انجیلِ یوحنا 8
8
1امّا عیسی رَت وَ کُو زیتون.
بَخشییَن زن زناکار
2گَکون، عیسی اُمبِلا اومَه وَ صحن معبد. وُچِه مردم همَه دورِش جَم وابی‌یِن؛ وُ وِّ نِشَس، وِ مشغولِ تعلیمِشون وابی. 3مِنِه ای موقَع، معلملِ تورات وِ عالِمَلِ فرقه فَریسی، زنی نَه که موقع زنا گِرُتَه بییِن آوُردِن، وُ وِّ نَه نَهان مِلِی مردم، 4وَ عیسی گُتِن: «استاد، ای زن موقع زنا گرفتار وابی‌یِه. 5موسی مِنِه شریعت وَ ایما حکم کِردِه که ایطو زَنَل سنگسار وابون. ایسِه، تِ چه ایگی؟» 6یِنَه گُتِن تا وِّ نَه امتحان کِنِن وِ بونه‌ای سی متهم کِردَنِش بِجورِن. امّا عیسی سَرِشَه بِس دومِن، وِ بِی پِنجَش ری زمین اینوشت. 7امّا سی‌یِکِه اونگَل هَمیطو وَش سؤال ایکِردِن، عیسی سَرِشَه راس کِه وُ وَشون گُت: «مِلِی ایشا، هرکه بی گِنایَه، اَوَلین بَردَ وَش بِزَنِه.» 8وِ اُمبِلا سَرِشَه بِس دومِن، ری زمین اینوشت. 9بِی اِشنُفتَنِ ای گَپ، اونگَل یکی یکی وَ گَپوترین شروع کِردِن وَ وُچِه زَن وَدَر، تا آخِرین نفر، هَمَه رَتِن، تِنا عیسی مُند بِی او زن که ریوَریش وِیسایَه بی. 10اوسِه وَریسا وُ وَ او زن گُت: «ای زن، اونگَل کوچِنِن؟ هیشکَه تِنَه محکوم نَکِه؟» 11زن جواب دا: «هیشکَه، ای خداوند.» اوسِه عیسی وَش گُت: «مِ هَم تِنَه محکوم نیکِنُم. بِرَه وِ دَ گِنا مَکُ.»
اعتبار شهادَت عیسی
12اوسِه عیسی یِه دَف‌دَه بِی مردم گَپ زَه، فرمایش کِه: «مِ نورِ جهانُم. هرکه وَ مِ پیروی کِنِه، وَتَه مِنِه تاریکی رَه نیرَه، بلکم نورِ حیات نصیبش ایابو.» 13پَ فَریسی‌یَل وَش گُتِن: «تِ خُوت وَ خُوت شهادَت ایئی، پَ شهادَتِت معتبر نی.» 14عیسی مِنِه جوابِشون گُت: «هَرچَن مِ خُوم وَ خُوم شهادَت اییُم، امّا شهادَتُم معتبرِه، سی‌یِکِه دونُم وَ کوچِه اومَمِه وِ ایرَم کوچو. امّا ایشا نُونیت مِ وَ کوچه اومَمِه وِ ایرَم کوچو. 15ایشا بِی قیاسَلِ بَشری داوری ایکِنیت، امّا مِ وَ کسی داوری نیکِنُم. 16امّا حتی هَم، اَر بِکِنُم، داوریِ مِ دِرِسِه، سی‌یِکِه نَه تِنایَم، بلکم بُویی که مِنَه بِسی کِردِه هَم بِی مِنِه. 17مِنِه شریعت ایشا نوشتَه وابی‌یِه که شهادَتِ دِتا شاهد معتبرِه. 18مِ خُوم وَ خُوم شهادت اییُم، وِ بُویی هَم که مِنَه بِسی کِردِه، وَ مِ شهادت اییِه.» 19اوسِه وَش گُتِن: «بُو تِ کوچِنِه؟» عیسی جواب دا: «نه مِنَه ایشناسیت وِ نَه بُو مِنَه. اَر مِنَه ایشناختیت بُومَه هَم ایشناختیت.» 20عیسی ای گَپَلَه اوسِه گُت، که مِنِه خزانۀ معبد تعلیم ایدا. امّا هیشکَه وِّ نَه نَگِرُت، سی‌یِکِه ساعت وِّ هَنی نَرَسییَه بی.
