن باوَر کِنِن. پَ عیسی وَشون گُت: «چیئی سی خَردَن داریت؟» 42تکِه‌ای ماهیِ پُتَه وَش دان. 43وِه نَه گِرُت وِ دَمِ تییَشون خَه.

44اوسِه وَشون گُت: «یِه هَمو چیئی یَه که وختی باتون بییُم، ایگُتُم؛ یِکه تموم چییَلی که مِنِه تورات موسی وِ کتابَلِ پِیغَمبَرَل وِ زبور درمورد مِ نوشتَه وابی‌یِه، بایِس وَ اَنجوم بِرَسِه.» 45اوسِه، ذهنِشونَه روشن کِه تا بِتَرِن کتابَلِ مقدسَه بِفَمِن. 46وُ وَشون گُت: «مِنِه کتابَلِ مقدس نِوشتَه وابی‌یِه که مسیح عذاب ایکَشِه وِ مِنِه روز سوم وَ مُردِه‌یَل زِندَه ایابو، 47وِ مِنِه نومِ وُّ توبه وِ آمرزشِ گِنایَل وَ تَمومِ مِلَتَل اعلام ایابو وِ شروعش وَ اورشلیمِه. 48ایشا شاهِدَلِ ای چییَلیت. 49بِیونیت، مِ اوچیئی نَه که بُوم وَعدَشَه دایه وَ آسمون بِسی ایکِنُم وَ ری ایشا؛ پَ وِیسیت مِنِه شهر تا اوسِه که ای قدرتی که وَ آسمون ایایِه کِنیت وَ وَر.»

وَرگَشتَنِ عیسی وَ آسمون

50اوسِه عیسی اونگَلَه بُرد صَرا وَ شهر تا نِزِنگِ دهاتِ بِیت‌عَنیا وِ دَسَلِ خِشَه بلند کِه، برکتشون دا؛ 51وِ مِنِه هَمو حالی که برکتشون ایدا وَشون جیا وابی، بالا بُردَه وابی وَ آسمون. 52هَمَشون وِّ نَه پرستش کِردِن وِ بِی شاییِ مهلی گَپویی وَرگَشتِن وَ اورشلیم. 53وِ همیشَه وُچه ایوِیسان مِنِه معبدِ خداوند وِ خدا نَه شکر وِ ستایش ایکِردِن.

Valið núna:

انجیلِ لوقا 24: SLB

Áherslumerki

Deildu

Afrita