گَپَلِ عیسی درمورد مرگ خُوش
21اوسِه یِه دَف‌دَه وَشون گُت: «مِ ایرَم وِ ایشا وَ دینِ مِ ایگَردیت، امّا مِنِه گِنایَلِ خِتون ایمیریت. وُچه که مِ ایرَم، ایشا نیتَریت بی‌یِیت.» 22پَ یَهودی‌یَل گُتِن: «مَه ایخوا خِشَه بِکِشِه که ایگُ "وُچه که مِ ایرَم، ایشا نیتریت بی‌یِیت"؟» 23عیسی وَشون گُت: «ایشا وَ دومِنیت، مِ وَ بالا. ایشا وَ ای دنیایِیت، امّا مِ نَه وَ ای دنیایَم . 24وَ ایشا گُتُم که مِنِه گِنایَلِ خِتون ایمیریت، سی‌یِکِه اَر ایمون نَیاریت که "مِ هَم وِّنُم" مِنِه گنایَلِتون ایمیریت.» 25وَش گُتِن: «تِ کییِی؟» عیسی جواب دا: «هَموِه که وَ اَوَل وَ ایشا گُتُم. 26خیلی چییَل دارُم که درمورد ایشا بِگُم وِ محکومِتون کِنُم. امّا وِّ که مِنَه بِسی کِردِه، بَرحقِه وِ مِ اوچیئی نَه که وَش اِشنُفتِمِه، سی دنیا ایگُم.» 27اونگَل نَفَمِسِن که درموردِ بُو آسمونی باشون گَپ ایزَنِه. 28پَ عیسی وَشون گُت: «اوسِه که کِرِ انسانَه بِلَند کِردیت، اوسِه ایفَمیت که "مِ هَم وِّنُم" وُ وَ خُوم کاری نیکِنُم، بلکم فقط اوچیئی نَه ایگُم که بُو وَ مِ یای دایِه. 29وُ وِّ که مِنَه بِسی کِه، بِی مِنِه. وِّ مِنَه تِنا نَنَهایِه، سی‌یِکِه مِ همیشَه اوچیئی نَه که باعثِ رضایتِ وِّ نِه، اَنجوم اییُم.» 30بِی ای گَپَل، خیلی‌یَل وَش ایمون آوُردِن.
حقیقت ایشا نَه آزاد ایکِنِه
31اوسِه عیسی وَ یَهودی‌یَلی که وَش ایمون آوُردَه بییِن، گُت: «اَر مِنِه کلامُم وِیسیت، وَراسی شاگردِ مِ ایابِیت. 32وِ حقیقتَه ایشناسیت، وِ حقیقت ایشا نَه آزاد ایکِنِه.» 33وَش جواب دان: «ایما اولادَلِ ابراهیمیم وُ وَتَه غلامِ کسی نَبیئیمِه. پَ چطورِه که ایگِی آزاد ایابِیم؟» 34عیسی جواب دا: «وراسی وَ ایشا ایگُم، کسی که گِنا ایکِنِه، غلامِ گِنایَه. 35غلام هَمیشَه جاش نَه مِنِه حونَه یَه، امّا کُر همیشَه جاش مِنِه حونَه یَه. 36پَ اَر کُر ایشا نَه آزاد کِنِه، وَراسی آزادیت.
اولادَلِ حقیقیِ ابراهیم
37«دونُم که اولادَلِ ابراهیمیت، امّا وَ دینِ کشتنِ مِنیت، سی‌یِکِه کلامِ مو مِنِه ایشا جِیئی نَیارِه. 38مِ وَ اوچیئی که مِنِه حضورِ بُو دییِمِه گَپ ایزَنُم وِ ایشا اوچیئی نَه که وَ بُو خِتون اِشنُفتیتِه، اَنجوم ایئیت.» 39اونگَل گُتِن: «بُو ایما ابراهیمِه.» عیسی گُت: «اَر اولادَلِ ابراهیم بیئیت، مِی ابراهیم رفتار ایکِردیت. 40مِ او کَسییَم که حقیقتی نَه که وَ خدا اِشنُفتِمِه سی ایشا گُتُم، امّا ایشا وَ دینِ کشتنِ مِنیت؛ ابراهیم ای کارَ نَکِه. 41امّا ایشا کارَلِ بُو خِتونَه اَنجوم ایئیت.»
وَ عیسی گُتِن: «ایما نَه حَرومزادَه یِیم! یِه بُو داریم که هَمو خِدایَه.» 42عیسی وَشون گُت: «اَر خدا بُو ایشا بی، مِنَه دوس داشتیت، سی‌یِکِه مِ وَ طرفِ خدا اومَمِه وِ ایسِه وِچِنُم. مِ وَ طرفِ خُوم نَیومَمِه، بلکم وِّ مِنَه بِسی کِردِه. 43سیچِه گَپَلِ مِنَه نیفَمیت؟ سی‌یِکِه نیتَریت کلامِ مِنَه قبول کِنیت. 44ایشا اولادَلِ اِبلیسیت وُ وَ دینِ اَنجومِ خواسته‌یَلِ وِّنیت. وِّ وَ اَوَل قاتل بی وِ بِی حقیقت نِسوَتی نَیاشت، سی‌یِکِه هیچ حقیقتی مِنِه وِّ نی. هر وخت دِرو ایگُ، وَ ذاتِ خُوش دِرو ایگُ؛ سی‌یِکِه دِروکُن وِ بُو تَمومِ دِروکُنَلِه. 45امّا سی‌یِکِه حقیقتَه وَ ایشا ایگُم، ایشا گَپِمَه باوَر نیکِنیت. 46کُویکی وَ ایشا ایتَرِه مِنَه وَ گِنایی محکوم کِنِه؟ پَ اَر حقیقتَه وَ ایشا ایگُم، سیچِه گَپِمَه باوَر نیکِنیت؟ 47هَر کس که وَ خدا یَه، گَپَلِ خدا نَه باوَر ایکِنِه؛ امّا ایشا باوَر نیکِنیت، سی‌یِکِه نَه وَ خدا یِیت.»
نِهِی یِکِه ابراهیم بو، مِ هِسُم
48یَهودی‌یَل مِنِه جوابِ وِّ گُتِن: «مَه دِرُس نَگُتیم که سامری یِی وِ دیو داری؟» 49عیسی جواب دا: «مِ دیو نَیارُم، بلکم بُو خِمَه حرمت اینُم، امّا ایشا وَم بی‌حرمتی ایکِنیت. 50مِ نَه وَ دینِ جلالِ خِمُم. امّا کسی هِسی که وَ دینِشِه، وِ داور هَم وِّنِه. 51وَراسی، وَ ایشا ایگُم، اَر کسی کلامِ مِنَه وَجا بیارِه، مَرگَه تا وَ ابد نیبینِه.» 52یَهودی‌یَل وَش گُتِن: «ایسِه دَ خاطِرجَم وابیئیم که دیوزَدَه یِی! ابراهیم وُ پیغمبَرَل مُردِن، وِ ایسِه تِ ایگِی، "اَر کسی کلامِ مِنَه وَجا بیارِه، طومِ مرگَه تا وَ ابد مِزَه نیکِنِه!" 53مَه تِ وَ بُو ایما ابراهیم هَم گَپوتَری؟ وِّ مُرد، وِ پیغمبَرَل هم مُردِن. خِتَه کی دُونی؟» 54عیسی گُت: «اَر مِ خِمَه جلال بییُم، جلالِ مِ ارزشی نَیارِه. وِه که مِنَه جلال اییِه، بُو مِنِه، هَموِه که ایشا ایگِیت، خِدِی ایمانِه. 55هَرچَن ایشا وِّ نَه نیشناسیت، امّا مِ وِّ نَه ایشناسُم. اَر بِگُم وِّ نَه نیشناسُم، مِی ایشا دِروکُن ایابوم. امّا مِ وِّ نَه ایشناسُم وِ کلامِ وِّ نَه وَجا ایارُم. 56بُو ایشا ابراهیم شایی ایکِه، که روزِ مِنَه بِوینِه؛ وُ وِه نَه دی وِ شایمون وابی.» 57یَهودی‌یَل وَش گُتِن: «هَنی پنجاه سال نَیاری وِ ابراهیمَ دی‌یِی؟» 58عیسی وَشون گُت: «وَراسی، وَ ایشا ایگُم، نِهِی یِکِه ابراهیم بو، مِ هِسُم!» 59پَ بَرد وَگِرُتِن تا سنگسارِش کِنِن، امّا عیسی خِشَه قایم کِه وُ وَ صَحنِ معبد زَه وَدَر.
Valið núna:
انجیلِ یوحنا 8: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company